മലയാളത്തില്‍ യുവതലമുറയുടെ ഏറ്റവും പുതിയ ഹരമായി മാറിയിട്ടുള്ള സുശീല്‍ശ്യാം വൈവിദ്ധ്യമാര്‍ന്ന സംഗീതം ഒരുക്കിയാണ് സിനിമാപ്രേമികളുടെ മനസ്സില്‍ ഇടം പിടിച്ചത്. ആവേശത്തിലും മഞ്ഞുമ്മല്‍ ബോയ്‌സിലും താരം കൊടുത്ത സംഗീതം തരംഗമാകുകയും ചെയ്തിരുന്നു. ഇതാ രണ്ടുസിനിമയിലെയും തന്റെ വര്‍ക്കുകള്‍ ഗ്രാമി പുരസ്‌ക്കാരത്തിനായി സമര്‍പ്പിച്ചിരിക്കുകയാണ് യുവ സംഗീതജ്ഞന്‍.
പുതിയ വര്‍ത്തമാനം ആരാധകരെയും സംഗീതരംഗത്തെ വമ്പന്മാരെയും ഒരുപോലെ ആവേശം കൊള്ളിക്കുകയും വിസ്മയിപ്പിക്കുകയും ചെയ്തിരിക്കുകയാണ്. ഇക്കാര്യം ഇന്‍സ്റ്റാഗ്രാമില്‍ ഒക്‌ടോബര്‍ അഞ്ചിന് ഇട്ട പോസ്റ്റില്‍ താരം വ്യക്തമാക്കുകയും ചെയ്തിരുന്നു. ഫഹദ്ഫാസില്‍ നായകനായ ആവേശം സിനിമയിലെ സംഗീതം വിഷ്വല്‍മീഡിയാ കാറ്റഗറിയില്‍ ബെസ്റ്റ് കോംപിലേഷന്‍ സൗണ്ട് ട്രാക്ക് വിഭാഗത്തിലേക്കാണ് താരം അയച്ചിരിക്കുന്നത്.
സൗബീന്‍ ഷാഹിറിന്റെ മഞ്ഞുമ്മല്‍ ബോയ്‌സിലെ പശ്ചാത്തല സംഗീതം വിഷ്വല്‍ മീഡിയാ വിഭാഗത്തിലെ ബെസ്്റ്റ് സ്‌കോര്‍ സൗണ്ട് ട്രാക്ക് വിഭാഗത്തിലുമാണ് നല്‍കിയിരിക്കുന്നത്. രണ്ടു സിനിമയിലും താരം കൊടുത്ത സംഗീതത്തെക്കുറിച്ച് പരാമര്‍ശിക്കാതെ സുശീല്‍ ശ്യാമിന്റെ സംഗീത ജീവിതത്തെക്കുറിച്ചുള്ള വിവരണം പൂര്‍ണ്ണമാകില്ല. അമല്‍നീരദ് സംവിധാനം ചെയ്യുന്ന ബോഗണ്‍ വില്ലയാണ് സുശീല്‍ ശ്യാമിന്റെ പുതിയ വര്‍ക്ക്. കുഞ്ചാക്കോ ബോബനും ഫഹദ് ഫാസിലും, ജ്യോതിര്‍മയിയും പ്രധാന വേഷത്തില്‍ വരുന്ന സിനിമ ഒക്‌ടോബര്‍ 17 റിലീസ് ചെയ്യും.
