മുഖ്യമന്ത്രിക്കായി തയാറാക്കിവച്ച സമൂസയു കേക്കും ആരാണ് കഴിച്ചത്? സംഭവത്തില്‍ സിഐഡി അന്വേഷണം പ്രഖ്യാപിച്ച് ഹിമാചല്‍ പ്രദേശ് സര്‍ക്കാര്‍. അദ്ദേഹത്തിനായി പറഞ്ഞ ഒരു പഞ്ചനക്ഷത്ര ഹോട്ടൽ ഓർഡർ തെറ്റായി അദ്ദേഹത്തിന്റെ സെക്യൂരിറ്റി ജീവനക്കാർക്ക് നൽകിയതായി അന്വേഷണത്തില്‍ കണ്ടെത്തി.
മുഖ്യമന്ത്രി സുഖ്വീന്ദര്‍ സിംഗ് സുഖുവിനായി വാങ്ങിയ സമൂസയാണ് കാണാതായത്. ഒരു വനിതാ ഇൻസ്പെക്ടർ ഉൾപ്പെടെ അഞ്ച് പോലീസ് ഉദ്യോഗസ്ഥർക്ക് കാരണം കാണിക്കൽ നോട്ടീസ് ലഭിച്ചു . കേക്കും സമൂസയും അടങ്ങിയ മൂന്ന് പെട്ടികൾ നിരുത്തരവാദപരമായി ഉപയോഗിച്ചത് സർക്കാർ വിരുദ്ധ നടപടിയാണെന്നാണ് സിഐഡി അന്വേഷണത്തിൽ പരാമർശിച്ചിരിക്കുന്നത്.
മുഖ്യമന്ത്രി പങ്കെടുത്ത ഹിമാചല്‍പ്രദേശ് പൊലീസ് ക്രമിനല്‍ ഇന്‍വെസ്റ്റിഗേഷന്‍ വിഭാഗത്തിന്റെ ഒരു യോഗത്തിനിടയില്‍ വച്ചാണ് മുഖ്യമന്ത്രിക്കായി വാങ്ങിവച്ചിരുന്ന സമൂസ കാണാതായത്. ലക്കാര്‍ ബസാറിലെ ഹോട്ടല്‍ റാഡിസണ്‍ ബ്ലൂവില്‍ നിന്ന് മൂന്ന് ബോക്സ് സമൂസകള്‍ ഓര്‍ഡര്‍ ചെയ്തിരുന്നു. എന്നാല്‍ മുഖ്യമന്ത്രിക്ക് നല്‍കാനായി നോക്കിയപ്പോള്‍ ഒരെണ്ണം പോലും കാണാനില്ല. ഇതോടെ ഉദ്യോഗസ്ഥരും പെട്ടു.
മുഖ്യമന്ത്രിയോടൊപ്പമുണ്ടായിരുന്ന സുരക്ഷാ ഉദ്യോഗസ്ഥര്‍ക്കാണ് സമൂസ വിതരണം ചെയ്തത് എന്ന് പ്രാഥമിക അന്വേഷണത്തില്‍ കണ്ടെത്തി.
ഐ.ജി റാങ്കിലുള്ള ഒരുദ്യോഗസ്ഥന്‍ സബ് ഇന്‍സ്പെക്ടറോട് മുഖ്യമന്ത്രിക്ക് കഴിക്കാന്‍ എന്തെങ്കിലും വാങ്ങിക്കൊണ്ടു വരാന്‍ ആവശ്യപ്പെടുകയായിരുന്നു. എസ്.ഐ ആ ജോലി ഒരു എ.എസ്.ഐയെയും ഹെഡ് കോണ്‍സ്റ്റബിളിനെയും ഏല്‍പ്പിച്ചു. പായ്ക്ക് ചെയ്ത മൂന്ന് ബോക്സ് സമൂസ ഇവര്‍ കൊണ്ടുവരികയും എസ്.ഐയെ ഇക്കാര്യം അറിയിക്കുകയും ചെയ്തു. മുഖ്യമന്ത്രിക്കുള്ള സമൂസ ഒരു വനിത പൊലീസ് ഇന്‍സ്പെക്ടറെയാണ് ഏല്‍പ്പിച്ചത്. ഇവര്‍ ഇത് മെക്കാനിക്കല്‍ ട്രാസ്പോര്‍ട്ട് വിഭാഗത്തിലുള്ളവര്‍ക്ക് വിതരണം ചെയ്യുകയായിരുന്നു എന്നാണ് വിവരം.
ജനങ്ങൾ നേരിടുന്ന പ്രശ്‌നങ്ങളേക്കാൾ മുഖ്യമന്ത്രിയുടെ ലഘുഭക്ഷണത്തിനാണ് ഹിമാചൽ സർക്കാർ പ്രാധാന്യം നൽകുന്നതെന്ന് ഭാരതീയ ജനതാ പാർട്ടി ആരോപിച്ചു.
