ഹൈദരാബാദിൽ പ്രഭാതസവാരിക്കിറങ്ങിയ യുവതിക്ക് നേരെ യുവാവിന്റെ അതിക്രമം. സൈബരാബാദിലെ ഔട്ടർ റിംഗ് റോഡിലുള്ള സൈക്ലിംഗ് ട്രാക്കിൽ വെച്ച് തിങ്കളാഴ്ച രാവിലെ 6:15-ഓടെയാണ് മനസ്സാക്ഷിയെ ഞെട്ടിക്കുന്ന ഈ സംഭവമുണ്ടായത്. ട്രാക്കിൽ നിരവധിപ്പേർ വ്യായാമം ചെയ്തുകൊണ്ടിരിക്കെ ഒരു യുവാവ് പൊതുസ്ഥലത്ത് വെച്ച് നഗ്നതാപ്രദർശനം നടത്തുകയും അശ്ലീല പ്രവർത്തിയിൽ ഏർപ്പെടുകയും ചെയ്തതായി യുവതി പരാതിപ്പെട്ടു.
സംഭവത്തെക്കുറിച്ച് യുവതി സോഷ്യൽ മീഡിയയിൽ പങ്കുവെച്ച വീഡിയോയിൽ പറയുന്നത് ഇങ്ങനെ: “ജനക്കൂട്ടമുള്ള സമയത്താണ് അയാൾ ഈ പ്രവർത്തി ചെയ്തത്. അയാളുടെ മുഖം വ്യക്തമായി പകർത്താൻ എനിക്ക് സാധിച്ചില്ല.” അവിടെ നിന്ന് രക്ഷപ്പെടാൻ ശ്രമിച്ച പ്രതിയെ പിന്തുടരാൻ താൻ ശ്രമിച്ചതായും അവർ പറഞ്ഞു. സ്ത്രീ സുരക്ഷയെക്കുറിച്ചുള്ള സമൂഹത്തിന്റെ മനോഭാവത്തെ ചോദ്യം ചെയ്ത യുവതി, സുരക്ഷ മുൻനിർത്തി സൂര്യോദയത്തിന് ശേഷം മാത്രമാണ് താൻ വ്യായാമത്തിന് ഇറങ്ങാറുള്ളതെന്നും എന്നാൽ ഇപ്പോൾ ആത്മവിശ്വാസം നഷ്ടപ്പെട്ടതായും വ്യക്തമാക്കി.
സംഭവത്തിൽ സൈബരാബാദ് പോലീസ് കമ്മീഷണർ ഡോ. രമേഷ് റെഡ്ഡി പ്രതികരിച്ചു. പ്രതിയെ കണ്ടെത്താനായി പ്രത്യേക അന്വേഷണ സംഘങ്ങളെ നിയോഗിച്ചിട്ടുണ്ടെന്നും തിരച്ചിൽ ഊർജ്ജിതമാണെന്നും അദ്ദേഹം അറിയിച്ചു. ഇത്തരം സംഭവങ്ങൾ ഉണ്ടായാൽ ഉടൻ തന്നെ ‘100’ എന്ന നമ്പറിൽ വിളിച്ച് വിവരം അറിയിക്കണമെന്നും എങ്കിൽ മാത്രമേ പ്രതികളെ വേഗത്തിൽ പിടികൂടാൻ സാധിക്കൂ എന്നും അദ്ദേഹം ജനങ്ങളോട് അഭ്യർത്ഥിച്ചു.
ഐടി ജീവനക്കാരും യുവാക്കളും ധാരാളമായി എത്തുന്ന 23 കിലോമീറ്റർ ദൈർഘ്യമുള്ള അത്യാധുനിക സൈക്ലിംഗ് ട്രാക്കിലാണ് ഈ അതിക്രമം നടന്നത് എന്നത് വലിയ ആശങ്കയ്ക്ക് കാരണമായിട്ടുണ്ട്. ട്രാക്കിൽ ആധുനിക സൗകര്യങ്ങളുണ്ടെങ്കിലും സുരക്ഷാ പരിശോധനകളിൽ വീഴ്ചയുണ്ടെന്നാണ് ഈ സംഭവം ചൂണ്ടിക്കാണിക്കുന്നത്. പ്രതിയെ ഇതുവരെ തിരിച്ചറിഞ്ഞിട്ടില്ലെങ്കിലും ലഭ്യമായ വിവരങ്ങൾ വെച്ച് ഉടൻ തന്നെ പിടികൂടുമെന്ന് പോലീസ് അറിയിച്ചു.
