ഒരു പതിറ്റാണ്ടായി കഠിനാദ്ധ്വാനവും അഭിനയമികവും സൗന്ദര്യവും കൊണ്ട് സിനിമയില് തിളങ്ങി നില്ക്കുന്ന നയന്സിന് ലേഡി സൂപ്പര്സ്റ്റാര് പദവി വെറുതേ കിട്ടിയതല്ല. വൈവിദ്ധ്യമാര്ന്ന വേഷത്തിലൂടെ ഇപ്പോള് അവര് പ്രേക്ഷകരെ രസിപ്പിച്ചു കൊണ്ടിരിക്കുന്നു. നയന്സിന്റെ മുപ്പത്തൊമ്പതാം ജന്മദിനത്തില് ഏറ്റവുംപുതിയ ചിത്രം അന്നപൂരണിയുടെ ആദ്യ പാട്ട് അണിയറക്കാര് പുറത്തുവിട്ടിരിക്കുകയാണ്.
‘ഉലഗൈ വെള്ള പോഗിരാള്’ എന്ന് തുടങ്ങുന്ന ഗാനം സ്ത്രീകളുടെ പ്രതിരോധശേഷിയെക്കുറിച്ച് സംസാരിക്കുകയും ലോകത്തെ മുഴുവന് ഏറ്റെടുക്കാനുള്ള കരുത്ത് അവര്ക്കുണ്ടെന്ന് പരാമര്ശിക്കുകയും ചെയ്യുന്നു. സിനിമയില് നയന്താരയുടെ കഥാപാത്രത്തെക്കുറിച്ചാണ് ഗാനം സംസാരിക്കുന്നത്.
പെണ്കുട്ടികള് സ്വപ്നം കാണുക മാത്രമല്ല, അതിനെ പിന്തുടരണമെന്നും ലക്ഷ്യത്തിലേക്ക് നീങ്ങുമ്പോള് തടസ്സമായും നിരുത്സാഹപ്പെടുത്തുന്നതുമായ അനേകം ആളുകള്ക്കെതിരെ പോരാടുക എന്നും പറയുന്നു. തമന് എസ് ആണ് സംഗീതം പകര്ന്നിരിക്കുന്നത്. ഹരിണിയാണ് ഗാനം ആലപിച്ചിരിക്കുന്നത്. സിനിമയുടെ പ്രമേയത്തെക്കുറിച്ചും അവ്യക്തമായ ആശയം ഈ ഗാനം നല്കുന്നുണ്ട്.
നയന്താരയുടെ കരിയറിലെ എഴുപത്തഞ്ചാമത്തെ സിനിമയാണ് അന്നപൂര്ണി. നിലേഷ് കൃഷ്ണ സംവിധാനം ചെയ്യുന്ന ചിത്രത്തില് ജയ്, കാര്ത്തിക് കുമാര്, സത്യരാജ്, റെഡിന് കിംഗ്സ്ലി, കെഎസ് രവികുമാര് തുടങ്ങി നിരവധി താരങ്ങളും അണിനിരക്കുന്നു. ഒക്ടോബര് 24നാണ് ചിത്രത്തിന്റെ ടീസര് അണിയറപ്രവര്ത്തകര് പുറത്തുവിട്ടത്. ഒരു പരമ്പരാഗത ബ്രാഹ്മണ കുടുംബത്തിന്റെ കഥ പറയുന്ന സിനിമയുടെ പശ്ചാത്തലം ട്രിച്ചിയിലെ ശ്രീരംഗമാണ്. നയന്താരയുടെ കഥാപാത്രമായ പൂരണിക്ക് നോണ് വെജിറ്റേറിയന് വിഭവങ്ങളെ കുറിച്ച് കൂടുതലറിയാന് ആഗ്രഹിക്കുമ്പോഴാണ് കാര്യങ്ങള് വഴിമാറുന്നത്.
അന്നപൂരണി – ദ ഗോഡ്സ് ഓഫ് ഫുഡ് എന്ന ചിത്രത്തിന് പുറമെ നയന്താരയും രണ്ട് സിനിമകളാണ് വരാനിരിക്കുന്നത്. ഒന്ന്, ബിഗില് നടിക്കൊപ്പം ജയം രവി, മീര ജാസ്മിന്, സിദ്ധാര്ത്ഥ് എന്നിവരെ അവതരിപ്പിക്കുന്ന ടെസ്റ്റ്, അതുപോലെ തന്നെ യോഗി ബാബുവിനെ നായകനാക്കി മണ്ണങ്ങാട്ടി സിന്സ് 1960 എന്ന സിനിമ.