ആർത്തവ വേദന പലപ്പോഴും ദുസ്സഹമാകാറുണ്ട്. ഇത് പലപ്പോഴും ദൈനംദിന കാര്യങ്ങൾ തടസ്സപ്പെടുത്തുകയും ആശ്വാസത്തിനായി പലരെയും വേദനസംഹാരികളെയും മറ്റ് വഴികളെയും ആശ്രയിക്കാൻ നിർബന്ധിക്കുകയും ചെയ്യുന്നു. ആർത്തവ സമയത്തെ വേദന സ്വാഭാവികമായി കുറയ്ക്കാൻ സഹായിക്കുന്ന, നമ്മുടെ നാട്ടില് സുഗമമായി ലഭിക്കുന്ന ഒരു ഫലത്തെക്കുറിച്ച് ഇന്റർവെൻഷണൽ പെയിൻ മെഡിസിൻ സ്പെഷ്യലിസ്റ്റായ ഡോ. സൂദ് പങ്കുവെച്ചു. ആർത്തവ വേദന വളരെ ശക്തമാകാറുണ്ട്,
പല കേസുകളിലും മരുന്നുകൾ സഹായകമാകാമെങ്കിലും, ആർത്തവ അസ്വസ്ഥതകൾ കൈകാര്യം ചെയ്യുന്നതിന് പ്രകൃതിദത്തമായ പ്രതിവിധികളുണ്ട്. അത്തരത്തിലുള്ള ഒന്നാണ് പൈനാപ്പിൾ അഥവാ കൈതച്ചക്ക. ഡോ. കുനാൽ സൂദ്, ഒക്ടോബർ 11-ന് ഇൻസ്റ്റാഗ്രാമിൽ പങ്കുവെച്ച ഒരു വീഡിയോയിൽ പൈനാപ്പിൾ ആർത്തവ വേദന കുറയ്ക്കാൻ സഹായിക്കുമെന്ന് പറയുന്നു . ആർത്തവ വേദനയ്ക്കുള്ള സ്വാഭാവികവും ഫലപ്രദവുമായ പ്രതിവിധിയായി അദ്ദേഹം പൈനാപ്പിൾ ശുപാർശ ചെയ്യുന്നു.
കൂടാതെ, ഇതേക്കുറിച്ച് ന്യൂഡൽഹിയിലെ മദേഴ്സ് ലാപ് ഐവിഎഫ് സെൻ്ററിലെ മെഡിക്കൽ ഡയറക്ടറും ഗൈനക്കോളജിസ്റ്റും ഐവിഎഫ് വിദഗ്ദ്ധയുമായ ഡോ. ശോഭ ഗുപ്തയുമായി HT ലൈഫ്സ്റ്റൈൽ ബന്ധപ്പെടുകയും ചെയ്തു.
പൈനാപ്പിൾ ആർത്തവ വേദന കുറയ്ക്കുമോ?
ഡോ. സൂദിന്റെ അഭിപ്രായത്തിൽ, “പൈനാപ്പിളിൽ ബ്രോമെലൈൻ (bromelain) എന്ന പ്രകൃതിദത്ത സംയുക്തം അടങ്ങിയിട്ടുണ്ട്, ഇത് വീക്കവും നീർക്കെട്ടും കുറയ്ക്കാൻ സഹായിക്കും. ആർത്തവസമയത്ത് ഓക്സിഡേറ്റീവ് സ്ട്രെസ് കുറയ്ക്കുന്നതിൽ പ്രധാന പങ്ക് വഹിക്കുന്ന വിറ്റാമിൻ സിയും മാംഗനീസും പൈനാപ്പിളിൽ ധാരാളമായി ഉണ്ട്. വീക്കം തടയാനുള്ള (anti-inflammatory) ശേഷിക്കും പേശികളെ അയവുള്ളതാക്കുന്ന (muscle-relaxant) ഗുണങ്ങൾക്കും പേരുകേട്ട ബ്രോമെലൈൻ എന്ന എൻസൈം പൈനാപ്പിളിൽ ധാരാളമായി അടങ്ങിയിട്ടുണ്ട്.
ഈ എൻസൈം ആർത്തവ വേദനയ്ക്ക് പിന്നിലെ പ്രധാന കാരണമായ ഗർഭാശയ സങ്കോചങ്ങളും വീക്കവും കുറയ്ക്കാൻ സഹായിക്കുന്നു. ഇതിലെ ഉയർന്ന വിറ്റാമിൻ സിയും മാംഗനീസും ആരോഗ്യകരമായ രക്തയോട്ടത്തെ പിന്തുണയ്ക്കുകയും ആർത്തവ സമയത്തെ ക്ഷീണം കുറയ്ക്കുകയും ചെയ്യുന്നു. വേദന കുറയ്ക്കുന്നതിനു പുറമേ, പൈനാപ്പിൾ വയറുവീർക്കൽ (bloating) തടയാനും സഹായിക്കും. ഇതിലെ പ്രകൃതിദത്ത എൻസൈമുകൾ ദഹനത്തെ സഹായിക്കുകയും ആർത്തവ സമയത്ത് ഉന്മേഷവും നൽകുന്നു.
എപ്പോൾ, എങ്ങനെ കഴിക്കണം?
ആർത്തവം തുടങ്ങുന്നതിന് രണ്ടോ മൂന്നോ ദിവസം മുമ്പ് നിങ്ങൾക്ക് ചെറിയ അളവിൽ ഫ്രഷ് പൈനാപ്പിൾ കഴിക്കാൻ തുടങ്ങാം, കൂടാതെ സൈക്കിളിന്റെ ആദ്യ രണ്ട് ദിവസങ്ങളിലും ഇത് തുടരാം. ഒരു ദിവസം കുറച്ച് കഷ്ണങ്ങൾ മതിയാകും – അമിതമായി കഴിക്കുന്നത് ഒഴിവാക്കുക, കാരണം ഈ പഴം അമ്ലഗുണമുള്ളതും (acidic) സെൻസിറ്റീവ് ആയ ആളുകളിൽ വയറിന് അസ്വസ്ഥത ഉണ്ടാക്കുന്നതുമാണ്.
സ്വാഭാവിക ആശ്വാസത്തിനുള്ള മറ്റ് വഴികൾ
ആർത്തവ വേദനയ്ക്ക് സ്വാഭാവിക ആശ്വാസം നൽകുന്നതിനുള്ള ഒരു നല്ല മാർഗ്ഗമായി ഡോ. സൂദ് പൈനാപ്പിളിനെ എടുത്തു കാണിക്കുന്നുണ്ടെങ്കിലും, ഇത് എല്ലാവർക്കും ഒരേപോലെ ഫലപ്രദമാകണമെന്നില്ലെന്നും അദ്ദേഹം പറയുന്നു. “ഓരോ സ്ത്രീയുടെയും ശരീരം വ്യത്യസ്തമാണ്, ആർത്തവ വേദന കൈകാര്യം ചെയ്യാൻ എല്ലാവർക്കും ഒരുപോലെ യോജിക്കുന്ന ഒറ്റ പരിഹാരമില്ല,” അദ്ദേഹം വിശദീകരിക്കുന്നു. “ഇത് എല്ലാവരെയും സഹായിച്ചെന്ന് വരില്ല, പക്ഷേ വേദന കുറയ്ക്കാൻ ഇത് ചേർക്കാൻ സാധ്യതയുള്ളതും അപകടസാധ്യത കുറഞ്ഞതുമായ ഒരു നല്ല ഓപ്ഷനാണ്.
