അടുത്തിടെ നടന്ന ഒരു പഠനം മനുഷ്യരെക്കുറിച്ച് അമ്പരപ്പിക്കുന്നതും ആശങ്കപ്പെടുത്തുന്നതുമായ ചിലകണ്ടെത്തലുകള് നടത്തി. അതിന്റെ ചുരുക്കം ഇങ്ങനെയാണ്. ഭാവിയില് ആണ്കുഞ്ഞുങ്ങള് ഉണ്ടാകാതിരിക്കുകയും പെൺകുഞ്ഞുങ്ങൾ മാത്രം ജനിക്കുന്ന ഒരു ലോകം ഉണ്ടാവുകയും ചെയ്യും. പുരുഷലിംഗം നിർണ്ണയിക്കുന്നതിൽ നിർണായകമായ Y ക്രോമസോമിന്റെ വലുപ്പം ക്രമേണ കുറയുകയും ഒടുവിൽ അപ്രത്യക്ഷമാവുകയും ചെയ്തേക്കാം.
അങ്ങനെ സംഭവിക്കുമ്പോള് പെൺകുഞ്ഞുങ്ങൾ മാത്രം ജനിക്കുന്ന ഒരു ലോകത്തിന് ഇത് കാരണമാകും.
മനുഷ്യരുടെ ബയോളജിക്കൽ സെക്സ് നിര്ണയിക്കുന്നത് പ്രധാനമായും മൂന്നു കര്യങ്ങളാണ്. ക്രോമസോം, ജനനഗ്രന്ഥികൾ, ജനനേന്ദ്രിയങ്ങൾ എന്നിവയെ അടിസ്ഥാനമാക്കിയാണ് ലിംഗനിര്ണയം സാദ്ധ്യമാകുന്നത്. XX ക്രോമസോമിനെ സ്ത്രീലിംഗമായും XY ക്രോമസോമിനെ പുരുഷലിംഗമായുമാണ് പൊതുവേ നിര്വചിക്കപ്പെട്ടിരിക്കുന്നത്. ഇതില് രുഷലിംഗം നിർണയിക്കുന്ന Y ക്രോമസോം ചുരുങ്ങുകയാണെന്നും ഒടുവിൽ അപ്രത്യക്ഷമാകുമെന്നും ഈ വിഷയത്തെക്കുറിച്ച് പഠിക്കുന്ന ശാസ്ത്രജ്ഞർ സ്ഥിരീകരിച്ചു. കെന്റ് യൂണിവേഴ്സിറ്റി ഈ വിഷയത്തില് നടത്തിയ ഒരു പഠനമാണ് സോഷ്യൽ മീഡിയയിൽ പ്രചരിക്കുന്നത്.
ഇതോടെ സ്ത്രീലിംഗം മാത്രമുള്ള വ്യക്തികള് ജനിക്കുന്ന ഒരു ലോകത്തിന്റെ സാധ്യതയാണ് ഉയരുന്നത്. ആണുങ്ങളില്ലത്ത ഈ ലോകത്തിലെ മനുഷ്യന്റെ പ്രത്യുത്പാദന വ്യവസ്ഥയുടെ ഭാവിയെകുറിച്ചും ആശങ്കാപൂര്ണമായ ചോദ്യങ്ങളാണ് ഉയരുന്നത്.
Y ക്രോമസോമിന്റെ വലുപ്പത്തില് ക്രമാനുഗതമായ കുറവാണ് വന്നിട്ടുള്ളതെന്ന് പഠനം പറയുന്നു. അതായത് ഇതൊരു പുതിയ പ്രതിഭാസമല്ല.166 ദശലക്ഷം വർഷത്തിനിടയിൽ, Y ക്രോമസോമിന് 900 മുതൽ 55 വരെ സജീവ ജീനുകൾ നഷ്ടപ്പെട്ടിട്ടുണ്ട്. ഈ നിരക്കിൽ, 11 ദശലക്ഷം വർഷത്തിനുള്ളിൽ അവസാന 55 ജീനുകൾ ഇല്ലാതാകുമെന്ന് ജനിതകശാസ്ത്രത്തിൽ വിദഗ്ധനായ പ്രൊഫസർ ജെന്നി ഗ്രേവ്സ് വിശദീകരിക്കുന്നു.
മനുഷ്യർ ഭൂമിയിൽ നിന്ന് അപ്രത്യക്ഷമാകുമോ? പുതിയ മനുഷ്യ വര്ഗങ്ങള് ഉണ്ടാകുമോ?
“Y ക്രോമസോം ചുരുങ്ങിക്കൊണ്ടിരിക്കുന്നതിനാൽ ഈ കണ്ടെത്തൽ ഒരു ബദൽ സാധ്യതയെകൂടി വെളിപ്പെടുത്തുന്നു- മനുഷ്യർക്ക് ലിംഗഭേദം നിർണ്ണയിക്കുന്ന ഒരു പുതിയ ജീൻ വികസിപ്പിക്കാൻ കഴിയും, പക്ഷേ, അത് ഇപ്പോഴും അത്ര ലളിതമല്ലായിരിക്കാം” പ്രൊഫസർ ഗ്രേവ്സ് പറഞ്ഞു. . ഈ പരിണാമം ഇത് പ്രത്യേക മനുഷ്യ വർഗ്ഗങ്ങളുടെ ആവിർഭാവത്തിലേക്ക് നയിക്കാമെന്നും അപകടസാധ്യതകൾ നിറഞ്ഞതാണെന്നും പ്രൊഫസർ ഗ്രേവ്സ് മുന്നറിയിപ്പ് നൽകുന്നുണ്ട്. ‘സെക്സ് ജീനുകളുടെ യുദ്ധ’ത്തിലേക്കായിരിക്കും ഇത് നയിക്കുക.