ഇന്ത്യൻ സായുധ സേനയുടെ പരമോന്നത കമാൻഡറായ പ്രസിഡന്റ് ദ്രൗപതി മുർമു ബുധനാഴ്ച ഹരിയാനയിലെ അംബാലയിലുള്ള വ്യോമസേനാ സ്റ്റേഷനിൽ റാഫേൽ യുദ്ധവിമാനത്തിൽ പറന്നുയർന്ന് ചരിത്രം സൃഷ്ടിച്ചു. പറക്കലിനുശേഷം തിരിച്ചെത്തി സൈനികർക്കൊപ്പം എടുത്ത ഫോട്ടോയിൽ ഒരു വനിതാ പൈലറ്റുമുണ്ടായിരുന്നു– ശിവാംഗി സിങ്.
ഓര്ക്കുന്നില്ലേ, ശിവാംഗിയെ. പാക്കിസ്ഥാനിലെ ഭീകര–സൈനിക കേന്ദ്രങ്ങള്ക്കുനേരെ ഇന്ത്യ നടത്തിയ ഓപ്പറേഷൻ സിന്ദൂറിനിടെ സ്ക്വാഡ്രൺ ലീഡർ ശിവാംഗിയെ പിടികൂടിയെന്നായിരുന്നു പാക്കിസ്ഥാനിലെ പ്രചാരണം. ഇതു സംബന്ധിച്ച് ചില വ്യാജ വിഡിയോകളും പാക്കിസ്ഥാൻ പ്രചരിപ്പിച്ചു. ശിവാംഗി സിങ്ങിനൊപ്പം രാഷ്ട്രപതി ഫോട്ടോയെടുത്തപ്പോൾ അത് പാക്കിസ്ഥാനുള്ള രാജ്യത്തിന്റെ ശക്തമായ സന്ദേശവും കൂടിയായി.
കശ്മീരിലെ പഹൽഗാമിൽ നടന്ന ഭീകരാക്രമണത്തിനു മറുപടിയായാണ് ഇന്ത്യ ഓപ്പറേഷൻ സിന്ദൂറിലൂടെ തിരിച്ചടിച്ചത്. ഈ ഓപ്പറേഷനിടെ റഫാൽ വിമാനം തകർത്ത് ശിവാംഗിയെ പിടികൂടി എന്നായിരുന്നു പാക്ക് മാധ്യമങ്ങളിലെയും സമൂഹമാധ്യമങ്ങളിലെയും അവകാശവാദം. എന്നാൽ, തെളിവുകളുടെ അടിസ്ഥാനത്തിൽ പാക്കിസ്ഥാന്റെ അവകാശവാദങ്ങൾ ഇന്ത്യ പൊളിച്ചടുക്കി.
ഇന്ത്യൻ വ്യോമസേനയുടെ വ്യോമ മേധാവിത്വ ശേഷിയുടെ ആണിക്കല്ലായ ഫ്രഞ്ച് നിര്മിത മൾട്ടിറോൾ യുദ്ധവിമാനത്തിൽ ഒരു ഇന്ത്യൻ രാഷ്ട്രപതി പറക്കുന്നത് ഇതാദ്യമായാണ്. വ്യോമസേനാ മേധാവി എയർ ചീഫ് മാർഷൽ എ പി സിംഗ് രണ്ടാമത്തെ റാഫേൽ വിമാനത്തിൽ പറന്നുയർന്നു.
ഓപ്പറേഷൻ സിന്ദൂരിനിടെ പാകിസ്ഥാനുള്ളിലെ തീവ്രവാദ കേന്ദ്രങ്ങളിൽ അടുത്തിടെ നടത്തിയ വ്യോമാക്രമണങ്ങളിൽ അംബാല ആസ്ഥാനമായുള്ള റാഫേൽ വിമാനങ്ങൾ മുൻപന്തിയിലായിരുന്നു. ഓപ്പറേഷന്റെ രണ്ടാം ഘട്ടത്തിൽ ഇതേ റാഫേൽ സ്ക്വാഡ്രൺ പാകിസ്ഥാനിലെ സൈനിക കേന്ദ്രങ്ങളെയും ആക്രമിച്ചു.
