വെട്രിമാരന്റെ വിടുതലൈയില്‍ അപ്രതീക്ഷിതമായി നായകവേഷം കെട്ടിയാടിയതിലൂടെ കിട്ടിയ ആത്മവിശ്വാസവുമായി രണ്ടാമത്തെ ഹിറ്റ് ചിത്രത്തിന്റെയും ഭാഗമാകുകയാണ് നടന്‍ സൂരി. താരം പുതിയതായി അഭിനയിച്ച ഗരുഡനും വലിയ ഹിറ്റായി മാറുകയാണ്. മലയാളനടന്‍ ഉണ്ണി മുകുന്ദനും സൂരിയൂം പ്രധാന വേഷങ്ങളില്‍ അഭിനയിച്ച ഗ്രാമീണ തമിഴ് ആക്ഷന്‍ ഡ്രാമ പതിയെ ഹിറ്റായി മാറുകയാണ്.
വിശ്വാസവഞ്ചനയുമായി സൗഹൃദം നേരിടുന്ന രണ്ട് സുഹൃത്തുക്കളുടെ ജീവിതമാണ് ഈ സിനിമയിലൂടെ സെന്തില്‍കുമാര്‍ ചിത്രീകരിക്കുന്നത്. ഈ ചിത്രം ആരാധകരില്‍ നിന്ന് പോസിറ്റീവ് അവലോകനങ്ങള്‍ ലഭിക്കുകയാണ്. കൂടാതെ ബോക്സ് ഓഫീസില്‍ ശ്രദ്ധേയമായ സംഖ്യകളോടെ കോളിവുഡ് വ്യവസായത്തിലെ ഈ വര്‍ഷത്തെ രണ്ടാമത്തെ വലിയ ഹിറ്റ് ആയി ഉയര്‍ന്നു.
സാക്‌നിക്കിന്റെ റിപ്പോര്‍ട്ട് പ്രകാരം മൂന്ന് ദിവസം കൊണ്ട് 16.8 കോടിയാണ് ലോകമെമ്പാടുമായി സിനിമ നേടിയത്. ആദ്യ ദിനത്തില്‍, ചിത്രം ഇന്ത്യന്‍ ബോക്‌സോഫീസില്‍ ഏകദേശം 3 കോടി രൂപ നേടിയിരുന്നു. രണ്ടാം ദിവസം സംഖ്യ 38.57 ശതമാനം വര്‍ദ്ധിച്ചു, ആക്ഷന്‍ ത്രില്ലര്‍ ശനിയാഴ്ച 4.85 കോടി രൂപ കളക്ഷന്‍ നേടി. മൂന്നാം ദിവസം, 6.25 കോടി രൂപ നേടി, ചിത്രത്തിന്റെ ആദ്യ ആഴ്ചയിലെ കളക്ഷന്‍ ഇന്ത്യയില്‍ 14.6 കോടി രൂപയിലെത്തിയെന്ന് സാക്‌നില്‍ക് പറയുന്നു.
വെട്രിമാരന്റെ ഗ്രാസ് റൂട്ട് ഫിലിം കമ്പനിയും കെ. കുമാറിന്റെ ലാര്‍ക്ക് സ്റ്റുഡിയോയും ചേര്‍ന്ന് നിര്‍മ്മിക്കുന്ന ഈ ചിത്രത്തില്‍ സമുദ്രക്കനി, ശിവദ, രേവതി ശര്‍മ്മ, മൈം ഗോപി, ആര്‍ വി ഉദയകുമാര്‍, വടിവുക്കരശി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. യുവന്‍ ശങ്കര്‍രാജയാണ് ചിത്രത്തിന്റെ സംഗീതം ഒരുക്കിയിരിക്കുന്നത്. ധനുഷിന്റെ പട്ടാസ്, രാഷ്ട്രീയ നാടകമായ കൊടി, ആക്ഷന്‍ ചിത്രമായ കാക്കി സട്ടൈ തുടങ്ങിയ ചിത്രങ്ങള്‍ ചെയ്തിട്ടുള്ള സംവിധായകനാണ് സെന്തില്‍കുമാര്‍.
