ദിവസവും 9 മുതൽ 10 മണിക്കൂർ വരെ ജോലി ചെയ്തിട്ടും കഷ്ടിച്ച് ആയിരം രൂപയോ അതിൽ താഴെയോ മാത്രം വരുമാനം ലഭിക്കുന്നവർക്ക് ഋഷികേശിലെ ഒരു യുവാവ് നടത്തിയ പരീക്ഷണം തീർച്ചയായും വലിയൊരു അറിവായിരിക്കും.
വെറും 3 മണിക്കൂർ കൊണ്ട് അയാൾ സമ്പാദിച്ചത് രണ്ടായിരത്തിലധികം രൂപയാണ്. ഉത്തരാഖണ്ഡിലെ ഋഷികേശിൽ ഗംഗാനദിയുടെ തീരത്ത് ഭക്തർക്ക് ‘തിലകം’ ചാർത്തിക്കൊടുത്താണ് താൻ ഈ പണം ഉണ്ടാക്കിയതെന്ന് യുവാവ് സോഷ്യൽ മീഡിയയിലൂടെ പങ്കുവെച്ചു. തുടക്കത്തിൽ ആളുകൾ വരാത്തതിനാൽ വളരെ മന്ദഗതിയിലായിരുന്നു കാര്യങ്ങൾ. എന്നാൽ പ്രശസ്തമായ ഗംഗാ ആരതിയുടെ സമയം അടുത്തതോടെ കാര്യങ്ങൾ ആകെ മാറിമറിഞ്ഞു.
ആരതി ആരംഭിച്ചതോടെ ഭക്തർ തിലകം ചാർത്താനായി യുവാവിന്റെ അടുത്തേക്ക് കൂട്ടമായി വരാൻ തുടങ്ങി. സാധാരണയായി നൽകുന്ന 20 രൂപയ്ക്ക് പകരം ചിലർ 100 രൂപ വരെ സന്തോഷത്തോടെ അയാൾക്ക് നൽകി. ഒടുവിൽ കണക്കെടുത്തു നോക്കിയപ്പോൾ ആകെ 2,350 രൂപ ലഭിച്ചതായി അയാൾ അത്ഭുതത്തോടെ വെളിപ്പെടുത്തി. ഇതിൽ ഭൂരിഭാഗം തുകയും ലഭിച്ചത് അവസാനത്തെ ഏതാനും മണിക്കൂറുകൾക്കുള്ളിലാണ്. ഇതേ രീതിയിൽ മുന്നോട്ട് പോവുകയാണെങ്കിൽ ഒരു മാസം സുഖമായി “70,000 രൂപ” വരെ സമ്പാദിക്കാൻ കഴിയുമെന്നും യുവാവ് അവകാശപ്പെടുന്നു.
“പ്രതിവർഷം 8.5 ലക്ഷം രൂപ (വരുമാനം വെറും 3 മണിക്കൂർ ജോലിയിലൂടെ). നിങ്ങളുടെ തൊഴിലില്ലാത്ത സുഹൃത്തുക്കൾക്കായി ഇത് പങ്കുവെക്കൂ” എന്ന അടിക്കുറിപ്പോടെ ഇൻസ്റ്റാഗ്രാമിൽ പങ്കുവെക്കപ്പെട്ട ഈ വീഡിയോ വളരെ പെട്ടെന്നാണ് വൈറലായത്. എന്നാൽ ഈ പോസ്റ്റിന്റെ വിശ്വാസ്യത ഔദ്യോഗികമായി സ്ഥിരീകരിക്കപ്പെട്ടിട്ടില്ല.
വീഡിയോയ്ക്ക് താഴെ രസകരമായ നിരവധി പ്രതികരണങ്ങളാണ് ആളുകൾ രേഖപ്പെടുത്തിയത്. “അടുത്ത സമ്മർ ഇന്റേൺഷിപ്പ് പ്ലാൻ ഇതാണ്”, “ഇനി എന്നെ എപ്പോഴെങ്കിലും ഇവിടെ കണ്ടാൽ ആരും ഞെട്ടരുത്”, “തൊഴിൽ രാജിവെച്ച് നാളെ രാവിലെ തന്നെ ഋഷികേശിലേക്ക് വണ്ടി കയറുകയാണ്” എന്നിങ്ങനെ പലരും തമാശയായി കമന്റുകൾ കുറിച്ചു. എന്നാൽ മറ്റൊരു വശത്ത്, “ദൈവവിശ്വാസത്തിന്റെ പേരിൽ ആളുകൾ സ്വമേധയാ നൽകുന്ന പണത്തെ ചിലർ മനുഷ്യന്റെ പെരാശ കാരണം ഒരു ബിസിനസ്സ് ആക്കി മാറ്റുകയാണെന്നും, ഭക്തരുടെ കൃതജ്ഞതയെ ചൂഷണം ചെയ്യുകയാണെന്നും” ചിലർ വിമർശനാത്മകമായി പ്രതികരിച്ചു.
