മുംബൈ∙ ഇന്ത്യൻ ട്വന്റി20 ക്രിക്കറ്റ് ടീമിന്റെ നായകനായി നിയമിതനായ ശ്രേയസ് അയ്യർക്ക് ആശംസകളുമായി സഹോദരി ശ്രേഷ്ഠ അയ്യർ രംഗത്ത്. ഇൻസ്റ്റഗ്രാമിലൂടെ പങ്കുവെച്ച വൈകാരികമായ കുറിപ്പിലാണ് ശ്രേയസിന്റെ ഈ നേട്ടം തങ്ങൾക്ക് എത്രത്തോളം അഭിമാനകരമാണെന്ന് ശ്രേഷ്ഠ വ്യക്തമാക്കിയത്.
പരുക്കുകളും പ്രതിസന്ധികളും കാരണം ടീമിന് പുറത്തായ കാലത്ത് അനുഭവിച്ച വിഷമങ്ങൾ കുടുംബാംഗങ്ങളിൽ നിന്ന് പോലും ശ്രേയസ് മറച്ചുവെച്ചിരുന്നതായി സഹോദരി വെളിപ്പെടുത്തി. സൂര്യകുമാർ യാദവിന് പകരക്കാരനായാണ് ശ്രേയസിനെ ബിസിസിഐ പുതിയ ക്യാപ്റ്റനായി പ്രഖ്യാപിച്ചത്.
ക്രിക്കറ്റിനെ നെഞ്ചിലേറ്റിയ ഒരു സാധാരണക്കാരനായ ആൺകുട്ടിയിൽ നിന്ന് ഇന്ത്യൻ ടീമിന്റെ നായക പദവിയിലേക്ക് ശ്രേയസ് വളർന്നത് അസാധാരണവും ഏവർക്കും പ്രചോദനവുമാണെന്ന് ശ്രേഷ്ഠ കുറിച്ചു. ഈ വിജയത്തിന് പിന്നിൽ അവൻ സഹിച്ച ത്യാഗങ്ങളും നിരാശകളും നിറഞ്ഞ കഠിനമായ പോരാട്ടങ്ങൾ വളരെ കുറച്ചുപേർക്ക് മാത്രമേ അറിയാവൂ. പരുക്കേറ്റ് മൂന്ന് തവണ പുറത്തിരിക്കേണ്ടി വന്നപ്പോഴും സ്വന്തം വേദനകൾ ഒളിപ്പിച്ചുപിടിച്ച്, തങ്ങളെ ആശ്വസിപ്പിക്കാനാണ് ശ്രേയസ് ശ്രമിച്ചതെന്നും സഹോദരി ഓർത്തെടുത്തു.
ഈ വലിയ ഉത്തരവാദിത്തം ശ്രേയസിന് ആരും വെറുതെ നൽകിയതല്ലെന്നും സ്വന്തം കഠിനാധ്വാനവും ആത്മവിശ്വാസവും കൊണ്ട് അവൻ നേടിയെടുത്തതാണെന്നും ശ്രേഷ്ഠ പറയുന്നു. ജീവിതത്തിലെ കടുത്ത പരീക്ഷണങ്ങളെ ധീരമായി നേരിട്ട ശ്രേയസിന്റെ വഴി എല്ലാവർക്കും സഞ്ചരിക്കാൻ കഴിയുന്നതല്ല. രാജ്യം മുഴുവൻ ശ്രേയസിന്റെ ഈ നേട്ടം ആഘോഷിക്കുമ്പോൾ അതിയായ അഭിമാനമുണ്ടെന്നും, ഇത് ഒരു തുടക്കം മാത്രമാണെന്നും മികച്ച നിമിഷങ്ങൾ ഇനിയും വരാനിരിക്കുന്നതേയുള്ളൂവെന്നും സഹോദരി കുറിച്ചു.
