ജലദോഷം കൂടുമ്പോള്‍ ശ്വസിക്കാനുള്ള എളുപ്പത്തിന് നാം മൂക്ക് ശക്തമായി പിഴിയുന്ന ശീലമുണ്ട്. ഇത് താല്‍ക്കാലിക ആശ്വാസം നല്‍കുന്നുവെങ്കിലും
ഇങ്ങനെ ചെയ്യുന്നത് കൂടുതല്‍ സങ്കീര്‍ണതകളിലേക്ക് നയിക്കുമെന്നാണ് വിദഗ്ധര്‍ പറയുന്നത് . മനുഷ്യന്റെ മൂക്ക് എല്ലാ ദിവസവും 1 മുതല്‍ 2 ലിറ്റര്‍ വരെ മ്യൂക്കസ് ഉത്പാദിപ്പിക്കുന്നു. രോഗാവസ്ഥയില്‍ അത് വൈറസുകള്‍ നിമിത്തം കട്ടിയാകും. മൂക്ക് പിഴിയുന്നത് ഈ കട്ടിയുള്ള മ്യൂക്കസ് പുറന്തള്ളാന്‍ സഹായിക്കുന്നുണ്ടെങ്കിലും ഇത് മറ്റ് നിരവധി പ്രശ്‌നങ്ങള്‍ സൃഷ്ടിക്കുന്നു.
ഏഷ്യന്‍ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസിലെ സീനിയര്‍ കണ്‍സള്‍ട്ടന്റും ഇഎന്‍ടി മേധാവിയുമായ ഡോ സപ്നില്‍ പറയുന്നത് വളരെ ശക്തമായി മൂക്ക് പിഴിയുന്നത് മൂക്കിന്റെ സ്വാഭാവിക ശുദ്ധീകരണ സംവിധാനത്തെ തടസ്സപ്പെടുത്തുകയും സൈനസുകളിലേക്കോ മധ്യ ചെവിയിലേക്കോ മ്യൂക്കസും അണുക്കളെയും ശക്തിയില്‍ തള്ളുകയും ചെയ്യുന്നുവെന്നാണ് . ഇത് സൈനസ് അണുബാധകളോ ചെവി വേദനകളിലേക്കോ ചെവി പൊട്ടുന്നതിലേക്കോ നയിച്ചേക്കാം .
ശക്തമായി മൂക്ക് പിഴിയുന്നത് നാസല്‍ ഭാഗങ്ങളില്‍ ഉയര്‍ന്ന മര്‍ദ്ദം സൃഷ്ടിക്കുകയും മ്യൂക്കസ് തെറ്റായ ദിശയിലേക്ക് നീങ്ങാന്‍ ഇടയാക്കുകയും ചെയ്യും . പുറന്തള്ളുന്നതിനുപകരം, ഇത് സൈനസുകളിലേക്കോ ചെവികളിലേക്കോ ആഴത്തില്‍ സഞ്ചരിക്കുകയും അസുഖം വഷളാക്കുകയും ചെയ്യുന്നു . ഒരു സമയത്ത് ഒരു മൂക്ക് മൃദുവായി പിഴിയുന്നതാണ് ശരിയായ മാര്‍ഗ്ഗം.
ജലദോഷം ഉള്ളപ്പോള്‍ ശ്രദ്ധിക്കേണ്ട കാര്യങ്ങള്‍
ഒരു വിരല്‍ കൊണ്ട് മൃദുവായി അമര്‍ത്തി ഒരു മൂക്ക് അടയ്ക്കുക.
മറ്റേ നാസാരന്ധ്രത്തിലൂടെ പതുക്കെ വലിക്കുക .
നിങ്ങളുടെ മൂക്കിന് ബുദ്ധിമുട്ട് അനുഭവപ്പെടുന്നുണ്ടെങ്കില്‍ മ്യൂക്കസ് അയവുള്ളതാക്കാന്‍ ഒരു സലൈന്‍ സ്‌പ്രേ ഉപയോഗിക്കുക അല്ലെങ്കില്‍ ആവി പിടിക്കുക .
മൂക്കിന് ചുറ്റുമുള്ള ബുദ്ധിമുട്ട് ഒഴിവാക്കാന്‍ മൃദുവായതും ഈര്‍പ്പമുള്ളതുമായ ടിഷ്യുകള്‍ ഉപയോഗിക്കുക. ചര്‍മ്മത്തെ ജലാംശം നിലനിര്‍ത്താനും സുഖപ്രദമാക്കാനും കറ്റാര്‍വാഴ,അല്ലെങ്കില്‍ കര്‍പ്പൂരം പോലുള്ള ചേരുവകള്‍ അടങ്ങിയ ടിഷ്യൂകള്‍ തിരഞ്ഞെടുക്കുക.
അണുക്കള്‍ പടരുന്നത് തടയാന്‍ ടിഷ്യൂകള്‍ ഉടനടി നീക്കം ചെയ്യുകയും കൈകള്‍ കഴുകുകയും ചെയ്യേണ്ടത് അത്യാവശ്യമാണ്.
മ്യൂക്കസിന്റെ പങ്ക്
നിങ്ങളുടെ ശ്വസനവ്യവസ്ഥയെ സംരക്ഷിക്കുന്നതില്‍ മ്യൂക്കസ് നിര്‍ണായക പങ്ക് വഹിക്കുന്നു. ‘ബാക്ടീരിയ, വൈറസുകള്‍, എന്നിവയെ തടയുന്ന പ്രതിരോധത്തിന്റെ ആദ്യ പടിയായി ഈ കഫം പ്രവര്‍ത്തിക്കുന്നു. തുമ്മലോ ചുമയോ പോലുള്ള സ്വാഭാവിക പ്രക്രിയകളിലൂടെ രോഗാണുക്കളെ നിര്‍വീര്യമാക്കുകയും അണുക്കളെ പുറന്തള്ളാന്‍ സഹായിക്കുകയും ചെയ്യുന്ന രോഗപ്രതിരോധ തന്മാത്രകളും ഇതില്‍ അടങ്ങിയിരിക്കുന്നു.
ജലദോഷ സമയത്ത്, അമിതമായ മ്യൂക്കസ് ഉല്‍പാദനമാണ് വൈറസിനെ പ്രതിരോധിക്കാനുള്ള ശരീരത്തിന്റെ മാര്‍ഗം. എന്നിരുന്നാലും, തെറ്റായി മൂക്ക് പിഴിയുന്നത് ഈ പ്രതിരോധ സംവിധാനത്തെ തടസ്സപ്പെടുത്തും, ഇത് മൂക്കില്‍ നിന്ന് രക്തസ്രാവം അല്ലെങ്കില്‍ മറ്റ് അണുബാധകള്‍ പോലുള്ള സങ്കീര്‍ണതകളിലേക്ക് നയിച്ചേക്കാം.
