ഇന്ത്യന്സിനിമയിലെ ഏറ്റവും ആഘോഷിക്കപ്പെടുന്ന താരദമ്പതികളായ അഭിഷേക് ബച്ചനും ഐശ്വര്യ റായിയും തമ്മിലുള്ള വിവാഹമോചന വാര്ത്തയാണ് ഇപ്പോള് ഏറ്റവും കൂടുതല് ചര്ച്ച ചെയ്യപ്പെടുന്ന വാര്ത്ത. 2007 ല് വിവാഹിതരാകുകയും 2011 ല് മകള് ആരാധ്യയുടെ മാതാപിതാക്കളാകുകയും ചെയ്ത ഇരുവര്ക്കുമിടയില് കഴിഞ്ഞ കുറച്ച് മാസങ്ങളായി കാര്യങ്ങള് ശരിയായ രീതിയിലല്ല മുമ്പോട്ട് പോകുന്നതെന്നാണ് അഭ്യൂഹങ്ങള്. ഇരുവരും വിവാഹമോചനത്തിലേക്ക് നീങ്ങുകയാണെന്നും വാര്ത്തകള് പറയുന്നു.
എന്തായാലും ഐശ്വര്യയുമായുള്ള വിവാഹമോചന കിംവദന്തികളില് അഭിഷേക് തന്റെ മൗനം വെടിഞ്ഞുവെന്ന അവകാശവാദം അടുത്തിടെ പുറത്തുവന്നിരുന്നു. താനിപ്പോഴും വിവാഹിതനാണെന്ന നിലയില് തന്റെ മോതിരം ഉയര്ത്തിക്കാട്ടി അഭിഷേക് പറഞ്ഞു. എന്നാല് അത് അഭിഷേകിന്റെ പഴയ പ്രസ്താവനയാണെന്ന് പാപ്പരാസികള് ഉടന് കണ്ടെത്തി. 2016 ലെ ഐശ്വര്യയുടെ ചിത്രമായ സര്ബ്ജിത്തിന്റെ പ്രീമിയറില് പങ്കെടുത്തതിന് ശേഷം അഭിഷേക് തന്റെ വിവാഹ ദിവസങ്ങളെക്കുറിച്ച് ഒരു പ്രസ്താവന നടത്തിയത് മുതലാണ് മാധ്യമങ്ങള് കഴുകന്കണ്ണുകളുമായി പിന്തുടരാന് തുടങ്ങിയത്.
മാധ്യമങ്ങളോട് സംസാരിക്കവെ, ഐശ്വര്യയുമായി അടുത്തിടെ ഒരുമിച്ച് പൊതുരംഗത്ത് പ്രത്യക്ഷപ്പെടാത്തതിനെ കുറിച്ച് ‘കാര്യങ്ങളൊന്നും ശരിയായ വഴിക്കല്ലേ’ എന്ന ചോദ്യത്തിന് അത് നിങ്ങളറിയേണ്ട കാര്യമില്ലെന്നായിരുന്നു അഭിഷേകിന്റെ മറുപടി.
വിവാഹമോതിരം കാണിച്ചുകൊടുത്ത് ഐശ്വര്യയുമായി താന് ഇപ്പോഴും വിവാഹിതനാണെന്ന് അദ്ദേഹം സ്ഥിരീകരിച്ചു. ജൂലൈ 12 ന് മുംബൈയില് വെച്ച് നടന്ന അനന്ത് അംബാനിയുടെയും രാധികാ മര്ച്ചന്റിന്റെയും താരനിബിഡമായ വിവാഹത്തിന് വെവ്വേറെയായി എത്തിയതോടെയാണ് അഭിഷേകും ഐശ്വര്യയും വീണ്ടും വിവാഹമോചന കിംവദന്തികള്ക്ക് തിരികൊളുത്തിയത്. വിവാഹത്തിന് അഭിഷേക് എത്തിയത് തനിച്ചും ഭാര്യ ഐശ്വര്യാറായി എത്തിയതാകട്ടെ മകള് ആരാധ്യയ്ക്കൊപ്പവും. കഴിഞ്ഞ മാസം, ഐശ്വര്യയില് നിന്നുള്ള വേര്പിരിയല് കിംവദന്തികള്ക്കിടയില് വിവാഹമോചനത്തെക്കുറിച്ചുള്ള ഒരു ഇന്സ്റ്റാഗ്രാം പോസ്റ്റ് അഭിഷേക് ലൈക്ക് ചെയ്തിരുന്നു. പോസ്റ്റിലെ വാചകം ഇങ്ങനെയായിരുന്നു: ‘സ്നേഹം എളുപ്പമാകുന്നത് നിര്ത്തുമ്പോള്.’ ഉടന് തന്നെ മാധ്യമങ്ങള് അതേറ്റെടുക്കുകയും ചെയ്തിരുന്നു.
അടിക്കുറിപ്പ് ഇങ്ങനെയായിരുന്നു, ‘വിവാഹമോചനം ആര്ക്കും ഒരിക്കലും എളുപ്പമല്ല. തെരുവ് മുറിച്ചുകടക്കുമ്പോള് കൈകോര്ത്ത് നില്ക്കുന്ന വൃദ്ധദമ്പതികളുടെ ഹൃദയസ്പര്ശിയായ വീഡിയോകള് കാണുമ്പോള് സന്തോഷകരമായ ഒരു ജീവിതത്തെക്കുറിച്ച് സ്വപ്നം കാണാത്തവര് ആരാണ്? എന്നിട്ടും, ചിലപ്പോള് നമ്മള് പ്രതീക്ഷിച്ചതുപോലെ ജീവിതം വികസിക്കില്ല. എന്നാല് പതിറ്റാണ്ടുകള്ക്ക് ശേഷം ഒരുമിച്ച് വേര്പിരിയുമ്പോള്, വലുതും ചെറുതുമായ കാര്യങ്ങള്ക്ക് പരസ്പരം ആശ്രയിക്കുന്ന ആളുകള് എങ്ങനെ സഹിക്കും?’