സെഷ്വലി ട്രാന്‍സ്മിറ്റഡ് ഇന്‍ഫെക്ഷനുകള്‍ ലൈംഗികബന്ധത്തിലൂടെ മാത്രമാണ് പകരുന്നതെന്നാണ് നിങ്ങള്‍ കരുതിരിക്കുന്നതെങ്കില്‍ അത് തെറ്റായ ധാരണയാണ്. ലിംഗവും യോനിയും തമ്മില്‍ നേരിട്ട് സമ്പര്‍ക്കത്തിലെത്തുന്ന സംഭോഗത്തിലൂടെ അല്ലാതെയും ചില എസ്ടി ഐകള്‍ പകരാം എന്നാണ് ഡോക്ടര്‍മാര്‍ വ്യക്തമാക്കുന്നത്.
ഹെര്‍പസും , സിഫിലിസും എച്ച് പി വിയും ശരീരത്തിലെ രോഗബാധിതമായി ഒരിടത്തിലൂടെ ചര്‍മത്തില്‍ നിന്ന് ചര്‍മത്തിലേക്ക് പടരാമെന്നും ന്യൂയോര്‍ക്ക് പോസ്റ്റില്‍ പ്രസിദ്ധീകരിച്ച ഒരു ലേഖനത്തില്‍ വ്യക്തമാക്കുന്നു.
പരസ്പരം സ്വയം ഭോഗത്തിന് സഹായിക്കുമ്പോള്‍ ശരീരത്തിലെ സ്രവങ്ങള്‍ സ്പര്‍ശിച്ചും ഇങ്ങനെ സംഭവിക്കാം. ഗൊണേറിയ, ക്ലമൈഡിയ പോലുള്ളവ ഓറല്‍ സെക്‌സിലൂടെയും പടരാം. ഇവ രണ്ടും കണ്ണുകളെയും ബാധിക്കുന്നവയാണ്. താടി വടിക്കാനായി ഉപയോഗിക്കുന്ന റേസറുകള്‍, സൂചികള്‍ , സെക്‌സ് ടോയ് എന്നിവ പങ്കുവയ്ക്കുന്നതിലൂടെയും എസ് ടി ഐകള്‍ പടരാമെന്നും ലേഖനത്തില്‍ പറയുന്നു.
എച്ച് ഐ വി , ഹെപ്പറ്റൈറ്റിസ് ബി, ഹെപ്പറ്റൈറ്റിസ് സി എന്നിവയെല്ലാം ഒന്നിലധികം തവണ ഉപയോഗിക്കുന്ന സൂചിയിലൂടെയും അണുനശീകരണം നടത്താത്ത ടാറ്റൂ സൂചികളിലൂടെയും പടരാം. അമ്മയില്‍ നിന്ന് കുഞ്ഞിലേക്ക് ഗര്‍ഭധാരണ കാലത്തും പ്രസവ സമയത്ത് പാലൂട്ടുമ്പോഴും എസ്ടി ഐകള്‍ പകര്‍ന്നതായി കേട്ടിട്ടുണ്ട്.
ഒന്നിലധികം പങ്കാളികളുമായി ലൈംഗിക ബന്ധത്തില്‍ ഏര്‍പ്പെടുന്നവര്‍ മുന്‍കരുതലെടുക്കേണ്ടതും പങ്കാളി എസ് ടി ഐ പരിശോധനകള്‍ നടത്താറുണ്ടെന്ന് ഉറപ്പാക്കേണ്ടതുമാണെന്ന് ലേഖനത്തില്‍ പറയുന്നു.
