ഒരു രാത്രിക്ക് ഒരു കോടി രൂപയോ? ഇന്ത്യയിലെ ഏറ്റവും ചെലവേറിയ ഹോട്ടൽ മുറി ഇതാണോ? 2026-ലെ ലോകത്തിലെ ഏറ്റവും മികച്ച സ്ഥലങ്ങളുടെ പട്ടികയിൽ ഇടംപിടിച്ച മധ്യപ്രദേശിലെ ഒബ്റോയ് രാജ്ഗഢ് കൊട്ടാരത്തിന്റെ വിശേഷങ്ങളിലേക്ക്.
ഒബ്റോയ് ഗ്രൂപ്പിന്റെ ഏറ്റവും പുതിയ സംരംഭമായ ‘ദി ഒബ്റോയ് രാജ്ഗഢ് പാലസ്’ ടൈം മാഗസിൻ പ്രസിദ്ധീകരിച്ച 2026-ലെ ലോകത്തിലെ ഏറ്റവും മികച്ച സ്ഥലങ്ങളുടെ പട്ടികയിൽ ഉൾപ്പെട്ട് ആഗോള ശ്രദ്ധ നേടിയിരിക്കുകയാണ്. സാംസ്കാരികവും പ്രകൃതിദത്തവുമായ സവിശേഷതകളുള്ളതും സമാനതകളില്ലാത്ത ആതിഥ്യമര്യാദ വാഗ്ദാനം ചെയ്യുന്നതുമായ ലോകത്തിലെ മികച്ച ഇടങ്ങളെയാണ് ഈ പട്ടികയിൽ ഉൾപ്പെടുത്താറുള്ളത്.
ഖജുരാഹോയിലെ മനോഹരമായ മണിയഗഢ് കുന്നുകൾക്ക് മുകളിൽ, ഒരു തടാകത്തിന് അഭിമുഖമായാണ് ഈ കൊട്ടാരം സ്ഥിതി ചെയ്യുന്നത്. ബുന്ദേല രാജവംശത്തിന്റെ 350 വർഷം പഴക്കമുള്ള ഈ കൊട്ടാരം അതിമനോഹരമായാണ് ഒരു ആഡംബര റിസോർട്ടായി പുനർനിർമ്മിച്ചിരിക്കുന്നത്. നവംബറിൽ പ്രവർത്തനം ആരംഭിച്ച ഇവിടെ രാജകീയ പൈതൃകവും ആധുനിക സൗകര്യങ്ങളും ഒത്തുചേരുന്ന 65 മുറികളും സ്യൂട്ടുകളും ഉണ്ട്. സ്വകാര്യ പൂളുകൾ, പൂന്തോട്ടങ്ങൾ, ടെറസുകൾ എന്നിവ ഇവിടുത്തെ പ്രത്യേകതയാണ്.
പ്രകൃതിയോടും ചരിത്രത്തോടും അടുത്തുനിൽക്കുന്നു എന്നതാണ് ഈ റിസോർട്ടിന്റെ പ്രധാന ആകർഷണം. ബംഗാൾ കടുവകൾ, ഇന്ത്യൻ പുള്ളിപ്പുലികൾ, കരടികൾ എന്നിവയ്ക്ക് പേരുകേട്ട പന്ന നാഷണൽ പാർക്ക് ഈ തടാകത്തിന് അക്കരെയാണ് സ്ഥിതി ചെയ്യുന്നത്. കൂടാതെ, യുനെസ്കോ പൈതൃക പട്ടികയിലുള്ള പ്രസിദ്ധമായ ഖജുരാഹോ ക്ഷേത്രങ്ങളിലേക്ക് ഹോട്ടലിലെ ചരിത്രകാരന്റെ നേതൃത്വത്തിൽ സന്ദർശകർക്കായി പ്രത്യേക യാത്രകളും ഒരുക്കുന്നുണ്ട്.
ഇവിടുത്തെ താമസ സൗകര്യങ്ങൾക്ക് വിവിധ നിരക്കുകളാണ് ഈടാക്കുന്നത്. പാലസ് റൂമുകൾക്ക് 73,000 മുതൽ 85,000 രൂപ വരെയും, പ്രൈവറ്റ് ടെറസുള്ള മുറികൾക്ക് 90,000 രൂപ വരെയുമാണ് നിരക്ക്. സ്വകാര്യ പൂളുള്ള പ്രീമിയർ റൂമുകൾക്ക് 95,000 രൂപ വരെയും റോയൽ വില്ലകൾക്ക് ഏകദേശം 1.83 ലക്ഷം രൂപയുമാണ് ഒരു രാത്രിക്ക് നൽകേണ്ടത്. എന്നാൽ ഇവിടുത്തെ ഏറ്റവും ആഡംബരപൂർണ്ണമായ ‘കോഹിനൂർ സ്യൂട്ടിന്’ ഒരു രാത്രിക്ക് ഏകദേശം 11 ലക്ഷം രൂപയാണ് (₹1,100,000) ചെലവ് വരുന്നത്. ഇത് ഇന്ത്യയിലെ തന്നെ ഏറ്റവും ചെലവേറിയ താമസ സൗകര്യങ്ങളിൽ ഒന്നാണ്. രാജകീയ പൈതൃകവും വന്യജീവി അനുഭവങ്ങളും ഒത്തുചേരുന്ന ഒബ്റോയ് രാജ്ഗഢ് പാലസ് ഇന്ന് ആഡംബര സഞ്ചാരികളുടെ പ്രിയപ്പെട്ട ലക്ഷ്യസ്ഥാനമായി മാറിക്കഴിഞ്ഞു.
