ലോകമെമ്പാടുമുള്ള ദശലക്ഷക്കണക്കിന് ആളുകളെ ബാധിക്കുന്ന മാനസിക സമ്മര്‍ദ്ദം ഇന്ന് ഒരു പ്രധാന വെല്ലുവിളികളായി മാറിയിരിക്കുകയാണ് . ഇവ നമ്മുടെ മാനസികവും വൈകാരികവുമായ ആരോഗ്യത്തെ നിശബ്ദമായി നശിപ്പിക്കുന്നുണ്ട്.
ഹൃദയവും മനസ്സും പരസ്പരം ബന്ധപ്പെട്ടിരിക്കുന്നുവെന്ന് ശാസ്ത്രം പറയുന്നു. ഈ ‘മനസ്-ഹൃദയ ബന്ധം’ സമ്മര്‍ദ്ദം പ്രോസസ്സ് ചെയ്യുന്നതിലും വികാരങ്ങളെ നിയന്ത്രിക്കുന്നതിലും നിര്‍ണായകമാണ്. ഉദാഹരണത്തിന്, ഞരമ്പുകളുടെയും ഹോര്‍മോണുകളുടെയും സങ്കീര്‍ണ്ണ ശൃംഖലകളിലൂടെ ഹൃദയം തലച്ചോറുമായി ആശയവിനിമയം നടത്തുന്നു. ഇത് നമ്മുടെ മാനസികാവസ്ഥയെയും ശ്രദ്ധയെയും മൊത്തത്തിലുള്ള ശാന്തതയെയും സ്വാധീനിക്കുന്നു.
ഹൃദയം കേന്ദ്രീകരിച്ചുള്ള ശ്വസനം സ്‌ട്രെസ് ഹോര്‍മോണായ കോര്‍ട്ടിസോളിന്റെ അളവ് കുറയ്ക്കുന്നു. ഇതു സമ്മര്‍ദ്ദത്തിന്റെ നിമിഷങ്ങളില്‍ ശാന്തത നല്‍കുകയും കാലക്രമേണ പ്രതിരോധം ശക്തിപ്പെടുത്താന്‍ സഹായിക്കുകയും ചെയ്യുന്നു.
നമ്മുടെ ആന്തരിക ആവശ്യങ്ങളും ബാഹ്യ പ്രവര്‍ത്തനങ്ങളും തമ്മില്‍ യോജിപ്പുണ്ടാക്കുമ്പോള്‍ മാത്രമേ നമ്മുടെ വൈകാരികവും സാമൂഹികവുമായ ജീവിതം അഭിവൃദ്ധി പ്രാപിക്കൂ.
സന്തോഷം, നല്ല ബന്ധങ്ങള്‍ , ദയ, അനുകമ്പ എന്നിവ മാനസികാരോഗ്യം മെച്ചപ്പെടുത്തുകയും ശാരീരിക ആരോഗ്യം വര്‍ദ്ധിപ്പിക്കുകയും ഹൃദ്രോഗ സാധ്യത കുറയ്ക്കുകയും ചെയ്യുന്നു. നന്മയുള്ള മൂന്ന് കാര്യങ്ങള്‍ എഴുതികൊണ്ട് ഓരോ ദിവസവും ആരംഭിക്കുന്നത് നിങ്ങളുടെ മാനസികാവസ്ഥയെ മാറ്റിമറിക്കുകയും വരും മണിക്കൂറുകളില്‍ പോസിറ്റീവ് ചിന്ത സജ്ജമാക്കുകയും ചെയ്യും.
സമ്മര്‍ദ്ദം, ഉത്കണ്ഠ എന്നിവയുടെ വര്‍ദ്ധിച്ചുവരുന്ന വ്യാപനം ഏറ്റവും പ്രധാനപ്പെട്ട കാര്യങ്ങളില്‍ നിന്ന് നമ്മെ അകറ്റുന്നു . ഹൃദയത്തിന്റെ താളങ്ങളുമായി പൊരുത്തപ്പെടുന്ന രീതികള്‍ സ്വീകരിക്കുന്നതിലൂടെയും അതുമായി വീണ്ടും ബന്ധിപ്പിക്കുന്നതിലൂടെയും ആധുനിക ജീവിതത്തിന്റെ വെല്ലുവിളികളെ മറികടക്കാനും ലക്ഷ്യത്തിലെത്താനും കഴിയും.
നമ്മുടെ വൈകാരികതയുടെ ഫലങ്ങള്‍ ഹൃദയ പ്രവര്‍ത്തനത്തിലും പ്രകടമാകും. ഇക്കാരണത്താല്‍ നെഞ്ചിലോ തൊണ്ടയിലോ ഇറുകിയ അസ്വസ്ഥത അനുഭവപ്പെടുന്നു.
മാനസിക ബുദ്ധിമുട്ടുകള്‍ ഹൃദയത്തെ ദോഷകരമായി ബാധിക്കും. ഉയര്‍ന്ന രക്തസമ്മര്‍ദ്ദം, കൊറോണറി ആര്‍ട്ടറി ഡിസീസ്, ക്രമരഹിതമായ ഹൃദയ താളം, പെട്ടെന്നുള്ള ഹൃദയസ്തംഭനം എന്നിവയുള്‍പ്പെടെ എല്ലാ വിഭാഗത്തിലുള്ള ശാരീരിക ഹൃദ്രോഗങ്ങളുമായും നമ്മുടെ മാനസിക ബുദ്ധിമുട്ടുകള്‍ക്ക് ബന്ധമുണ്ട് . ഇത് ഹൃദയ താളത്തെ സ്വാധീനിക്കുകയും കൊറോണറി വാസകോണ്‍സ്ട്രിക്ഷനെ ട്രിഗര്‍ ചെയ്യുകയും ഇസ്‌കെമിയയിലേക്ക് നയിക്കുകയും ചെയ്യും.
സമ്മര്‍ദ്ദവും ഹൃദയവും തമ്മിലുള്ള ഈ സങ്കീര്‍ണ്ണമായ ബന്ധം ഹൃദയത്തിന്റെ നാഡീവ്യൂഹത്തിനുള്ളില്‍ ഘടനാപരമായ പരിവര്‍ത്തനങ്ങള്‍ക്ക് കാരണമാകും. ഇത് ഹൃദയാഘാത സാധ്യതയും അവയുടെ മാരകമായ പ്രത്യാഘാതങ്ങളും വര്‍ദ്ധിപ്പിക്കുന്നു. നേരെമറിച്ച്, സുരക്ഷിതത്വവും പിന്തുണയും അനുഭവപ്പെടുമ്പോള്‍ നമ്മുടെ വൈകാരിക ഹൃദയങ്ങള്‍ വിശ്രമിക്കുകയും വികസിക്കുകയും ചെയ്യുന്നു.
