രാവിലെ എഴുന്നേല്‍ക്കുമ്പോള്‍ തന്നെ തുമ്മുന്ന ചില ആളുകളുണ്ട്. ഒന്നും ചെയ്യാതെ തന്നെ കുറച്ച് നേരം കഴിയുമ്പോള്‍ തുമ്മല്‍ മാറാറുണ്ട്. എന്നാല്‍ ചിലരില്‍ 15 മിനിറ്റ് മുതല്‍ ഇത് നീണ്ടുനില്‍ക്കാറുണ്ട്. നീണ്ട് നില്‍ക്കുന്ന ഈ തുമ്മല്‍ അത്ര നിസാരക്കാരനല്ല. പലതരം ആരോഗ്യ പ്രശ്‌നത്തിലേക്കും ഇത് വഴിവെക്കും. തുമ്മല്‍ കൂടുന്നത് ശ്വാസകോശത്തില്‍ നീര്‍ക്കെട്ട് ഉണ്ടാകുന്നതിന് കാരണമാകുന്നു. തുമ്മല്‍ അകറ്റാനായി ചില പൊടികൈക്കള്‍ നമ്മുടെ വീട്ടില്‍ തന്നെ പരീക്ഷിക്കാവുന്നതാണ്.
കിടക്ക വിരികളും തലയിണയുറകളും മാസത്തിലൊരിക്കല്‍ ചൂടുവെള്ളത്തില്‍ കഴുകണം. പൊടി കാരണമുള്ള തുമ്മല്‍ മാറാനായി ഇത് സഹായിക്കും. റൂമിലെ ഫാനിലെ പൊടികള്‍ നിശ്ചിത ഇടവേളകളില്‍ തുടയ്ക്കുക. ഇതിലെ ഫംഗസും തുമ്മലിന് കാരണമാകാം. ഏതെങ്കിലും തരത്തിലുള്ള ഭക്ഷണം കഴിച്ച ശേഷം തുമ്മല്‍ ഉണ്ടായാല്‍ അത്തരത്തിലുള്ള ഭക്ഷണം ഒഴിവാക്കണം.
പുതിനയുടെ നീരും ഒരു നുള്ള് കുരുമുളകും കുറച്ച് തേനും ചേര്‍ത്ത് കഴിച്ചാല്‍ തുമ്മല്‍ കുറയും. രണ്ട് ടീസ്പൂണ്‍ തേനില്‍ കുറച്ച് നാരാങ്ങാനീര് ചേര്‍ത്ത് കഴിക്കുന്നത് രാവിലെയുള്ള തുമ്മല്‍ കുറയ്ക്കുന്നതിന് സഹായിക്കും. ധാരാളം വെള്ളം കുടിക്കണം. 15 ഗ്ലാസ് വെള്ളമെങ്കിലും കുടിക്കണം. മഞ്ഞളും തേനും ചേര്‍ത്ത് പതിവായി കഴിക്കുന്നത് അലര്‍ജി കുറയ്ക്കാനായി സഹായിക്കും.
തുമ്മല്‍ വന്നാല്‍ തുമ്മാതെ പിടിച്ചുവെക്കുന്ന സ്വഭാവം നല്ലതല്ല.ചിലര്‍ ചെറിയ തുമ്മല്‍ വന്നാലും സിട്രിസിന്‍ കഴിക്കുന്നവരാണ്. അലര്‍ജിയുടെ ലക്ഷണങ്ങളെ പ്രതിരോധിക്കാനുള്ള മരുന്നാണിത്. തുമ്മല്‍ മൂക്കൊലിപ്പ്, ജലദോഷം തൊണ്ട ചെറിയല്‍ എന്നിവയില്‍ നിന്ന് ആശ്വാസം നല്‍കാനായി ഇതിന് സാധിക്കും. ഡോക്ടറുടെ നിര്‍ദേശമില്ലാതെ സിട്രിസിന്‍ ഫാര്‍മസിയില്‍ നിന്ന് വാങ്ങി കഴിക്കുന്നവരുണ്ട്. ഇത് ഒരു പരിധിയില്‍ അധികം കഴിച്ചാല്‍ ഫലപ്രദമല്ലാതെ വരുന്ന അവസ്ഥയുള്ളവരും ധാരാളമാണ്. സുരക്ഷിതമെന്ന് കരുതുന്ന സിട്രിസിന്‍ വില്ലനാകാനുള്ള സാധ്യതയേറെയാണ്. 24 മണിക്കൂറിനിടെ 10 മില്ലിഗ്രാമില്‍
കൂടുതല്‍ സിട്രിസിന്‍ കഴിക്കാന്‍ പാടില്ല. മരുന്ന് എങ്ങനെയാണ് ശരീരത്തെ ബാധിക്കുന്നതെന്നറിയാന്‍ ആദ്യ ഡോസ് കഴിച്ചതിന് ശേഷം പൂര്‍ണമായും വിശ്രമിക്കുക.
