മിക്കവരുടെയും പ്രശ്‌നം ജീവിക്കാന്‍ മതിയായ പണമില്ലെന്നതാണ്. എന്നാല്‍ ബംഗളൂരുവിലെ ഒരു ടെക്കി ദമ്പതികള്‍ക്ക് ഇതിന്റ നേരെ എതിരാണ് പ്രശ്‌നം. ആവശ്യത്തില്‍ കഴിഞ്ഞ് പണം കിട്ടുന്നതിനാല്‍ അത് എവിടെ, എങ്ങനെ ചെലവഴിക്കണമെന്ന് അറിയാത്ത അസാധാരണമായ ഒരു ആശയക്കുഴപ്പം. ബെംഗളൂരുവില്‍ താമസിക്കുന്ന ഇവരുടെ വെളിപ്പെടുത്തല്‍ വൈറലായി മാറിയിരിക്കുകയാണ്.
ഉപയോക്താക്കള്‍ക്ക് അവരുടെ മിച്ചവരുമാനം എങ്ങനെ വിനിയോഗിക്കാം എന്നതിനെക്കുറിച്ച് ഇവര്‍ ഉപദേശം തേടിയത് വൈറലായി.
പ്രതിമാസം ഇരുവര്‍ക്കും കൂടി 7 ലക്ഷം രൂപ വരുമാനം ഉണ്ടെന്നും എന്നാല്‍ അത് എങ്ങനെ ചെലവഴിക്കണമെന്ന കാര്യത്തില്‍ ഒരു പിടിയുമില്ലെന്നും ഇവര്‍ പറയുന്നു. ഇന്ത്യന്‍ പ്രൊഫഷണലുകള്‍ ശമ്പളം, ജോലിസ്ഥലങ്ങള്‍, സാമ്പത്തികം എന്നിവ ചര്‍ച്ച ചെയ്യുന്ന പ്ലാറ്റ്‌ഫോമായ ഗ്രേപ്വിന്‍ ആപ്പിലാണ് പോസ്റ്റ് ആദ്യം കണ്ടത്. പിന്നീട്, ഗ്രേപൈ്വനിന്റെ സഹസ്ഥാപകനും സിഇഒയുമായ സൗമില്‍ ത്രിപാഠി ഇതേ സ്‌ക്രീന്‍ഷോട്ട് എക്‌സില്‍ പങ്കിട്ടതോടെയാണ് അത് വൈറലായത്. ”ഇത് ഗംഭീരമാണ്. ഒരു കാലത്ത് ഇന്ത്യന്‍ വ്യവസായികള്‍ മാത്രമായിരുന്നു അമിതമായ സമ്പത്തിന്റെ പ്രശ്‌നങ്ങളില്‍ അകപ്പെടുക. എന്നാല്‍ ഇന്ന് സര്‍വീസ് ക്ലാസിലെ സാധാരണ 30 വയസ്സുള്ള ചിലര്‍ പോലും ശരിയായ ധനികരുടെ പ്രശ്‌നങ്ങള്‍ അഭിമുഖീകരിക്കുന്നത് ഞങ്ങള്‍ കാണുന്നു,’ എക്‌സില്‍ പോസ്റ്റ് പങ്കിട്ടുകൊണ്ട് ത്രിപാഠി എഴുതി.
30 വയസ്സുള്ള ഭാര്യാഭര്‍ത്താക്കന്മാര്‍ ബെംഗളൂരുവില്‍ സോഫ്‌റ്റ്വെയര്‍ എഞ്ചിനീയര്‍മാരാണ്. ദമ്പതികള്‍ക്ക് ഇനിയും കുട്ടികളായിട്ടില്ല. അവരുടെ പ്രതിമാസ വരുമാനത്തില്‍ 7 ലക്ഷം രൂപയും വാര്‍ഷിക ബോണസും ഉള്‍പ്പെടുന്നു. അതില്‍ നിന്ന് മ്യൂച്വല്‍ ഫണ്ടുകളില്‍ 2 ലക്ഷം രൂപ നിക്ഷേപിക്കുമെന്നും ഭര്‍ത്താവ് വെളിപ്പെടുത്തി. അതേസമയം, അവരുടെ പ്രതിമാസ ചെലവ് 1.5 ലക്ഷം രൂപയാണ്. അവര്‍ ബെംഗളൂരുവിലെ ഒരു ‘പോഷ് സമൂഹത്തില്‍’ താമസിക്കുന്നു, സ്വന്തമായി ഒരു കാറും ഉണ്ട്.
”എല്ലാ മാസാവസാനവും അവരുടെ ബാങ്ക് അക്കൗണ്ടുകളില്‍ മൂന്ന് ലക്ഷത്തിലധികം രൂപ പിന്നെയും അവശേഷിക്കുന്നു. അത് എങ്ങനെ ഉപയോഗിക്കണമെന്ന് അറിയില്ല. അതിനാല്‍ ആ പണം കൂടുതല്‍ ചെലവഴിക്കാനുള്ള എന്തെങ്കിലും നിര്‍ദ്ദേശങ്ങള്‍,” അദ്ദേഹം എഴുതി.
നിരവധി ഉപയോക്താക്കള്‍ മനുഷ്യന്റെ വിചിത്രമായ ആശയക്കുഴപ്പത്തോട് പ്രതികരിക്കുകയും രസകരവും പ്രായോഗികവുമായ പരിഹാരങ്ങള്‍ ഉപയോഗിച്ച് പ്രതികരിക്കുകയും ചെയ്തു. ചിലര്‍ ദമ്പതികളോട് കൂടുതല്‍ അവധിക്കാലം ചെലവഴിക്കാനോ വീട് വാങ്ങാനോ നിര്‍ദ്ദേശിച്ചു, ചിലര്‍ അവരോട് ഒരു ബിസിനസില്‍ നിക്ഷേപിക്കാനോ മൃഗക്ഷേമ ചാരിറ്റികള്‍ക്കോ അനാഥാലയങ്ങള്‍ക്ക് സംഭാവന നല്‍കാനും ആവശ്യപ്പെട്ടു.
