യൂത്ത് കോൺഗ്രസ് സംസ്ഥാന അധ്യക്ഷനും പുതിയ മന്ത്രിയുമായ ഒ.ജെ. ജനീഷിന്റെ ഔദ്യോഗിക വാഹനത്തിന്റെ നമ്പറാണ് KL 01 CB 8308. ഈ നമ്പറിന് പിന്നിൽ കൗതുകകരമായ ഒരു പ്രത്യേകതയുണ്ട്. തികച്ചും യാദൃശ്ചികമാണെങ്കിലും, കൊടുങ്ങല്ലൂർ നിയോജകമണ്ഡലത്തിൽ നിന്നും മത്സരിച്ച് വിജയിച്ച ജനീഷിന് ലഭിച്ച ഭൂരിപക്ഷത്തിന്റെ അതേ കണക്കാണ് ഈ വണ്ടി നമ്പറിലും വന്നിരിക്കുന്നത്.
ഇടതുപക്ഷത്തിന്റെ ശക്തമായ കോട്ടയായിരുന്ന കൊടുങ്ങല്ലൂർ തിരിച്ചുപിടിച്ചാണ് ജനീഷ് നിയമസഭയിലേക്കും മന്ത്രിപദവിയിലേക്കും എത്തിയത്. കഴിഞ്ഞ 2021-ലെ തിരഞ്ഞെടുപ്പിൽ യു.ഡി.എഫ് സ്ഥാനാർത്ഥിക്കെതിരെ എൽ.ഡി.എഫിലെ വി.ആർ. സുനിൽകുമാർ 23,893 വോട്ടുകളുടെ വലിയ ഭൂരിപക്ഷം നേടിയ മണ്ഡലത്തിലാണ്, ഇത്തവണ ജനീഷ് 8,308 വോട്ടുകളുടെ ഭൂരിപക്ഷത്തിൽ അട്ടിമറി വിജയം നേടിയത്.
ഔദ്യോഗിക വാഹനം ലഭിച്ച സമയത്ത് ഈ നമ്പറിന്റെ പ്രത്യേകത താൻ ശ്രദ്ധിച്ചിരുന്നില്ലെന്നും, തന്റെ ഭാര്യയാണ് ഇക്കാര്യം ആദ്യം ചൂണ്ടിക്കാണിച്ചതെന്നും ഒ.ജെ. ജനീഷ് പറഞ്ഞു.
ഈ വാഹനം നമ്പർ നോക്കി തിരഞ്ഞെടുത്തതല്ലെന്നും തികച്ചും അവിചാരിതമായി സംഭവിച്ചതാണെന്നും അദ്ദേഹം വ്യക്തമാക്കി. ഇതൊരുപക്ഷേ തന്റെ ഭാഗ്യ നമ്പറായിരിക്കാമെന്നും, രാവിലെ നാട്ടിൽ നിന്ന് പലരും മെസ്സേജ് അയച്ചപ്പോഴാണ് കാര്യത്തിന്റെ ഗൗരവം മനസ്സിലായതെന്നും പറഞ്ഞ അദ്ദേഹം, ഈ വണ്ടി തന്നെ തുടർന്നും ഉപയോഗിക്കാൻ ശ്രമിക്കുമെന്നും കൂട്ടിച്ചേർത്തു.
