“നീ മരിച്ചോ?” (Are You Dead?) എന്നത് കേൾക്കുമ്പോൾ അല്പം പേടി തോന്നിയേക്കാം. എന്നാൽ ഒറ്റയ്ക്ക് താമസിക്കുന്ന ലക്ഷക്കണക്കിന് ആളുകൾക്ക് ഇതൊരു പേടിസ്വപ്നമല്ല, മറിച്ച് വലിയൊരു ആശ്വാസമാണ്. സ്വന്തം ഭയങ്ങളും ആശങ്കകളും തുറന്നുപറയാൻ മടിക്കുന്നവർക്കായി രൂപകൽപ്പന ചെയ്ത ഈ ആപ്പ്, ഉപയോക്താക്കളുടെ സുരക്ഷ ഉറപ്പാക്കാനാണ് സഹായിക്കുന്നത്. ഒറ്റയ്ക്ക് താമസിക്കുന്നവരെ ലക്ഷ്യമിട്ട് പുറത്തിറക്കിയ ‘നീ മരിച്ചോ?’ (Are You Dead?) എന്ന ആപ്പ് ലോകമെമ്പാടുമുള്ള ഉപയോക്താക്കളിലേക്ക് എത്തുന്നതിന് മുന്നോടിയായി പുതിയ പേര് സ്വീകരിക്കുമെന്ന്കമ്പനി അധികൃതര് പറഞ്ഞു.
ഉടൻ പുറത്തിറങ്ങുന്ന പുതിയ പതിപ്പിൽ ‘ഡെമുമ്മു’ (Demumu) എന്ന ആഗോള ബ്രാൻഡ് നാമമാകും ആപ്പ് സ്വീകരിക്കുകയെന്ന് കമ്പനി തങ്ങളുടെ ഔദ്യോഗിക വെയ്ബോ (Weibo) പ്ലാറ്റ്ഫോമിലൂടെ അറിയിച്ചു. “വിപുലമായ ആലോചനകൾക്ക് ശേഷമാണ് സൈലം ആപ്പിന് ഡെമുമ്മു എന്ന ആഗോള പേര് നൽകാൻ തീരുമാനിച്ചത്,” കമ്പനി പ്രസ്താവനയിൽ വ്യക്തമാക്കി. ഈ ആഴ്ച ആപ്പിൾ സ്റ്റോറിലെ ഏറ്റവും കൂടുതൽ പണം നൽകി ഡൗൺലോഡ് ചെയ്യപ്പെട്ട ആപ്പുകളുടെ പട്ടികയിൽ ഈ ആപ്പ് ഒന്നാമതെത്തിയിരുന്നു.
എന്താണ് സൈലം (Sileme)?
കഴിഞ്ഞ വർഷം മെയ് മാസത്തിൽ ചൈനയിൽ പുറത്തിറങ്ങിയ ഈ ആപ്പിന്റെ പേര് ‘സൈലം’ എന്നാണ്. ചൈനീസ് ഭാഷയിൽ ‘സൈലം’ (Sileme) എന്നറിയപ്പെടുന്ന ഈ ആപ്പിന്റെ ഇംഗ്ലീഷ് അർത്ഥം “നീ മരിച്ചോ?” എന്നാണ്. ആരും കൂടെയില്ലാത്ത സമയത്ത് പെട്ടെന്നുണ്ടാകുന്ന ആരോഗ്യപ്രശ്നങ്ങളോ അപകടങ്ങളോ നേരിടേണ്ടി വരുമോ എന്ന് ഭയപ്പെടുന്നവരെ ലക്ഷ്യമിട്ടാണ് ഇത് പ്രവർത്തിക്കുന്നത്. കുടുംബാംഗങ്ങളോ സുഹൃത്തുക്കളോ അടുത്തില്ലാത്തവർക്ക് ഈ ആപ്പ് ഒരു വലിയ തുണയാണ്. ഉപയോക്താവ് ഒരു എമർജൻസി കോൺടാക്റ്റ് നമ്പർ ഇതിൽ നൽകണം. നിശ്ചിത ദിവസങ്ങളിൽ ആപ്പിൽ കയറി വിവരങ്ങൾ അറിയിക്കുന്നതിൽ ഉപയോക്താവ് പരാജയപ്പെട്ടാൽ, ആപ്പ് സ്വയം തന്നെ ഈ നമ്പറിലേക്ക് സന്ദേശങ്ങൾ അയക്കും. ലോഞ്ച് ചെയ്തതിന് പിന്നാലെ ചൈനയിൽ ഏറ്റവും കൂടുതൽ ഡൗൺലോഡ് ചെയ്യപ്പെട്ട ആപ്പായി ഇത് മാറി.
ആപ്പ് എങ്ങനെയാണ് പ്രവർത്തിക്കുന്നത്?
വളരെ ലളിതമായ രീതിയിലാണ് ഇതിന്റെ പ്രവർത്തനം:
- ഉപയോക്താക്കൾ ഓരോ രണ്ട് ദിവസം കൂടുമ്പോഴും ആപ്പ് തുറന്ന് തങ്ങൾ സുരക്ഷിതരാണെന്ന് സ്ഥിരീകരിക്കാൻ സ്ക്രീനിലെ വലിയ ബട്ടണിൽ അമർത്തണം.
- ഈ ആപ്പിൽ സോഷ്യൽ മീഡിയ ഫീഡുകളോ ട്രാക്കിംഗ് സംവിധാനങ്ങളോ ഇല്ല.
- നിശ്ചിത സമയത്തിനുള്ളിൽ ഉപയോക്താവ് ‘ഓക്കെ’ ആണെന്ന് അറിയിച്ചില്ലെങ്കിൽ, ആപ്പ് ഉടൻ തന്നെ മുൻകൂട്ടി രജിസ്റ്റർ ചെയ്ത എമർജൻസി കോൺടാക്റ്റിലേക്ക് സന്ദേശം അയക്കും. ഉപയോക്താവിന് എന്തോ ആപത്ത് സംഭവിച്ചിട്ടുണ്ടെന്ന മുന്നറിയിപ്പാണ് ഇത് നൽകുന്നത്.
സോഷ്യൽ മീഡിയയിലെ വിധിനിർണ്ണയങ്ങളോ ഇടപെടലുകളോ ഭയപ്പെടാതെ, തികച്ചും സ്വകാര്യമായി ഒരാളുടെ സുരക്ഷ ഉറപ്പാക്കുന്നു എന്നതാണ് ഇതിന്റെ പ്രത്യേകത. ഇത് നേരിട്ടുള്ള വൈദ്യസഹായം നൽകുന്നില്ലെങ്കിലും, ഒരാൾ നമ്മെ അന്വേഷിക്കാനുണ്ട് എന്ന ഉറപ്പ് നൽകുന്നു.
എന്തുകൊണ്ടാണ് ഈ ആപ്പ് ഇത്ര ജനപ്രിയമാകുന്നത്?
ആദ്യം സൗജന്യമായിരുന്ന ഈ സേവനത്തിന് ഇപ്പോൾ 8 യുവാൻ (ഏകദേശം 1.15 ഡോളർ) ആണ് വില. ജോലി സംബന്ധമായി മറ്റൊരു നഗരത്തിൽ കഴിയുന്നവർക്കും, ഒറ്റയ്ക്ക് താമസിക്കാൻ താല്പര്യപ്പെടുന്നവർക്കുമാണ് ഇത് ഏറെ പ്രിയങ്കരം.
ചൈനയിലെ മാറുന്ന ജനസംഖ്യാ രീതിയിലേക്കാണ് ഈ ആപ്പിന്റെ വിജയം വിരൽ ചൂണ്ടുന്നത്. 2030-ഓടെ ചൈനയിൽ ഒറ്റയ്ക്ക് താമസിക്കുന്നവരുടെ എണ്ണം 20 കോടി കവിയുമെന്നാണ് കണക്കുകൾ സൂചിപ്പിക്കുന്നത്. പ്രായമായവരുടെ വർദ്ധനവ്, നഗരങ്ങളിലേക്കുള്ള കുടിയേറ്റം, വിവാഹത്തോടും കുടുംബജീവിതത്തോടും യുവാക്കൾ കാണിക്കുന്ന വിമുഖത എന്നിവയാണ് ഇതിന് കാരണമായി ചൂണ്ടിക്കാണിക്കപ്പെടുന്നത്.
