ഇന്ത്യയിലെ ഏറ്റവും സങ്കീര്‍ണ്ണവും വെല്ലുവിളി നിറഞ്ഞതുമായ ഭൂഗര്‍ഭ മെട്രോ ആദ്യയാത്രയ്ക്കൊരുങ്ങുന്നു. 33.5 കിലോമീറ്റര്‍ നീളമുള്ള പദ്ധതിയായ മുംബൈ മെട്രോ ലൈന്‍-3 സെപ്റ്റംബര്‍ അവസാനത്തോടെ പ്രവര്‍ത്തനം ആരംഭിക്കും.
അക്വാ ലൈന്‍ അല്ലെങ്കില്‍ കൊളാബ-ബാന്ദ്ര-സീപ്‌സ് ലൈന്‍ എന്നും അറിയപ്പെടുന്ന ഈ പദ്ധതി നരിമാന്‍ പോയിന്റ്, ഫോര്‍ട്ട്, ബികെസി, എസ്ഇഇപിഇസഡ്, എംഐഡിസി തുടങ്ങിയ പ്രധാന ബിസിനസ്സ്, വാണിജ്യ, വിനോദ കേന്ദ്രങ്ങളെ ബന്ധിപ്പിക്കും.
ആരേ കോളനിക്കും ബികെസിക്കും ഇടയിലുള്ള ആരെ കാര്‍ഷെഡ്, ആരേ സ്റ്റേഷന്‍ എന്നിവ ഉള്‍പ്പെടുന്ന ആദ്യ ഘട്ടം ഈ മാസം അവസാനത്തോടെ പ്രവര്‍ത്തനക്ഷമമാകുമെന്ന് പ്രതീക്ഷിക്കുന്നു. കൊളാബ വരെയുള്ള രണ്ടാം ഘട്ടം 2025-ല്‍ പൂര്‍ത്തിയാകും. പൂര്‍ണ്ണമായി പ്രവര്‍ത്തനക്ഷമമായാല്‍, മെട്രോ ലൈന്‍-3 പ്രതിദിനം 1.7 ദശലക്ഷം യാത്രക്കാര്‍ക്ക് സേവനം നല്‍കും, ട്രെയിനുകള്‍ 3 മുതല്‍ 4 മിനിറ്റ് വരെ ഇടവിട്ട് ഓടുന്നു, ഒരേ സമയം 2,500 യാത്രക്കാരെ ഉള്‍ക്കൊള്ളാന്‍ കഴിയും.
മുംബൈ മെട്രോ റെയില്‍ കോര്‍പ്പറേഷന്‍ ലിമിറ്റഡിന്റെ (എംഎംആര്‍സിഎല്‍) മേല്‍നോട്ടത്തില്‍ നടക്കുന്ന പദ്ധതിക്ക് ഏകദേശം 38,000 കോടി രൂപ ചെലവ് വരുമെന്നാണ് കണക്കാക്കുന്നത്. പൂര്‍ത്തിയാകുമ്പോള്‍ ഒരു മണിക്കൂറിനുള്ളില്‍ കൊളാബയ്ക്കും സീപ്സിനും ഇടയില്‍ തടസ്സമില്ലാത്ത യാത്ര മെട്രോ നല്‍കും.
ഛത്രപതി ശിവജി മഹാരാജ് ടെര്‍മിനസ്, ചര്‍ച്ച്ഗേറ്റ്, ദാദര്‍ തുടങ്ങിയ പ്രധാന സ്ഥലങ്ങള്‍ക്ക് സമീപമുള്ള സ്റ്റേഷനുകള്‍ നഗരത്തിലുടനീളമുള്ള കണക്റ്റിവിറ്റി വര്‍ദ്ധിപ്പിക്കും. 30-ലധികം വിദ്യാഭ്യാസ സ്ഥാപനങ്ങള്‍, 13 ആശുപത്രികള്‍, 14 ആരാധനാലയങ്ങള്‍, 30-ലധികം വിനോദ കേന്ദ്രങ്ങള്‍ എന്നിവയിലേക്കുള്ള യാത്ര മെട്രോ മെച്ചപ്പെടുത്തും.
കല്‍ബാദേവി, ഗിര്‍ഗാം, വര്‍ളി, ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളം തുടങ്ങിയ പ്രദേശങ്ങളെ ബന്ധിപ്പിക്കുന്ന പാതയായി ഇത് മാറും. മെട്രോ ലൈനുകള്‍, മോണോ റെയില്‍, സബര്‍ബന്‍ റെയില്‍വേ, സ്റ്റേറ്റ് ബസ് സര്‍വീസുകള്‍ എന്നിവയുള്‍പ്പെടെയുള്ള മറ്റ് ഗതാഗത സംവിധാനങ്ങളുമായി പുതിയ മെട്രോ ലൈന്‍ സംയോജിപ്പിക്കും. കൂടാതെ നഗരത്തിലെ സബര്‍ബന്‍ റെയില്‍വേ ശൃംഖലയിലെ തിരക്ക് 15% കുറയ്ക്കുമെന്ന് പ്രതീക്ഷിക്കുന്നു.
