അഖാ തീജ് എന്നും അറിയപ്പെടുന്ന അക്ഷയതൃതീയ ഹിന്ദു കലണ്ടറിലെ വൈശാഖ മാസത്തിലെ ശുക്ലപക്ഷ തൃതീയ നാളിലാണ് ആഘോഷിക്കുന്നത്. ഒഡീഷ, മഹാരാഷ്ട്ര, പശ്ചിമ ബംഗാൾ, തമിഴ്നാട്, കർണാടക, കേരളം, ആന്ധ്രാപ്രദേശ് എന്നിവിടങ്ങളിലാണ് ഈ ഉത്സവം പ്രധാനമായും ആഘോഷിക്കപ്പെടുന്നത്. ഈ വർഷം ഏപ്രിൽ 19 ഞായറാഴ്ചയാണ് അക്ഷയതൃതീയ വരുന്നത്. ഇന്ത്യയുടെ വിവിധ ഭാഗങ്ങളിൽ വ്യത്യസ്ത രീതികളിലാണ് ഈ ദിനം ആഘോഷിക്കുന്നത്.
ഒഡീഷയിൽ കർഷകർ വിത്തുപാകുന്ന ‘അഖി മുത്തി അനുകൂല’ എന്ന ചടങ്ങും പുരി രഥയാത്രയ്ക്കായുള്ള തേരുകളുടെ നിർമ്മാണവും ഈ ദിവസം ആരംഭിക്കുന്നു. മഹാരാഷ്ട്രയിൽ ഗൗരി പൂജയും ഹൽദി-കുങ്കുമം ചടങ്ങുകളും നടക്കുമ്പോൾ, കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിൽ വിവാഹങ്ങൾക്കും സ്വർണം വാങ്ങുന്നതിനും ഈ ദിവസം ഏറെ പ്രാധാന്യം നൽകുന്നു. ഉത്തർപ്രദേശിൽ ബാങ്കെ ബിഹാരി ക്ഷേത്ര ദർശനവും പുതിയ നിക്ഷേപങ്ങളും ഈ ദിനത്തിന്റെ പ്രത്യേകതയാണ്.
അക്ഷയതൃതീയ നാളിൽ സ്വർണം വാങ്ങുന്നതിന് പിന്നിൽ സാംസ്കാരികവും ആത്മീയവുമായ കാരണങ്ങളുണ്ട്. ‘അക്ഷയ’ എന്ന വാക്കിന്റെ അർത്ഥം ‘ഒരിക്കലും കുറയാത്തത്’ അല്ലെങ്കിൽ ‘ക്ഷയിക്കാത്തത്’ എന്നാണ്. ഈ ദിവസം ചെയ്യുന്ന നല്ല കാര്യങ്ങളും നടത്തുന്ന നിക്ഷേപങ്ങളും കാലക്രമേണ വളരുകയും ഐശ്വര്യം കൊണ്ടുവരികയും ചെയ്യുമെന്ന് വിശ്വസിക്കപ്പെടുന്നു. ഹൈന്ദവ പുരാണങ്ങൾ പ്രകാരം സമ്പത്തിന്റെ ദൈവമായ കുബേരന് വലിയ ഐശ്വര്യം ലഭിച്ച ദിനമാണിത്.
കൂടാതെ, ഐശ്വര്യത്തിന്റെ ദേവിയായ മഹാലക്ഷ്മിയെ ആരാധിക്കുന്നതിലൂടെ കുടുംബത്തിൽ അഭിവൃദ്ധി ഉണ്ടാകുമെന്നും സ്വർണം വാങ്ങുന്നത് ദേവിയെ പ്രീതിപ്പെടുത്തുമെന്നും ഭക്തർ വിശ്വസിക്കുന്നു. ത്രേതായുഗത്തിന്റെ ആരംഭവും ഗംഗാാനദി ഭൂമിയിലേക്ക് ഒഴുകിയെത്തിയതും ഈ പുണ്യദിനത്തിലാണെന്നാണ് വിശ്വാസം. അതുകൊണ്ടാണ് പുതിയ സംരംഭങ്ങൾ തുടങ്ങാനും സ്വർണം വാങ്ങാനും നിക്ഷേപങ്ങൾ നടത്താനും ഏറ്റവും അനുയോജ്യമായ സമയമായി അക്ഷയതൃതീയയെ കണക്കാക്കുന്നത്.
