ഇൻസ്റ്റന്റ് നൂഡിൽസ്: നമ്മൾ ഇഷ്ടപ്പെടുന്ന ലഘുഭക്ഷണം, പക്ഷേ കാത്തിരിക്കുന്നത് ഈ രോഗങ്ങള്‍

കാമ്പസ് ജീവിതത്തിലെ രാത്രികളിലും തിരക്കിട്ട ഓഫീസ് ഉച്ചഭക്ഷണ സമയത്തും എളുപ്പത്തിൽ തയ്യാറാക്കാൻ കഴിയുന്ന ഒരു വിഭവമെന്ന നിലയിൽ ഇൻസ്റ്റന്റ് നൂഡിൽസ് നമ്മുടെ ജീവിതത്തിന്റെ ഒരു പ്രധാന ഭാഗമായി മാറിയിരിക്കുന്നു. സ്വാദിഷ്ടവും, വില കുറഞ്ഞതും, ചുരുങ്ങിയ സമയത്തിനുള്ളിൽ തയ്യാറാക്കാവുന്നതുമായ ഈ ഭക്ഷണത്തിന് നമ്മുടെ അടുക്കളയിലും ഹൃദയത്തിലും സ്ഥിരമായ ഒരു സ്ഥാനമുണ്ട്. എന്നാൽ ഈ സൗകര്യങ്ങൾക്കൊപ്പം ചില ആരോഗ്യപ്രശ്നങ്ങളും ഇതിനുണ്ട്. തിരക്കിട്ട ജീവിതത്തിൽ നമ്മൾ പലപ്പോഴും അത് ശ്രദ്ധിക്കാറില്ല.

മിക്ക ഇൻസ്റ്റന്റ് നൂഡിൽസും ശുദ്ധീകരിച്ച ഗോതമ്പ് പൊടി (മൈദ) ഉപയോഗിച്ചാണ് നിർമ്മിക്കുന്നത്. ഇതിൽ നാരുകളും മറ്റ് പോഷകങ്ങളും വളരെ കുറവാണ്. നൂഡിൽസിനൊപ്പം ലഭിക്കുന്ന മസാലപ്പൊടികളിൽ ഉയർന്ന അളവിൽ സോഡിയം അടങ്ങിയിട്ടുണ്ട്, ഇത് ഒരു തവണ കഴിക്കുമ്പോൾതന്നെ ഒരു ദിവസത്തേക്ക് ശുപാർശ ചെയ്യുന്നതിന്റെ പകുതിയിലധികം സോഡിയം ശരീരത്തിൽ എത്താൻ കാരണമാകും. ഉയർന്ന സോഡിയം ഉപയോഗം രക്തസമ്മർദ്ദം, ഹൃദ്രോഗം, സ്ട്രോക്ക് എന്നിവയ്ക്ക് കാരണമാകും.

ഇതുകൂടാതെ, പല ബ്രാൻഡുകളും രുചി വർദ്ധിപ്പിക്കാനും കൂടുതൽ കാലം കേടാകാതിരിക്കാനും മോണോസോഡിയം ഗ്ലൂട്ടാമേറ്റ് (MSG) പോലുള്ള രാസവസ്തുക്കൾ ചേർക്കാറുണ്ട്. ചെറിയ അളവിൽ MSG മിക്ക ആളുകൾക്കും സുരക്ഷിതമാണെങ്കിലും, ഇത് അമിതമായി കഴിക്കുന്നത് വയറുവേദന, തലവേദന, മറ്റ് അസ്വസ്ഥതകൾ എന്നിവയ്ക്ക് കാരണമാകും.

ഇൻസ്റ്റന്റ് നൂഡിൽസിന്റെ മറ്റൊരു പ്രശ്നം ഉയർന്ന അളവിലുള്ള കൊഴുപ്പാണ്. അവ പാചകത്തിന് മുമ്പ് പാം ഓയിലിൽ വറുത്തെടുക്കുന്നതിനാൽ കൊഴുപ്പും കലോറിയും കൂടുതലായിരിക്കും. ഇത് കാലക്രമേണ ശരീരഭാരം വർദ്ധിപ്പിക്കുന്നതിനും കൊളസ്ട്രോളിന്റെ അളവ് കൂടുന്നതിനും കാരണമാകും.

ഇൻസ്റ്റന്റ് നൂഡിൽസിനോടുള്ള ഇഷ്ടം ആരോഗ്യകാര്യങ്ങളിൽ ശ്രദ്ധിക്കുന്നതിന് തടസ്സമാവേണ്ടതില്ല. ഇവ പൂർണമായി ഒഴിവാക്കാതെ തന്നെ ആരോഗ്യകരമായ രീതിയിൽ എങ്ങനെ കഴിക്കാം എന്നു നോക്കാം. അതിനുള്ള ചില വഴികൾ താഴെ നൽകുന്നു:

• നൂഡിൽസിൽ ചീര, കാപ്സിക്കം, കാരറ്റ് തുടങ്ങിയ പച്ചക്കറികൾ ധാരാളമായി ചേർക്കുക. ഇത് ഫൈബറും വിറ്റാമിനുകളും ലഭിക്കാൻ സഹായിക്കും.
• മസാല പാക്കറ്റുകൾ കുറച്ച് ഉപയോഗിക്കുക. പകരം വീട്ടിലുള്ള മറ്റു മസാലകൾ ചേർക്കുന്നത് സോഡിയം കുറയ്ക്കാൻ സഹായിക്കും.
• ലഭ്യമാണെങ്കിൽ ബേക്‌ഡ് (baked) അല്ലെങ്കിൽ എയർ-ഡ്രൈഡ് (air-dried) നൂഡിൽസ് തിരഞ്ഞെടുക്കുക.
• മുട്ട, ടോഫു, ഗ്രിൽഡ് ചിക്കൻ എന്നിവ ചേർത്ത് പ്രോട്ടീൻ ഉറപ്പുവരുത്തുക. ഇത് ഭക്ഷണം കൂടുതൽ സംതൃപ്തമാക്കും.

ഈ കാര്യങ്ങൾ ശ്രദ്ധിച്ചാൽ ഇൻസ്റ്റന്റ് നൂഡിൽസ് ആരോഗ്യകരമായ രീതിയിൽ കഴിക്കാം.