പൊതുവേ വളരെ അയുര്‍ദൈര്‍ഘ്യമുള്ളവരാണ് ജപ്പാന്‍ക്കാര്‍. എന്നാല്‍ ഇതിന് പിന്നിലെ രഹസ്യം അവരുടെ ഭക്ഷണക്രമവും ജീവിതശൈലിയുമാണ്. അര്‍ബുദ രോഗ നിയന്ത്രണത്തിലും ജാപ്പനീസ് ഭക്ഷണക്രമം നിര്‍ണ്ണയകമാണെന്നും പഠനങ്ങള്‍ വ്യക്തമാക്കുന്നു. ജാപ്പനീസ് ഭക്ഷണക്രമത്തില്‍ കാണപ്പെടുന്ന ന്യൂക്ലിക് ആസിഡുകള്‍ക്ക് അര്‍ബുദ കോശങ്ങളുടെ വളര്‍ച്ചയെ നിയന്ത്രിക്കാനാകുമെന്ന് ഒസാക മെട്രോപോളിറ്റന്‍ സര്‍വകലാശാലയിലെ ഗവേഷകര്‍ നടത്തിയ പഠനത്തില്‍ കണ്ടെത്തിയത്.
എല്ലാ ജീവജാലങ്ങളിലും നാം കഴിക്കുന്ന ഭക്ഷണത്തിലുമെല്ലാം കാണപ്പെടുന്ന പ്രകൃതിദത്ത സംയുക്തങ്ങളാണ് ന്യൂക്ലിക് ആസിഡുകള്‍. ഇതിനെ ശരീരം ന്യൂക്ലിയോടൈഡുകളും ന്യുക്ലിയോസൈഡുകളുമായി വിഘടിപ്പിക്കുന്നു. പ്രതിരോധ സംവിധാനത്തിലും കോശങ്ങളുടെ പ്രവര്‍ത്തനത്തിലുമെല്ലാം ഇത് അത്യാവശ്യമാണ്.
ജാപ്പനീസ് ഭക്ഷണമായ സാല്‍മണിലും ചില യീസ്റ്റല്‍ നിന്നും വേര്‍തിരിച്ച രണ്ട് ന്യൂക്ലിക് ആസിഡ് സംയുക്തങ്ങളാണ് പഠനത്തിനായി ഉപയോഗിച്ചത്. ഈ സംയുക്തങ്ങള്‍ ഗ്വാനോസിന്‍ എന്ന സംയുക്തങ്ങളെ ഉത്പാദിപ്പിച്ചതായും ഗ്വാനോസിന്‍ അര്‍ബുദ കോശങ്ങള്‍ പെരുകുന്നത് തടയുന്നതായും ഗവേഷകര്‍ ലാബില്‍ നിരീക്ഷിച്ചു. ഈ വിഷയത്തില്‍ കൂടുതല്‍ ഗവേഷണങ്ങള്‍ ആവശ്യമാണെന്ന്‌ പ്ലോസ്‌ വണ്ണില്‍ പ്രസിദ്ധീകരിച്ച പഠന റിപ്പോര്‍ട്ടില്‍ പറയുന്നു.
