ഇന്ത്യ, അമേരിക്ക, ബ്രിട്ടന് തുടങ്ങി 29 രാജ്യങ്ങളില് നടത്തിയ സര്വേ പ്രകാരം, ജനറേഷന് ഇസഡ് (Gen Z) വിഭാഗത്തിലെ പുരുഷന്മാര് പഴയ തലമുറയേക്കാള് കൂടുതല് പരമ്പരാഗത ലിംഗഭേദ കാഴ്ചപ്പാടുകള് പുലര്ത്തുന്നവരാണെന്ന് വ്യക്തമാകുന്നു. സാധാരണഗതിയില് പുതിയ തലമുറ കൂടുതല് പുരോഗമനപരമായ നിലപാടുകള് സ്വീകരിക്കാറാണുള്ളതെങ്കിലും, അതിന് വിപരീതമായി യുവാക്കള് ഇപ്പോള് തങ്ങളുടെ പിതാക്കന്മാരേക്കാളും മുത്തച്ഛന്മാരേക്കാളും കൂടുതല് ലിംഗവിവേചനപരമായ നിലപാടുകളിലേക്ക് മടങ്ങുന്നു എന്നാണ് ഈ പഠനം സൂചിപ്പിക്കുന്നത്.
2026-ലെ അന്താരാഷ്ട്ര വനിതാ ദിനത്തോടനുബന്ധിച്ച് കിംഗ്സ് കോളേജ് ലണ്ടനും ഇപ്സോസും (Ipsos) മാര്ച്ച് 5-ന് പുറത്തുവിട്ട പഠനം, സ്ത്രീകളും പുരുഷന്മാരും തമ്മിലുള്ള കാഴ്ചപ്പാടിലെ വര്ദ്ധിച്ചുവരുന്ന ഈ വിടവ് എടുത്തുകാണിക്കുന്നു. സമൂഹം ലിംഗസമത്വത്തിലേക്ക് നീങ്ങുമ്പോഴും, 1997-നും 2012-നും ഇടയില് ജനിച്ച Gen Z പുരുഷന്മാരില് വലിയൊരു വിഭാഗം പഴയകാല കര്ക്കശമായ നിയമങ്ങളിലേക്ക് തിരിച്ചുപോകാന് ആഗ്രഹിക്കുന്നു. 31 ശതമാനം Gen Z പുരുഷന്മാരും (മൂന്നിലൊന്ന്) വിശ്വസിക്കുന്നത് ‘ഭാര്യ എപ്പോഴും ഭര്ത്താവിനെ അനുസരിക്കണം’ എന്നാണ്. എന്നാല് 1946-നും 1964-നും ഇടയില് ജനിച്ച ബേബി ബൂമര് പുരുഷന്മാരില് കേവലം 13 ശതമാനം മാത്രമാണ് ഈ അഭിപ്രായത്തോട് യോജിക്കുന്നത്.
18 ശതമാനം Gen Z സ്ത്രീകള് മാത്രമാണ് ഭാര്യ ഭര്ത്താവിനെ അനുസരിക്കണമെന്ന് വിശ്വസിക്കുന്നത്. ബേബി ബൂമര് സ്ത്രീകളില് ഇത് വെറും 6 ശതമാനം മാത്രമാണ്. കൂടാതെ, പ്രധാനപ്പെട്ട തീരുമാനങ്ങളില് അന്തിമവാക്ക് ഭര്ത്താവിന്റേതായിരിക്കണം എന്ന് 33 ശതമാനം Gen Z പുരുഷന്മാരും അഭിപ്രായപ്പെടുന്നു. Gen Z പുരുഷന്മാര് സ്ത്രീകളെ നോക്കിക്കാണുന്ന രീതിയില് വലിയൊരു വൈരുദ്ധ്യം നിലനില്ക്കുന്നുണ്ട്. ഇവര് വീട്ടിലെ കാര്യങ്ങളില് പഴയ രീതികള് ഇഷ്ടപ്പെടുമ്പോള് തന്നെ, 41 ശതമാനം Gen Z പുരുഷന്മാരും കരുതുന്നത് വിജയകരമായ കരിയറുള്ള സ്ത്രീകള് കൂടുതല് ആകര്ഷകരാണെന്നാണ്.
എന്നാല് ഇതേ ഗ്രൂപ്പിലെ 24 ശതമാനം ആളുകളും വിശ്വസിക്കുന്നത് സ്ത്രീകള് ‘അമിതമായി സ്വതന്ത്രരോ’ ‘സ്വയം പര്യാപ്തരോ’ ആയി കാണപ്പെടരുത് എന്നാണ്. 21 ശതമാനം യുവാക്കള് കരുതുന്നത് ഒരു ‘യഥാര്ത്ഥ സ്ത്രീ’ ഒരിക്കലും ലൈംഗിക ബന്ധത്തിന് മുന്കൈ എടുക്കരുത് എന്നാണ്. ബേബി ബൂമര്മാരില് ഇത് വെറും 7 ശതമാനം മാത്രമാണ്. ലിംഗപരമായ റോളുകളുടെ ‘പുനര് ചര്ച്ചകള്’ നടക്കുകയാണെന്നാണ് ഇപ്സോസ് (Ipsos) സി.ഇ.ഒ കെല്ലി ബീവര് ഇതിനെ വിശേഷിപ്പിച്ചത്. കരിയറിലെ വിജയത്തെ ആകര്ഷകമായി കാണുന്ന അതേ ആളുകള് തന്നെ ഭാര്യ ഭര്ത്താവിനെ അനുസരിക്കണമെന്ന് ആഗ്രഹിക്കുന്നു എന്നത് ശ്രദ്ധേയമാണെന്ന് അവര് പറഞ്ഞു.
Gen Z പുരുഷന്മാര് സ്ത്രീകളില് മാത്രം നിയന്ത്രണങ്ങള് അടിച്ചേല്പ്പിക്കുകയല്ല, മറിച്ച് സ്വയം ചില കര്ക്കശമായ അതിര്വരമ്പുകള് നിശ്ചയിക്കുകയും ചെയ്യുന്നു. ഗ്ലോബല് ഇന്സ്റ്റിറ്റ്യൂട്ട് ഫോര് വിമന്സ് ലീഡര്ഷിപ്പ് ചെയര്പേഴ്സണ് ജൂലിയ ഗില്ലാര്ഡ് ഇതില് ആശങ്ക പ്രകടിപ്പിച്ചു. ‘പല Gen Z പുരുഷന്മാരും സ്ത്രീകളില് പരിമിതമായ പ്രതീക്ഷകള് വെക്കുന്നു എന്ന് മാത്രമല്ല, അവര് സ്വയം ലിംഗപരമായ ഇടുങ്ങിയ നിയമങ്ങള്ക്കുള്ളില് കുടുങ്ങിക്കിടക്കുകയുമാണ്.’- അവര് പറഞ്ഞു.
31 ശതമാനം ആളുകള് കരുതുന്നത് വീടിനുള്ളില് പുരുഷനായിരിക്കണം അന്തിമ തീരുമാനമെടുക്കേണ്ടതെന്ന് സമൂഹം പ്രതീക്ഷിക്കുന്നു എന്നാണ്. എന്നാല് കേവലം 21 ശതമാനം ആളുകള്ക്ക് മാത്രമാണ് വ്യക്തിപരമായി ഈ അഭിപ്രായമുള്ളത്. കുട്ടികളെ നോക്കുന്ന ഉത്തരവാദിത്തം സ്ത്രീകളുടേതാണെന്ന് വ്യക്തിപരമായി കരുതുന്നത് 14 ശതമാനം ആളുകള് മാത്രമാണ്, എന്നാല് 43 ശതമാനം പേരും വിശ്വസിക്കുന്നത് സമൂഹം സ്ത്രീകളില് നിന്ന് ഇതാണ് പ്രതീക്ഷിക്കുന്നത് എന്നാണ്. പ്രൊഫസര് ഹീജംഗ് ചുംഗ് ഇതിനെക്കുറിച്ച് മുന്നറിയിപ്പ് നല്കി. ആളുകളുടെ വ്യക്തിപരമായ കാഴ്ചപ്പാടുകള് കൂടുതല് പുരോഗമനപരമാണെങ്കിലും, സമൂഹം തങ്ങളെ പഴയ രീതികളില് തളച്ചിടാന് ആഗ്രഹിക്കുന്നു എന്ന തെറ്റായ ധാരണയാണ് ഈ സമ്മര്ദ്ദത്തിന് കാരണമെന്ന് അവര് ചൂണ്ടിക്കാട്ടി. ഭൂരിഭാഗം ജനങ്ങളും ലിംഗസമത്വവും കൂടുതല് സമാധാനപരമായ കുടുംബ വ്യവസ്ഥയുമാണ് ആഗ്രഹിക്കുന്നത് എന്ന് സര്വേ ഉപസംഹരിക്കുന്നു.
