കിംഗ്സ് ഇലവന്‍ പഞ്ചാബ് തന്നെ ടീമിലെടുക്കുമോ എന്ന് ഭയപ്പെട്ടിരുന്നതായി ഇന്ത്യന്‍ താരം ഋഷഭ് പന്ത്. ലഖ്നൗ സൂപ്പര്‍ ജയന്റസ് നായകനായി പ്രഖ്യാപിച്ചതിന് പിന്നാലെയാണ് പന്തിന്റെ ഞെട്ടിക്കുന്ന വെളിപ്പെടുത്തല്‍. മെഗാ ലേലത്തിന്റെ ദിവസം പഞ്ചാബ് കിംഗ്സ് തന്നെ ടീമിലെത്തിച്ചേക്കുമോ എന്ന ടെന്‍ഷനിലാണ് താന്‍ കഴിച്ചുകൂട്ടിയതെന്നാണ് താരം പറഞ്ഞത്.
ഇന്ത്യന്‍ പ്രീമിയര്‍ ലീഗിന്റെ 2025 പതിപ്പിന് മുന്നോടിയായി ലഖ്നൗ സൂപ്പര്‍ ജയന്റ്സിന്റെ പ്രിന്‍സിപ്പല്‍ ഉടമ സഞ്ജീവ് ഗോയങ്ക ഋഷഭ് പന്തിനെ ഫ്രാഞ്ചൈസിയുടെ പുതിയ ക്യാപ്റ്റനായി പ്രഖ്യാപിച്ചിരിക്കുകയാണ്. പന്തിനെ ചെന്നൈ സൂപ്പര്‍ കിംഗ്സ് (സിഎസ്‌കെ) അല്ലെങ്കില്‍ പഞ്ചാബ് കിംഗ് (പിബികെഎസ്) തിരഞ്ഞെടുത്തേക്കുമെന്ന അഭ്യൂഹങ്ങള്‍ പരന്നിരുന്നു. സിഎസ്‌കെയെ സംബന്ധിച്ചിടത്തോളം, ഇതിഹാസ താരം എംഎസ് ധോണിയുമായുള്ള അദ്ദേഹത്തിന്റെ അടുത്ത ബന്ധം ടീമിലെ തന്റെ പിന്‍ഗാമി എന്ന നിലയില്‍ പന്തിനെ കാണുമോ എന്ന തരത്തിലായിരുന്നു ഊഹാപോഹങ്ങള്‍.
മറുവശത്ത്, മുന്‍ ഡല്‍ഹി ക്യാപിറ്റല്‍സ് ഹെഡ് കോച്ച് റിക്ക് പോണ്ടിംഗ് പിബികെഎസ് ക്യാമ്പില്‍ ചേര്‍ന്നതോടെ, വിക്കറ്റ് കീപ്പര്‍-ബാറ്റര്‍ ഫ്രാഞ്ചൈസിയില്‍ ചേര്‍ന്ന് ഓസീസുമായി വീണ്ടും ഒന്നിക്കാനുള്ള സാധ്യത ഉയര്‍ന്നു കേട്ടിരുന്നു. ഐപിഎല്‍ ലേലത്തെക്കുറിച്ചുള്ള അഭ്യൂഹങ്ങളെക്കുറിച്ച് തിങ്കളാഴ്ച സ്റ്റാര്‍ സ്പോര്‍ട്സിന് നല്‍കിയ അഭിമുഖത്തിലായിരുന്നു പന്തിന്റെ വെളിപ്പെടുത്തല്‍.
ഏറ്റവും വലിയ പേഴ്സ് കൈവശമുള്ളതിനാല്‍ പഞ്ചാബിനൊപ്പം പോകേണ്ടി വരുമോയെന്ന് മാത്രമായിരുന്നു തന്റെ ഭയമെന്ന് പന്ത് വെളിപ്പെടുത്തി. എന്നിരുന്നാലും, ശ്രേയസ് അയ്യര്‍ 26.75 കോടി രൂപയ്ക്ക് ഫ്രാഞ്ചൈസി വാങ്ങിയതോടെ പിരിമുറുക്കം കുറഞ്ഞുവെന്ന് അദ്ദേഹം സമ്മതിച്ചു.
”എനിക്ക് ഒരു ടെന്‍ഷന്‍ മാത്രമേ ഉണ്ടായിരുന്നുള്ളൂ, അത് പഞ്ചാബായിരുന്നു. ഏറ്റവും വലിയ പേഴ്സ് അവരുടേതായിരുന്നു. ശ്രേയസ് പഞ്ചാബില്‍ പോയപ്പോള്‍ എനിക്ക് എല്‍എസ്ജിയില്‍ എത്താന്‍ കഴിയുമെന്ന് തോന്നി. ”അദ്ദേഹം പറഞ്ഞു.
