ഒരേ സമയം ഉറങ്ങാം, മദ്യം ഒഴിവാക്കാം; ദീർഘായുസ്സിനായി ഒരു ഡോക്ടറുടെ ‘ഹെൽത്ത് ചാർട്ട്’

നമ്മുടെ ശാരീരികവും മാനസികവുമായ ആരോഗ്യത്തിന് ദൈനംദിന ശീലങ്ങള്‍ വലിയ സ്വാധീനം ചെലുത്തുന്നു. ശരിയായ ഭക്ഷണം, കൃത്യമായ വ്യായാമം, ആവശ്യത്തിന് ഉറക്കം എന്നിവ ആരോഗ്യത്തിന്റെ അടിസ്ഥാന തൂണുകളാണെന്ന് നമുക്കെല്ലാം അറിയാം. എന്നാല്‍, നമ്മുടെ ജീവിതത്തിന്റെ ഗുണനിലവാരം അടിമുടി മാറ്റാന്‍ സഹായിക്കുന്ന ചില പ്രത്യേക കാര്യങ്ങളുണ്ട്.

25 വര്‍ഷത്തിലേറെ പ്രവൃത്തിപരിചയമുള്ള പ്രശസ്ത ഹൃദയശസ്ത്രക്രിയാ വിദഗ്ധന്‍ (Cardiovascular Surgeon) ഡോ. ജെറമി ലണ്ടന്‍, 2026-ല്‍ നമ്മുടെ ജീവിതത്തെ മാറ്റിമറിക്കാന്‍ സഹായിക്കുന്ന ശീലങ്ങളെ കുറിച്ച് തന്റെ ഇന്‍സ്റ്റാഗ്രാമില്‍ പങ്കുവെച്ചിരുന്നു. ശാരീരികവും മാനസികവുമായ ആരോഗ്യം മെച്ചപ്പെടുത്താന്‍ സഹായിക്കുന്ന ഈ ശീലങ്ങള്‍ ഇവയാണ്……

1. ഭക്ഷണത്തിന് ശേഷമുള്ള നടത്തം – ഭക്ഷണം കഴിച്ചതിനുശേഷം 10 മുതല്‍ 20 മിനിറ്റ് വരെ ലഘുവായി നടക്കാന്‍ ഡോക്ടര്‍ നിര്‍ദ്ദേശിക്കുന്നു. ഇത് രക്തത്തിലെ പഞ്ചസാരയുടെ അളവ് (Glucose levels) കുറയ്ക്കാന്‍ സഹായിക്കുന്നു. ‘ഭക്ഷണത്തിന് ശേഷം നായ്ക്കളോടൊപ്പം പത്തു മിനിറ്റ് നടന്നപ്പോള്‍ തന്നെ എന്റെ ബ്ലഡ് ഷുഗര്‍ ലെവല്‍ കുറയുന്നത് എനിക്ക് കാണാന്‍ സാധിച്ചു.’- ഡോ. ജെറമി ലണ്ടന്‍ വ്യക്തമാക്കുന്നു.

2. ഉറങ്ങാന്‍ കൃത്യമായ സമയം – രാവിലെ ഉണരാന്‍ അലാറം വെക്കുന്നതുപോലെ രാത്രി ഉറങ്ങാന്‍ പോകുന്നതിനും ഒരു നിശ്ചിത സമയം കണ്ടെത്തണം. എല്ലാ ദിവസവും ഒരേ സമയത്ത് ഉറങ്ങുന്നത് ശരീരത്തിന്റെ സ്വാഭാവിക താളക്രമം (Circadian rhythm) മെച്ചപ്പെടുത്താന്‍ സഹായിക്കുന്നു.

3. മദ്യപാനം പൂര്‍ണ്ണമായും ഉപേക്ഷിക്കുക – മാനസിക തെളിച്ചത്തിനും വൈകാരിക സ്ഥിരതയ്ക്കും മദ്യം പൂര്‍ണ്ണമായും ഒഴിവാക്കുന്നത് വലിയ മാറ്റമുണ്ടാക്കും. മദ്യം ഒഴിവാക്കുന്നത് ജീവിതത്തില്‍ വരുത്തിയ ഏറ്റവും വലിയ പോസിറ്റീവ് മാറ്റമാണെന്ന് അദ്ദേഹം സാക്ഷ്യപ്പെടുത്തുന്നു. ‘ഒന്നിന്റെയും സ്വാധീനമില്ലാതെ സ്വതന്ത്രമായ ഒരു ജീവിതം’ നയിക്കാന്‍ ഇത് സഹായിക്കുന്നു.

4. ആഴ്ചയിലൊരിക്കല്‍ തീവ്രമായ വ്യായാമം (Aerobic Exercise) – ആഴ്ചയില്‍ ഒരിക്കലെങ്കിലും ഹൃദയമിടിപ്പ് വര്‍ദ്ധിപ്പിക്കുന്ന രീതിയിലുള്ള ഹൈ-ഇന്റന്‍സിറ്റി വ്യായാമം ചെയ്യുക. നിങ്ങള്‍ നടക്കുകയാണെങ്കില്‍ വേഗത കൂട്ടുകയോ അല്ലെങ്കില്‍ കയറ്റം (Incline) കയറുകയോ ചെയ്യുക. ഓടുകയാണെങ്കില്‍ സ്പ്രിന്റുകള്‍ (Sprints) ഉള്‍പ്പെടുത്തുക. ഇത് ഹൃദയാരോഗ്യം മെച്ചപ്പെടുത്താന്‍ സഹായിക്കുന്നു.

ശ്രദ്ധിക്കുക : ഈ വിവരങ്ങള്‍ പൊതുവായ അറിവിനായി മാത്രമുള്ളതാണ്. ഏതെങ്കിലും ആരോഗ്യപരമായ മാറ്റങ്ങള്‍ വരുത്തുന്നതിന് മുന്‍പ് നിങ്ങളുടെ ഡോക്ടറുടെ നിര്‍ദ്ദേശം തേടുക.