രാത്രിയിൽ കേവലം 11 മിനിറ്റ് അധികം ഉറങ്ങുന്നത് ഹൃദയാഘാത സാധ്യത കുറയ്ക്കുമെന്ന് പുതിയ പഠനങ്ങൾ വ്യക്തമാക്കുന്നു. ‘യൂറോപ്യൻ ജേണൽ ഓഫ് പ്രിവന്റീവ് കാർഡിയോളജി’യിൽ പ്രസിദ്ധീകരിച്ച പഠനമനുസരിച്ച്, ഉറക്കത്തോടൊപ്പം വ്യായാമത്തിലും ഭക്ഷണത്തിലും വരുത്തുന്ന ചെറിയ മാറ്റങ്ങൾ ഹൃദയാരോഗ്യത്തിൽ വലിയ മെച്ചമുണ്ടാക്കും. യു കെ ബയോബാങ്കിലെ 53,000 മുതിർന്ന വ്യക്തികളെ എട്ട് വർഷത്തോളം നിരീക്ഷിച്ച ശേഷമാണ് ഗവേഷകർ ഈ നിഗമനത്തിലെത്തിയത്.
ദിവസവും 11 മിനിറ്റ് അധികം ഉറങ്ങുന്നതിനോടൊപ്പം, ഏകദേശം നാലര മിനിറ്റ് കഠിനമായ വ്യായാമം ചെയ്യുകയും കാൽ കപ്പ് പച്ചക്കറികൾ അധികമായി ഭക്ഷണത്തിൽ ഉൾപ്പെടുത്തുകയും ചെയ്താൽ ഹൃദയസംബന്ധമായ അസുഖങ്ങൾ വരാനുള്ള സാധ്യത 10 ശതമാനം വരെ കുറയ്ക്കാം. ഇതിലും വലിയ മാറ്റങ്ങൾ വരുത്താൻ സാധിക്കുന്നവർക്ക് ഗുണഫലങ്ങൾ അതിലേറെയായിരിക്കും. രാത്രി എട്ട് മുതൽ ഒൻപത് മണിക്കൂർ വരെ ഉറങ്ങുകയും 42 മിനിറ്റിലധികം വ്യായാമം ചെയ്യുകയും മികച്ച ഭക്ഷണക്രമം പാലിക്കുകയും ചെയ്യുന്നവർക്ക് ഹൃദയസ്തംഭനം, സ്ട്രോക്ക് തുടങ്ങിയവ ഉണ്ടാകാനുള്ള സാധ്യത 57 ശതമാനം കുറവാണെന്ന് പഠനം ചൂണ്ടിക്കാട്ടുന്നു.
സ്മാർട്ട് വാച്ചുകൾ പോലുള്ള ഉപകരണങ്ങൾ ഉപയോഗിച്ചാണ് ആളുകളുടെ ഉറക്കവും വ്യായാമവും ഗവേഷകർ വിശകലനം ചെയ്തത്. ജീവിതശൈലിയിൽ പെട്ടെന്ന് വലിയ മാറ്റങ്ങൾ വരുത്താൻ ശ്രമിക്കുന്നതിനേക്കാൾ, ഇത്തരം ചെറിയ മാറ്റങ്ങൾ സ്ഥിരമായി കൊണ്ടുപോകുന്നത് പ്രായോഗികമാണെന്ന് സിഡ്നി സർവകലാശാലയിലെ ഡോ. നിക്കോളാസ് കോമൽ പറഞ്ഞു. ഹൃദയാരോഗ്യം മെച്ചപ്പെടുത്താൻ ജീവിതരീതി രാത്രിക്ക് രാത്രി മാറ്റേണ്ടതില്ലെന്നും ചെറിയ ചുവടുവെപ്പുകൾ വലിയ ഫലം നൽകുമെന്നും ബ്രിട്ടീഷ് ഹാർട്ട് ഫൗണ്ടേഷനിലെ വിദഗ്ധരും സാക്ഷ്യപ്പെടുത്തുന്നു.
