കാരറ്റ് എന്ന് പറയുമ്പോൾ, ഓറഞ്ച് നിറമാണ് നമ്മളുടെ മനസ്സിലേക്ക് സ്വാഭാവികമായി വരുന്നത്. എന്നാൽ നിങ്ങൾ അത്ഭുതപ്പെട്ടേക്കാം, കാരറ്റിന് എപ്പോഴും ഈ നിറമായിരുന്നില്ല. ശരിക്കും ഈ നിറം മാറ്റം സംഭവിച്ചതിന്റെ കാരണത്തെക്കുറിച്ച് നോക്കാം.
കാരറ്റിന്റെ യഥാർത്ഥ നിറം
അത്ഭുതകരമെന്നു പറയട്ടെ, അടുക്കളയിലെ പ്രധാന വിഭവമായ കാരറ്റിന് എപ്പോഴും ഓറഞ്ച് നിറമായിരുന്നില്ല. ഓറഞ്ച് അല്ലാത്ത ഈ പച്ചക്കറി പർപ്പിൾ, വെള്ള, ചുവപ്പ്, ഇളം മഞ്ഞ തുടങ്ങി പല നിറങ്ങളിൽ ഉണ്ടായിരുന്നു. ഇപ്പോൾ സൂപ്പർമാർക്കറ്റുകളിലെ ഷെൽഫുകളിൽ നിറഞ്ഞുനിൽക്കുന്ന ഓറഞ്ച് നിറം, കാരറ്റിന്റെ നീണ്ട ചരിത്രത്തിൽ താരതമ്യേന പുതിയ ഒന്നാണ്, Food Literacy Centre-ന്റെ അഭിപ്രായത്തിൽ. ആയിരക്കണക്കിന് വർഷങ്ങൾക്ക് മുമ്പ് ഇന്നത്തെ അഫ്ഗാനിസ്ഥാൻ, ഇറാൻ, മധ്യേഷ്യ എന്നീ പ്രദേശങ്ങളിലാണ് കാരറ്റ് ആദ്യമായി വളർത്തിയത്.
ആദ്യകാലത്തെ കാട്ടു കാരറ്റുകൾ ഇന്നത്തെ ഇനങ്ങൾ പോലെ അത്ര മധുരമുള്ളതോ മാംസളമായതോ ആയിരുന്നില്ല. അവ കട്ടിയുള്ളതും ചിലപ്പോൾ പർപ്പിൾ അല്ലെങ്കിൽ വെള്ള നിറത്തിലുമായിരുന്നു. പർപ്പിൾ കാരറ്റുകളിൽ ആന്തോസയാനിനുകൾ (Anthocyanins) ധാരാളമായി അടങ്ങിയിരുന്നു, ഇത് ചില സസ്യങ്ങൾക്ക് കടും നിറം നൽകുന്ന സ്വാഭാവിക വർണ്ണവസ്തുക്കളാണ്.
മഞ്ഞ, വെള്ള കാരറ്റുകളിൽ വിവിധ വർണ്ണവസ്തുക്കളുടെ സംയോജനമാണുണ്ടായിരുന്നത്. ഈ യഥാർത്ഥ കാരറ്റുകൾ പാചക ആവശ്യങ്ങൾക്കെന്ന പോലെ ഔഷധ ആവശ്യങ്ങൾക്കായും ഉപയോഗിച്ചിരുന്നു.
ഓറഞ്ച് നിറത്തിലേക്കുള്ള മാറ്റം
കാരറ്റിന്റെ നിറം ഓറഞ്ചായി മാറിയത് 16-ഉം 17-ഉം നൂറ്റാണ്ടുകളിൽ നെതർലാന്റ്സിൽ വെച്ചാണ്. ഡച്ച് കർഷകർ അവരുടെ ഭരണകൂടമായ ഹൗസ് ഓഫ് ഓറഞ്ച്-നസ്സൗവിനെ (House of Orange-Nassau) ആദരിക്കുന്നതിനായി മഞ്ഞ, ചുവപ്പ് കാരറ്റുകൾ തിരഞ്ഞെടുത്തു കൃഷി ചെയ്ത് ഓറഞ്ച് നിറത്തിലുള്ളവ വളർത്തിയെടുത്തു. രാജ്യസ്നേഹം നിറഞ്ഞതായിരുന്നു എന്നതിനുപുറമെ, ഈ പുതിയ ഓറഞ്ച് ഇനം കൂടുതൽ മധുരമുള്ളതും കാഴ്ചയിൽ മികച്ചതുമായിരുന്നു. ഓറഞ്ച് കാരറ്റിന്റെ പ്രചാരം ക്രമേണ യൂറോപ്പിലുടനീളവും പിന്നീട് ലോകമെമ്പാടും വ്യാപിച്ചു.ഇപ്പോൾ, സൂപ്പർമാർക്കറ്റുകളിൽ ഈ ഭംഗിയുള്ള ഓറഞ്ച് കാരറ്റുകൾ നിറഞ്ഞിരിക്കുമ്പോൾ, ലോകത്തിന്റെ പല ഭാഗങ്ങളിലും കർഷകർ പഴയ ഇനം കാരറ്റുകളുടെ പാരമ്പര്യം നിലനിർത്താൻ ശ്രമിക്കുന്നുണ്ട്.
