ഈ വർഷം തെനാലിയിൽ നടന്ന മകരസംക്രാന്തി ആഘോഷം കേവലം ഒരു വിരുന്നായിരുന്നില്ല, മറിച്ച് സമാനതകളില്ലാത്ത ഒരു ഭക്ഷണാനുഭവമായിരുന്നു. മരുമകനായ ശ്രീദത്തയ്ക്ക് വേണ്ടി വന്ദനപു മുരളീകൃഷ്ണയും ഭാര്യയും ചേർന്ന് ഒരുക്കിയത് അമ്പരപ്പിക്കുന്ന 158 വിഭവങ്ങളാണ്. തങ്ങളുടെ മകൾ മൗനികയുടെയും ഭർത്താവിന്റെയും വിവാഹശേഷമുള്ള ആദ്യ സംക്രാന്തി അതിമനോഹരമാക്കാൻ തീരുമാനിക്കുകയായിരുന്നു അവര്. സസ്യാഹാരങ്ങളും മാംസാഹാരങ്ങളും ഉൾപ്പെടെ മേശപ്പുറത്ത് നിരത്തിയ വിഭവങ്ങൾ അതിഥികളുടെ കണ്ണ് തള്ളിക്കുന്നതായിരുന്നു.
വിഭവസമൃദ്ധമായ ആന്ധ്രാ രുചികൾ
ആന്ധ്ര പാചകരീതിയുടെ വൈവിധ്യം വിളിച്ചോതുന്നതായിരുന്നു മെനു. മുറുക്ക്, ചെക്കലു, ഗാരെലു തുടങ്ങിയ മൊരിഞ്ഞ പലഹാരങ്ങളും; അരിസെലു, ബൊബ്ബാട്ട്ലു, സുണ്ണുണ്ടലു, കജ്ജികായലു തുടങ്ങിയ പരമ്പരാഗത മധുരപലഹാരങ്ങളും വിരുന്നിന് മാറ്റുകൂട്ടി. ഇതിന് പുറമെ പലതരം ചോറുകൾ, എരിവുള്ള കറികൾ തുടങ്ങി ഒരു ഉത്സവത്തിന് വേണ്ട സകല വിഭവങ്ങളും ആ പ്ലേറ്റുകളിൽ നിറഞ്ഞുനിന്നു.
സോഷ്യൽ മീഡിയയിലെ പ്രതികരണങ്ങൾ
സോഷ്യൽ മീഡിയയിൽ ഈ വിരുന്നിന്റെ ചിത്രങ്ങളും വീഡിയോകളും വൈറലായതോടെ ആളുകൾ അമ്പരപ്പിലാണ്. ‘ന്യൂസ് ആൾജിബ്ര ഇന്ത്യ’ എന്ന എക്സ് (X) ഹാൻഡിലിൽ പങ്കുവെച്ച വീഡിയോയ്ക്ക് താഴെ രസകരമായ കമന്റുകളാണ് വരുന്നത്.
“ഇതൊരു സംക്രാന്തി ഉച്ചഭക്ഷണമല്ല, മറിച്ച് ഹോസ്പിറ്റാലിറ്റിയിലെ ഒരു ഫുൾ സെമസ്റ്റർ പ്രാക്ടിക്കൽ പരീക്ഷയാണ്. അനുഗ്രഹം വാങ്ങാൻ വന്ന മരുമകൻ ‘ഫുഡ് കോമ’ ബിരുദവുമായാണ് മടങ്ങുന്നത്,” ഒരു ഉപയോക്താവ് കുറിച്ചു.
“ഇതെല്ലാം കഴിച്ചുതീർക്കാൻ അദ്ദേഹം രണ്ടുദിവസം മുൻപേ പട്ടിണി കിടന്നിട്ടുണ്ടാകും,” മറ്റൊരാൾ പരിഹസിച്ചു.
“ആന്ധ്രയിലെ അതിഥി സൽക്കാരം അതിന്റെ പാരമ്യത്തിലാണ്. ഇതൊരു ഭക്ഷണ നിക്ഷേപം തന്നെയാണ്,” എന്നിങ്ങനെയായിരുന്നു മറ്റ് പ്രതികരണങ്ങൾ.
സ്നേഹത്തിന്റെ ആഘോഷം
ഭക്ഷണത്തിന് അപ്പുറം, ഇന്ത്യൻ കുടുംബങ്ങൾ മരുമക്കൾക്ക് നൽകുന്ന വലിയ സ്ഥാനത്തിന്റെ തെളിവുകൂടിയായിരുന്നു ഈ വിരുന്ന്. കവി തെന്നാലി രാമന്റെ നാടായ തെന്നാലിയിൽ, പാരമ്പര്യവും സ്നേഹവും ഇത്രത്തോളം ഹൃദ്യമായി ഒത്തുചേർന്ന മറ്റൊരു ആഘോഷം അടുത്ത കാലത്തുണ്ടായിട്ടില്ല.
ദിവസം അവസാനിച്ചപ്പോൾ, ശ്രീദത്തയ്ക്ക് അത് കേവലം ഒരു ഭക്ഷണമല്ലായിരുന്നു; ജീവിതകാലം മുഴുവൻ ഓർത്തുവെക്കാവുന്ന ഒരു മകരസംക്രാന്തി ആഘോഷമായിരുന്നു അത്.
