പുനെയിലെ ഗ്രാമത്തിൽ നിന്നുള്ള ഒരു വൃദ്ധ പാമ്പിനെ പിടിക്കുകയും അതിനെ സമർത്ഥമായി കൈകാര്യം ചെയ്യുകയും കഴുത്തിൽ ചുറ്റുകയും ചെയ്തുകൊണ്ട് സോഷ്യൽ മീഡിയയെ ഞെട്ടിച്ചിരിക്കുകയാണ്. 70 വയസ്സുകാരിയായ ശകുന്തള സുതർ എന്ന സ്ത്രീയാണ് ഈ സാഹസിക പ്രകടനത്തിന് പിന്നിൽ. പുനെയിലെ മുൽഷി താലൂക്കിലെ അംബോളി ഗ്രാമവാസിയാണ് ഇവർ. എക്സിൽ (മുമ്പ് ട്വിറ്റർ) ഒരു ഉപയോക്താവ് പങ്കുവെച്ച വീഡിയോ ആണ് ഇപ്പോൾ വൈറലായിരിക്കുന്നത്.
വീഡിയോയിൽ, വീടിനുള്ളിലെ ഒരു ബോർഡിന് പിന്നിൽ ഒളിച്ചിരിക്കുന്ന പാമ്പിനെ സുതർ ശാന്തമായി പിടിച്ച് പുറത്തെടുക്കുന്നത് കാണാം. പാമ്പിനെ ശരിയായി കൈകാര്യം ചെയ്ത ശേഷം, സുതർ അതിനെ തന്റെ കഴുത്തിൽ ചുറ്റുകയും വിഷമില്ലാത്ത ഇത്തരം ജീവികളെ എങ്ങനെ കൈകാര്യം ചെയ്യണം എന്നതിനെക്കുറിച്ച് ഉപദേശം നൽകുകയും ചെയ്യുന്നുണ്ട്.
“പാമ്പിനെ കാണുമ്പോൾ പരിഭ്രാന്തരാകേണ്ട ആവശ്യമില്ല. എല്ലാ പാമ്പുകളും വിഷമുള്ളവയല്ല. ചേര മനുഷ്യരെ ഉപദ്രവിക്കില്ല; വാസ്തവത്തിൽ, ഇത് കൃഷിയിടങ്ങളിൽ എലികളെയും കീടങ്ങളെയും തിന്നുന്നതിനാൽ കൃഷിക്കാർക്ക് വളരെ പ്രയോജനകരമാണ്. ആളുകൾ പലപ്പോഴും ഭയവും അന്ധവിശ്വാസവും കാരണം പാമ്പുകളെ കൊല്ലുന്നു, അത് തെറ്റാണ്,” ഡെയ്ലി ജാഗരൺ റിപ്പോർട്ട് ചെയ്തതനുസരിച്ച് സ്ത്രീ പറഞ്ഞു.
പ്രാദേശികമായി ധാമൻ എന്നറിയപ്പെടുന്ന ചേര, ഇന്ത്യയിൽ സാധാരണയായി കാണപ്പെടുന്ന വിഷമില്ലാത്ത ഒരിനം പാമ്പാണ്. ഇവ മനുഷ്യർക്ക് ദോഷകരമല്ലാത്തതും എലി ശല്യം നിയന്ത്രിക്കുന്നതിൽ പ്രധാന പങ്ക് വഹിക്കുന്നതുമാണ്.
