തിളങ്ങുന്ന ചര്‍മ്മം ആരും കൊതിയ്ക്കുന്ന ഒന്നാണ്. സൂര്യപ്രകാശം, അഴുക്ക്, മലിനീകരണം എന്നിവ നിങ്ങളുടെ ചര്‍മ്മത്തെ പ്രതികൂലമായി ബാധിക്കാറുണ്ട്. സമീകൃതാഹാരം, നല്ല ഉറക്കം, വെള്ളം കുടിക്കുക എന്നിവ നല്ല ചര്‍മ്മത്തിന് അവശ്യം വേണ്ട കാര്യങ്ങളാണെന്നാണ് വിദഗ്ദര്‍ പറയാറുള്ളത്. നന്നായി പരിപാലിക്കുന്നില്ലെങ്കില്‍ നിങ്ങളുടെ ചര്‍മ്മത്തെ പല കാര്യങ്ങളും വളരെ ദോഷകരമായി ബാധിക്കും. സാധാരണ സ്ത്രീകളാണ് ചര്‍മ്മ സംരക്ഷണത്തിന് പ്രാധാന്യം കൊടുക്കാറുള്ളത്. എന്നാല്‍ പുരുഷന്മാരും തങ്ങളുടെ ചര്‍മ്മ സംരക്ഷണത്തിന് പ്രാധാന്യം നല്‍കണം. പുരുഷന്മാര്‍ സൗന്ദര്യ സംരക്ഷണം നടത്തുന്നതിന്റെ പ്രാധാന്യത്തെ കുറിച്ച് മനസിലാക്കാം……
- മോയ്‌സ്ച്വറൈസ് ചെയ്യുക – സ്ത്രീ ആയാലും പുരുഷനായാലും ചര്‍മ്മം കൃത്യമായ രീതിയില്‍ മോയ്‌സ്ച്വറൈസ് ചെയ്ത് നിലനിര്‍ത്തേണ്ടത് അനിവാര്യമാണ്. ചര്‍മ്മം മോയ്‌സ്ച്വര്‍ ചെയ്യുമ്പോള്‍ അത് ചര്‍മ്മത്തെ വരണ്ട് പോകാതെ നല്ല ഫ്രഷ് ലുക്കില്‍ നിലനിര്‍ത്താന്‍ സഹായിക്കുന്നുണ്ട്. കൂടാതെ, ചര്‍മ്മത്തില്‍ ചുളിവുകള്‍ വീഴാതെ സംരക്ഷിക്കാനും ഇത് സഹായിക്കുന്നു. ചര്‍മ്മം മോയ്‌സ്ച്വര്‍ ചെയ്യുന്നതിനായി നിങ്ങള്‍ക്ക് ഇഷ്ടമുള്ള സെറം ഉപയോഗിക്കാം. അതുമല്ലെങ്കില്‍ കറ്റാര്‍വാഴ ഉപയോഗിക്കാവുന്നതാണ്. അതുമല്ലെങ്കില്‍ റോസ് വാട്ടര്‍, കുങ്കുമാദി തൈലം എന്നിവയെല്ലാം ഉപയോഗിക്കാവുന്നതാണ്. ദിവസേന എന്നോണം ചര്‍മ്മം മോയ്‌സ്ച്വറൈസ് ചെയ്ത് നിലനിര്‍ത്താന്‍ മറക്കരുത്.
- ഫേയ്‌സ്പാക്ക് – പുരുഷന്മാര്‍ക്കും ഫേയ്‌സ്പാക്ക് ഉപയോഗിക്കാം. നിങ്ങളുടെ ചര്‍മ്മത്തിന് ചേരുന്ന വിധത്തിലുള്ള ഫേയ്‌സ്പാക്ക് ഉപയോഗിക്കാവുന്നതാണ്. ഇത് നിങ്ങളുടെ സ്വാഭാവിക നിറം നിലനിര്‍ത്താനും അതുപോലെ തന്നെ മൃതകോശങ്ങള്‍ നീക്കം ചെയ്ത് ചര്‍മ്മത്തിനെ യുവത്വമുള്ളതാക്കി നിലനിര്‍ത്താനും സഹായിക്കുന്നുണ്ട്. അതിനാല്‍, നല്ല നാച്വറല്‍ ഫേയ്‌സ്പാക്ക്‌സ് ഉപയോഗിക്കാം. വീട്ടില്‍ തന്നെ തയ്യാറാക്കിയ ഫേയ്‌സ്പാക്ക്‌സ് ഉപയോഗിക്കുന്നതാണ് നല്ലത്. ഇത് ചര്‍മ്മത്തിന്റെ ആരോഗ്യം കാക്കാന്‍ സഹായിക്കും. അതിന്റെ കൂടെ നല്ല ഹെല്‍ത്തി ഡയറ്റും ഫോളോ ചെയ്താന്‍ നല്ല സ്‌കിന്‍ ഏത് പുരുഷനും സ്വന്തമാക്കാന്‍ സാധിക്കുന്നതാണ്.
- ക്ലെന്‍സ് ചെയ്യണം – ചര്‍മ്മ സംരക്ഷണത്തില്‍ ഏറ്റവും പ്രധാന്യമര്‍ഹിക്കുന്ന ഒരു കാര്യമാണ് ക്ലെന്‍സിംഗ്. കൃത്യമായി ദിവസേന രണ്ട് നേരം ചര്‍മ്മം ക്ലെന്‍സ് ചെയ്താല്‍, അത് ചര്‍മ്മത്തില്‍ നിന്നും അമിതമായിട്ടുള്ള എണ്ണമയം നീക്കം ചെയ്യാന്‍ സഹായിക്കുന്നുണ്ട്. അതുപോലെ, ചര്‍മ്മത്തില്‍ അന്നേ ദിവസം അടിഞ്ഞ് കൂടിയിരിക്കുന്ന അഴുക്ക് നീക്കം ചെയ്യാനും മുഖക്കുരു പോലെയുള്ള ചര്‍മ്മ പ്രശ്‌നങ്ങള്‍ കുറയ്ക്കാനും ഇത് സഹായിക്കുന്നു. ചര്‍മ്മത്തില്‍ നിന്നും മൃതകോശങ്ങള്‍ നീക്കം ചെയ്യാനും ഇത് സഹായിക്കുന്നുണ്ട്. ചര്‍മ്മത്തെ നല്ലപോലെ ഹൈഡ്രേറ്റ് ചെയ്ത് നലനിര്‍ത്താനും ചര്‍മ്മത്തില്‍ നിന്നും പൗഡര്‍ എന്നിവയുടെ അംശങ്ങള്‍ പൂര്‍ണ്ണമായും നീക്കം ചെയ്ത് ചര്‍മ്മത്തെ ശുദ്ധീകരിക്കാന്‍ ക്ലെന്‍സിംഗ് സഹായിക്കുന്നു. ഇത് ചര്‍മ്മം നല്ല ആരോഗ്യത്തോടെ ഇരിക്കാന്‍ സഹായിക്കും.
- താടിയും മീശയും – താടിയും മീശയും ഇടയ്ക്ക് കട്ടി കുറച്ച് നിര്‍ത്തുന്നത് താടിയ്ക്കും അതുപോലെ മീശയ്ക്കും ഉള്ളില്‍ യീസ്റ്റ് ഇന്‍ഫക്ഷന്‍ പെരുകുന്നത് തടയാന്‍ സഹായിക്കുന്നുണ്ട്. താടിയ്ക്കുള്ളില്‍ യീസ്റ്റ് ഇന്‍ഫക്ഷന്‍ വരുന്നത് ചര്‍മ്മത്തില്‍ താരന്‍ പോലെയുള്ള പ്രശ്‌നങ്ങള്‍ വരുന്നതിന് കാരണമാണ്. ഇത് ചര്‍മ്മത്തില്‍ ചൊറിച്ചില്‍ ഉണ്ടാക്കുന്നു. അതുപോലെ, ചര്‍മ്മത്തില്‍ കുരുക്കള്‍ വരാനും ഇത് കാരണമാണ്. അതിനാല്‍, താടി കൃത്യമായി ഷേവ് ചെയ്ത് നിലനിര്‍ത്തുക. കൂടാതെ, ആഫ്റ്റര്‍ ഷേവ് ബാം ഉപയോഗിക്കാനും മറക്കരുത്. ഇത് ചര്‍മ്മം ചുവക്കുന്നത് തടയാനും, ചൊറിച്ചില്‍ വരാതിരിക്കാനും അതുപോലെ, മുഖത്ത് കുരുക്കള്‍ വരാതെ സംരക്ഷിക്കാനും ചര്‍മ്മം വരണ്ട് പോകാതെ സംരക്ഷിക്കാനും സഹായിക്കുന്നു. അതിനാല്‍, താടിയും മീശയും കൃത്യമായി സംരക്ഷിക്കണം.
- സണ്‍സ്‌ക്രീന്‍ – എല്ലാവരും മറക്കാതെ ഉപയോഗിക്കേണ്ട ഒരു ബ്യൂട്ടി പ്രോഡക്ട് ആണ് സണ്‍സ്‌ക്രീന്‍. നമ്മളുടെ ചര്‍മ്മത്തില്‍ കരുവാളിപ്പ് വീഴാതിരിക്കാനും ചുഴിവുകള്‍ വീണ് ചര്‍മ്മത്തില്‍ പ്രായം തോന്നിപ്പിക്കാതിരിക്കാനും സണ്‍സ്‌ക്രീന്‍ സഹായിക്കുന്നുണ്ട്. അതുപോലെ തന്നെ ചര്‍മ്മത്തില്‍ ഉണ്ടാകുന്ന നിറവ്യത്യാസങ്ങള്‍ ഇല്ലാതാക്കാനും സണ്‍സ്‌ക്രീന്‍ ഉപയോഗം നല്ലതാണ്. അതിനാല്‍, ഒരു ദിവസത്തില്‍ കുറഞ്ഞത് 3 നേരമെങ്കിലും സണ്‍സ്‌ക്രീന്‍ ഉപയോഗിക്കാന്‍ നിങ്ങള്‍ ശ്രദ്ധിക്കണം. അതുപോലെ എസ്പിഎഫ് 30 ഉള്ള സണ്‍സ്‌ക്രീന്‍ പതിവാക്കുന്നതാണ് നല്ലത്. പുരുഷന്മാര്‍ക്ക് മുഖത്തും അതുപോലെ, കഴുത്തിലും, കൈകളിലും സണ്‍സ്‌ക്രീന്‍ പുരട്ടാവുന്നതാണ്.
