ന്യൂയോര്‍ക്ക്: ഡ്രസ് കോഡ് ലംഘനത്തിന് ശിക്ഷിക്കപ്പെട്ടതിനെത്തുടര്‍ന്ന് ഡിഫന്‍ഡിംഗ് വേള്‍ഡ് റാപ്പിഡ്, ബ്ലിറ്റ്‌സ് ചാമ്പ്യന്‍ മാഗ്നസ് കാള്‍സണ്‍ ലോക റാപ്പിഡ് ചെസ്സ് ചാമ്പ്യന്‍ഷിപ്പ് ഉപേക്ഷിച്ചു. ജീന്‍സ് ധരിച്ച് ഫിഡെയുടെ കര്‍ശനമായ ഡ്രസ് കോഡ് ലംഘിച്ചതിന് നോര്‍വീജിയന്‍ ചെസ്സ് ഐക്കണിനെ റാപ്പിഡ് വിഭാഗത്തിന്റെ 9-ാം റൗണ്ടില്‍ പങ്കെടുക്കുന്നതില്‍ ഫിഡെ തടഞ്ഞിരുന്നു. പിന്നാലെ താന്‍ ലോകചാമ്പ്യന്‍ഷിപ്പ് തന്നെ ഉപേക്ഷിക്കുകയാണെന്ന് മാഗ്നസ് കാള്‍സണ്‍ വ്യക്തമാക്കുകയും ചെയ്തു.
ഡ്രസ് കോഡ് പാലിക്കാന്‍ വിസമ്മതിച്ചതിനെ തുടര്‍ന്ന് കാള്‍സണെ അയോഗ്യനാക്കുകയും 200 ഡോളര്‍ പിഴയിടുകയും ചെയ്തിരുന്നു. കാള്‍സന്റെ ആവര്‍ത്തിച്ചുള്ള ലംഘനം ചൂണ്ടിക്കാട്ടി ചീഫ് ആര്‍ബിറ്റര്‍ അലക്‌സ് ഹോളോവ്‌സാക്ക് ആണ് തീരുമാനം എടുത്തത്. ഇതോടെ ചാംപ്യന്‍ കൂടിയായ കാള്‍സണ്‍ ചാമ്പ്യന്‍ഷിപ്പിന്റെ ബ്ലിറ്റ്‌സ് വിഭാഗത്തില്‍ താന്‍ പങ്കെടുക്കില്ലെന്ന് പ്രഖ്യാപിച്ചു. ”ഞാന്‍ നാളെ വസ്ത്രം മാറാമെന്ന് പറഞ്ഞു, പക്ഷേ ഇപ്പോള്‍ മാറണമെന്ന് അവര്‍ ശഠിച്ചു. അതോടെ എനിക്കും വാശിയായി. സത്യസന്ധമായി, എനിക്ക് പ്രായമായി. ഈ സമയത്ത്, അവര്‍ ചെയ്യേണ്ടത് ഇതാണ് എങ്കില്‍, കാലാവസ്ഥ അല്‍പ്പം സുഖമുള്ളിടത്തേക്ക് ഞാന്‍ പോകും.” തുടര്‍ന്നുള്ള അഭിമുഖത്തില്‍ പറഞ്ഞു.
”ഡ്രസ് കോഡ് ഉള്‍പ്പെടെ ലോക റാപ്പിഡ്, ബ്ലിറ്റ്‌സ് ചെസ്സ് ചാമ്പ്യന്‍ഷിപ്പുകള്‍ക്കുള്ള ഫിഡെ നിയന്ത്രണങ്ങള്‍ എല്ലാ പങ്കാളികള്‍ക്കും പ്രൊഫഷണലിസവും നീതിയും ഉറപ്പാക്കാന്‍ രൂപകല്‍പ്പന ചെയ്ത് ഉള്ളതാണ്. ഇന്ന്, മിസ്റ്റര്‍ മാഗ്നസ് കാള്‍സണ്‍ ജീന്‍സ് ധരിച്ച് ഡ്രസ് കോഡ് ലംഘിച്ചു, ഈ ഇവന്റിന് ദീര്‍ഘകാല നിയന്ത്രണങ്ങള്‍ പ്രകാരം ലംഘനത്തെക്കുറിച്ച് ചീഫ് ആര്‍ബിറ്റര്‍ കാള്‍സനെ അറിയിക്കുകയും 200 ഡോളര്‍ പിഴ ചുമത്തുകയും അദ്ദേഹത്തോട് വസ്ത്രം മാറ്റാന്‍ അഭ്യര്‍ത്ഥിക്കുകയും ചെയ്തു. നിര്‍ഭാഗ്യവശാല്‍ അദ്ദേഹം അത് ചെയ്യാന്‍ സമ്മതിച്ചില്ല.” പിന്നാലെ തീരുമാനം വിശദീകരിച്ചുകൊണ്ട് ഫിഡെയും പ്രസ്താവന പുറപ്പെടുവിച്ചു.
സ്പോര്‍ട്സ് ഷൂ ധരിച്ചതിന്റെ പേരില്‍ മറ്റൊരു ഉയര്‍ന്ന കളിക്കാരനായ ഇയാന്‍ നെപോംനിയാച്ചിക്ക് സമാനമായ സാഹചര്യം നേരത്തെ നേരിട്ടതായും പ്രസ്താവനയില്‍ പറയുന്നു. എന്നിരുന്നാലും നെപോംനിയാച്ചി ചട്ടങ്ങള്‍ പാലിച്ചു, അംഗീകൃത വസ്ത്രത്തിലേക്ക് മാറി, ടൂര്‍ണമെന്റില്‍ തുടര്‍ന്നു. ഡ്രസ് കോഡ് ഉള്‍പ്പെടെയുള്ള ചട്ടങ്ങള്‍ ഫിഡെ അത്ലറ്റ്സ് കമ്മീഷനിലെ അംഗങ്ങളാണ് തയ്യാറാക്കുന്നത്. പ്രൊഫഷണല്‍ കളിക്കാരും വിദഗ്ധരും ചേര്‍ന്നതാണ് ഈ നിയമങ്ങള്‍ കൊണ്ടുവന്നിട്ടുള്ളത്.
