പുതുമുഖമായി സിനിമയില്‍ വന്നപ്പോള്‍ ഒരു താരം തന്നോട് മോശമായി പെരുമാറിയിട്ടുണ്ടെന്നും അതിന് താന്‍ തക്കതായ മറുപടി കൊടുത്തെന്നും നടിയും രാഷ്ട്രീയക്കാരിയുമായ കുശ്ബു. ഗോവയില്‍ നടക്കുന്ന ഇന്റര്‍നാഷണല്‍ ഫിലിം ഫെസ്റ്റിവല്‍ ഓഫ് ഇന്ത്യ 2024ല്‍ സിനിമയിലെ സ്ത്രീ സുരക്ഷയെക്കുറിച്ചുള്ള മാസ്റ്റര്‍ ക്ലാസിന്റെ ഭാഗമായി സംസാരിക്കുകയായിരുന്നു.
സ്ത്രീകള്‍ അഭിമുഖീകരിക്കുന്ന വെല്ലുവിളികളെക്കുറിച്ച് സംസാരിക്കുമ്പോള്‍, ഗുല്‍ട്ടെ പോസ്റ്റ് ചെയ്ത ഒരു ക്ലിപ്പില്‍, സെറ്റില്‍ താന്‍ ഇരയായതിന്റെ ഒരു ഉദാഹരണം നടി വ്യക്തമാക്കി. ”ആരെങ്കിലും നിങ്ങളോട് മോശമായി പെരുമാറുമ്പോള്‍ അവരോട് അപ്പോള്‍ തന്നെ മറുപടി പറയുക.” നടി പറഞ്ഞു. സിനിമാ മേഖലയില്‍ സ്ത്രീകള്‍ നേരിടുന്ന വെല്ലുവിളികളെ കുറിച്ച് ചോദിച്ചപ്പോള്‍ ഖുശ്ബു മറുപടി പറഞ്ഞു.
”സിനിമയില്‍ മാത്രമല്ല എല്ലായിടത്തും സ്ത്രീകള്‍ വെല്ലുവിളികള്‍ നേരിടുന്നു. ഷെയര്‍ ഓട്ടോയിലോ ലോക്കല്‍ ട്രെയിനിലോ വിമാനത്തിലോ യാത്ര ചെയ്യുമ്പോള്‍ നിങ്ങള്‍ അത് അഭിമുഖീകരിക്കുന്നു. അത് സിനിമാ മേഖലയില്‍ എല്ലായിടത്തും ഉണ്ട്. എന്നാല്‍ ആരെങ്കിലും മോശമായി പെരുമാറുന്നുവെന്ന് തോന്നുമ്പോഴെല്ലാം സംസാരിക്കാന്‍ ഞാന്‍ സ്ത്രീകളോട് ആവശ്യപ്പെടാന്‍ ആഗ്രഹിക്കുന്നു. അവിടെ ശബ്ദം ഉയര്‍ത്തി സംസാരിക്കുക. നിങ്ങളുടെ കരിയറിനെക്കുറിച്ചും പ്രശ്നങ്ങളെക്കുറിച്ചും ചിന്തിക്കരുത്.
താന്‍ പുതുമുഖമായിരുന്നപ്പോള്‍ ഒരു നായക നടന്‍ തന്നോട് അഭ്യര്‍ത്ഥിച്ച ഒരു സന്ദര്‍ഭവും അവര്‍ വിവരിച്ചു. ”ആരും അറിയില്ല. എനിക്കൊരു അവസരം തരുമോ?” അയാള്‍ ചോദിച്ചു. ഞാന്‍ ഉടനെ എന്റെ ചപ്പല്‍ ഉയര്‍ത്തി പിടിച്ചുകൊണ്ട് പറഞ്ഞു. ”ഞാന്‍ 41 സൈസ് ചപ്പലാണ് ധരിക്കുന്നത്. അടി നിങ്ങള്‍ക്ക് ഇവിടെ വേണോ? അതോ യൂണിറ്റിന്റെ മുന്നിലിട്ടു വേണോ? ഒരു പുതുമുഖമാണെന്നൊന്നും ഞാന്‍ ചിന്തിച്ചില്ല. എന്റെ കരിയറിന് എന്ത് സംഭവിക്കും? എന്നൊന്നും ഞാന്‍ നോക്കിയില്ല. എന്തിനേക്കാളും ആത്മാഭിമാനം പ്രധാനമാണെന്ന് എനിക്കറിയാമായിരുന്നു. നിങ്ങള്‍ സ്വയം ബഹുമാനിക്കേണ്ടതുണ്ട്, അപ്പോള്‍ മാത്രമേ മറ്റൊരാള്‍ നിങ്ങളെ ബഹുമാനിക്കുകയുള്ളൂ.” നടി പറഞ്ഞു.
