ഡല്‍ഹിയിലെ ചാണക്യപുരി പ്രദേശത്ത് സ്ഥിതി ചെയ്യുന്ന ‘മാല്‍ച മഹല്‍’ നിലവില്‍ ഡല്‍ഹി സര്‍ക്കാരിന്റെ പുരാവസ്തു വകുപ്പിന്റെ അധികാരത്തിലുള്ള കെട്ടിടമാണ്. 1325-ല്‍ ഫിറോസ് ഷാ തുഗ്ലക്കിന്റെ ഭരണകാലത്ത് നിര്‍മ്മിച്ച ഈ മഹത്തായ കെട്ടിടം ഡല്‍ഹിയുടെ സമ്പന്നമായ ചരിത്രത്തിന്റെ ആകര്‍ഷകവും എന്നാല്‍ വിചിത്രവുമായ പ്രതീകമായിട്ടാണ് നിലനില്‍ക്കുന്നത്.
നിഗൂഢതയും രാജകീയ പാരമ്പര്യവും നിറഞ്ഞ ഒരു ചരിത്ര നിര്‍മിതി, പക്ഷേ ഇന്ന് പ്രേതവേട്ടക്കാര്‍ക്കും വിനോദസഞ്ചാരികള്‍ക്കും പ്രിയ സ്ഥലമായി മാറിയിരിക്കുന്നു. സന്ദര്‍ശകര്‍ പലപ്പോഴും കെട്ടിടത്തിലെ വിചിത്രമായ അന്തരീക്ഷവും തകര്‍ന്ന മതിലുകള്‍ക്കുള്ളില്‍ അസാധാരണ സംഭവങ്ങളും റിപ്പോര്‍ട്ട് ചെയ്യുന്നു. ബീഗം വിലായത്തിന്റെയും അവളുടെ കുടുംബത്തിന്റെയും ആത്മാക്കള്‍ ഇവിടെ വസിക്കുന്നെന്നാണ് ആളുകളുടെ വിശ്വാസം. കെട്ടിടത്തിന്റെ അവശിഷ്ടങ്ങള്‍ പര്യവേക്ഷണം ചെയ്യാന്‍ എത്തുന്നവരെ ആകര്‍ഷിക്കുന്ന അന്തരീക്ഷവു ഇവിടെയുണ്ട്. മഹല്ലില്‍ അനധികൃതമായി കയറുന്നവരെ വെടിവെച്ചു കൊല്ലുമെന്ന മുന്നറിയിപ്പ് ഇതിന്റെ നിഗൂഡത കൂട്ടുന്നു.
2017ല്‍ അലി റാസ രാജകുമാരന്‍ അന്തരിച്ചതു മുതല്‍ മല്‍ച മഹല്‍ ഒഴിഞ്ഞുകിടക്കുകയാണ്. തുടര്‍ന്ന് ചുറ്റുപാടുമുള്ള പ്രദേശങ്ങളില്‍ നിന്നുള്ള സന്ദര്‍ശകരുടെ എണ്ണം വര്‍ധിച്ചു: വിദേശ വിനോദസഞ്ചാരികള്‍, പത്രപ്രവര്‍ത്തകര്‍, പ്രാദേശിക ആളുകള്‍, പ്രേതവേട്ടക്കാര്‍ തുടങ്ങിയവര്‍ കൗതുകങ്ങളുടെ അസാധാരണമായ അനുഭവങ്ങള്‍ തേടുന്നു.
കൊളോണിയല്‍, പോസ്റ്റ്-കൊളോണിയല്‍ ശക്തികള്‍ക്കെതിരായ ബീഗം വിലായത്ത് മഹലിന്റെ ജീവിതവും പോരാട്ടങ്ങളും നിറഞ്ഞ ഇന്ത്യയുടെ ചരിത്രത്തിലെ ഉഗ്രമായ ഒരു അദ്ധ്യായമാണ് ഈ തകര്‍ന്ന കെട്ടിടം. വേട്ടയാടാന്‍ എത്തുന്ന തുഗ്ലക്ക് ഭരണാധികാരികളുടെ വിശ്രമകേന്ദ്രമായാണ് ആദ്യം
ഇത് നിര്‍മ്മിച്ചത്. വാസ്തുവിദ്യാ ശൈലികൊണ്ട് തുഗ്ലക്ക് രാജവംശത്തിന്റെ മഹത്വത്തെ പ്രതിഫലിപ്പിക്കുന്ന കെട്ടിടം സങ്കീര്‍ണ്ണമായ മണല്‍ക്കല്ല് കൊത്തുപണികളും ആ കാലഘട്ടത്തിന്റെ കരകൗശലത്തെക്കുറിച്ച് സംസാരിക്കുന്ന കമാന രൂപകല്പനകളും ഉള്‍ക്കൊള്ളുന്നവയാണ്.
അവധിലെ അവസാന നവാബായിരുന്ന വാജിദ് അലി ഷായുടെ വംശപരമ്പരയാണെന്ന് അവകാശപ്പെട്ടായിരുന്നു ബീഗം വിലായത്ത് മഹല്‍ രംഗപ്രവേശനം നടത്തിയത്. 1856-ല്‍ ബ്രിട്ടീഷുകാര്‍ അവധ് പിടിച്ചടക്കിയതിനെത്തുടര്‍ന്ന്, രാജകുടുംബത്തിന് നാടുകടത്തലും അവരുടെ പൂര്‍വ്വിക സ്വത്തുക്കള്‍ നഷ്ടപ്പെടുന്നതും ഉള്‍പ്പെടെ പ്രത്യാഘാതങ്ങള്‍ നേരിടേണ്ടിവന്നു. സ്വാതന്ത്ര്യാനന്തര ഇന്ത്യയില്‍, ബീഗം വിലായത്ത് അംഗീകാരത്തിനും പുനഃസ്ഥാപനത്തിനും വേണ്ടി പോരാടി. ഒടുവില്‍ 1985 മെയ് 28 ന്, മാധ്യമശ്രദ്ധ നേടിയ വര്‍ഷങ്ങളോളം നീണ്ട ജനകീയ പ്രതിഷേധങ്ങള്‍ക്കു ശേഷം, ഇന്ത്യന്‍ ഗവണ്‍മെന്റ് ബീഗം വിലായത്തിനും മക്കള്‍ക്കും ഉടമസ്ഥാവകാശം അനുവദിച്ചു.
ബീഗം വിലായത്തിന്റെ കഥ നാടകീയതയും ദുരന്തവും നിറഞ്ഞതാണ്. വാജിദ് അലി ഷായുടെ വംശപരമ്പരയുമായി അവള്‍ക്ക് ബന്ധമില്ലായിരുന്നുവെന്ന് അന്വേഷണ റിപ്പോര്‍ട്ടുകള്‍ പിന്നീട് വെളിപ്പെടുത്തി. പകരം, അവള്‍ ഒരു മുന്‍ യൂണിവേഴ്‌സിറ്റി രജിസ്ട്രാറുടെ വിധവയായിരുന്നത്രേ. ആരോപണം കൂടിയതോടെ 1993 സെപ്റ്റംബര്‍ 10-ന് ബീഗം വജ്രങ്ങള്‍ കഴിച്ച് ആത്മഹത്യ ചെയ്തു. അവളുടെ മകന്‍, അലി റാസ രാജകുമാരന്‍, 2017 സെപ്തംബര്‍ 2-ന് മരിക്കുന്നത് വരെ മല്‍ച മഹലില്‍ താമസിച്ചു. കുടുംബത്തിന്റെ പോരാട്ടങ്ങള്‍ മല്‍ച മഹലിനെ ഇന്ത്യയുടെ സങ്കീര്‍ണ്ണമായ രാജകീയ ഭൂതകാലത്തെ ഓര്‍മ്മിപ്പിക്കുന്ന ഒരു ഓര്‍മ്മപ്പെടുത്തലാക്കി മാറ്റിയിരിക്കുകയാണ്.
