2026 ഫിഫ ലോകകപ്പിൽ നടന്ന അർജന്റീന – ഓസ്ട്രിയ മത്സരം കളിക്കളത്തിലെ ആവേശം കൊണ്ട് മാത്രമല്ല, ഗാലറിയിലെ ഒരു അപൂർവ്വ കാഴ്ച കൊണ്ടും ശ്രദ്ധേയമായിരിക്കുകയാണ്. ഡാല്ലസിൽ നടന്ന ഈ ഗ്രൂപ്പ് ജെ മത്സരത്തിനിടയിൽ ക്യാമറകൾ കാണികൾക്കിടയിലേക്ക് തിരിഞ്ഞപ്പോഴാണ് കൗതുകകരമായ ഈ സംഭവം ദൃശ്യമായത്.
ചുവപ്പ് ജേഴ്സി ധരിച്ച ഓസ്ട്രിയൻ ആരാധകർക്കിടയിൽ നിന്ന ഒരു യുവാവ് തന്റെ നെഞ്ചിൽ “മെസ്സി ആരാണ്?” (MESSI WHO) എന്ന് എഴുതിവെച്ചിട്ടുണ്ടായിരുന്നു. അർജന്റീനയുടെ ക്യാപ്റ്റൻ ലയണൽ മെസ്സിയെ ചെറുതായി പരിഹസിക്കുന്ന രീതിയിലുള്ളതായിരുന്നു ഈ ആരാധകന്റെ പ്രകടനം. എന്നാൽ തൊട്ടടുത്ത നിമിഷങ്ങളിൽ തന്നെ ക്യാമറകൾ ഇതിലും മികച്ചൊരു മറുപടി ഗാലറിയിൽ നിന്ന് കണ്ടെത്തി. അർജന്റീനയുടെ ജേഴ്സി ധരിച്ച ഒരു വൃദ്ധൻ കൈകളിൽ ഒരു ബോർഡ് പിടിച്ചിരിക്കുന്നത് ക്യാമറകൾ കാണിച്ചു.
അതിൽ “100 വയസ്സുള്ള മെസ്സി ആരാധകൻ” (100 YEAR OLD MESSI FAN) എന്ന് എഴുതിയിരുന്നു. പുഞ്ചിരിയോടെ നിന്ന ഈ നൂറാം വയസ്സുകാരൻ പെട്ടെന്ന് തന്നെ സോഷ്യൽ മീഡിയയിലെ താരമായി മാറി. ഓസ്ട്രിയൻ ആരാധകനുള്ള ഏറ്റവും മികച്ച മറുപടിയാണ് ഇതെന്നാണ് ഫുട്ബോൾ പ്രേമികൾ പറയുന്നത്. ഒരു വശത്ത് ഒരാൾ മെസ്സിയുടെ പ്രശസ്തിയെ ചോദ്യം ചെയ്തപ്പോൾ, മറു വശത്ത് മെസ്സിയോടുള്ള ഒരു ആയുസ്സിന്റെ സ്നേഹമാണ് കാണാൻ കഴിഞ്ഞതെന്ന് ആരാധകർ കുറിച്ചു.
മത്സരത്തിൽ ഓസ്ട്രിയക്കെതിരെ അർജന്റീന എതിരില്ലാത്ത രണ്ട് ഗോളുകൾക്ക് വിജയിച്ചതോടെ ആ നൂറു വയസ്സുകാരനായ ആരാധകന്റെ സന്തോഷം ഇരട്ടിയായി. മുപ്പത്തിയെട്ടുകാരനായ ഇതിഹാസ താരം ലയണൽ മെസ്സി തന്നെയാണ് ഈ രണ്ട് ഗോളുകളും നേടിയത്. ഇതോടെ ലോകകപ്പ് ചരിത്രത്തിൽ ഏറ്റവും കൂടുതൽ ഗോളുകൾ നേടുന്ന താരം എന്ന റെക്കോർഡ് 18 ഗോളുകളുമായി മെസ്സി സ്വന്തമാക്കി. നിലവിലെ ചാമ്പ്യന്മാരായ അർജന്റീന ലോകകപ്പിന്റെ നോക്കൗട്ട് റൗണ്ടിലേക്ക് യോഗ്യത നേടുകയും ചെയ്തു.
