കൈദി, മാസ്റ്റര്‍താരം അര്‍ജുന്‍ദാസ് മലയാളത്തിലേക്ക് ; റൊമാന്റിക് കോമഡിയുമായി ജൂണിന്റെ സംവിധായകനൊപ്പം
മധുരം (2021), ജൂണ്‍ (2019), ഡിയര്‍ ജൂണ്‍ (2017) എന്നീ ചിത്രങ്ങളിലൂടെയാണ് സംവിധായകന്‍ അഹമ്മദ് അറിയപ്പെടുന്നത്. നടന്‍ അര്‍ജുന്‍ദാസാണെങ്കില്‍ മാസ്റ്റര്‍, കൈദി തുടങ്ങിയ തമിഴിലെ വമ്പന്‍ ഹിറ്റുകളുടെ പേരിലും. ഇതാദ്യമായി സംവിധായകന്‍ അഹമ്മദ് ഖബീറുമായി കൈകോര്‍ത്തുകൊണ്ട് ഒരു റൊമാന്റിക് കോമഡിയുമായി മലയാളത്തിലേക്ക് വരികയാണ് നടന്‍ അര്‍ജുന്‍ദാസ്.
ഹെഷാം അബ്ദുള്‍ വഹാബ് സംഗീതം നല്‍കുന്ന സിനിമ പക്ഷേ അര്‍ജുന്‍ദാസിന്റെ രണ്ടാമത്തെ മലയാളം സിനിമയാണ്. അദ്ദേഹത്തിന്റെ ക്രൈം ഡ്രാമ വെബ് സീരീസ് കേരള ക്രൈം ഫയല്‍സ് കഴിഞ്ഞ വര്‍ഷം പുറത്തിറങ്ങിയിരുന്നു. ”എന്റെ ആദ്യത്തെ മലയാളം ഫീച്ചര്‍ ഫിലിം. ഈ ക്യൂട്ട് റോം-കോമിന് വളരെ ആവേശമുണ്ട്. അഹമ്മദ് ഖബീര്‍ സംവിധാനം ചെയ്ത ഒരു മധുര പ്രണയകഥ. എന്നില്‍ വിശ്വസിച്ചതിന് നന്ദി, അഹമ്മദ്. ഒരു ഹെഷാം അബ്ദുള്‍ വഹാബ് മ്യൂസിക്കല്‍. തീര്‍ച്ചയായും നിങ്ങളുടെ എല്ലാ അനുഗ്രഹങ്ങളും സ്‌നേഹവും പിന്തുണയും ആവശ്യമാണ്.” തന്റെ എക്സ് ഹാന്‍ഡിലില്‍ സംവിധായകനുമൊത്തുള്ള ഒരു ചിത്രം പങ്കിട്ടുകൊണ്ട് അര്‍ജുന്‍ദാസ് ആരാധകരെ അറിയിച്ചു.
തമിഴില്‍ ഒട്ടേറെ ചിത്രങ്ങളാണ് അര്‍ജുന്‍ദാസിനുള്ളത്. വസന്തബാലന്‍ സംവിധാനം ചെയ്ത അനീതിയില്‍ കഴിഞ്ഞ വര്‍ഷം അവസാനം അഭിനയിച്ച അര്‍ജുന്‍ ദാസ്, ബിജോയ് നമ്പ്യാര്‍ സംവിധാനം ചെയ്ത പോറിന്റെ റിലീസിനായി കാത്തിരിക്കുകയാണ്. തമിഴ്-ഹിന്ദി ദ്വിഭാഷയില്‍ ഒരുങ്ങുന്ന ചിത്രത്തില്‍ കാളിദാസ് ജയറാമിനൊപ്പമാണ് അര്‍ജുന്‍ദാസ് വേഷമിട്ടിരിക്കുന്നത്. അതേസമയം, സംവിധായകന്‍ അഹമ്മദ് ഖബീറിന്റെ കേരള ക്രൈം ഫയല്‍സിന്റെ രണ്ടാം സീസണ്‍ വരുന്നു. ഈ സീസണില്‍ അഹമ്മദിന്റെ ഏറ്റവും പുതിയ സംരംഭമായ മങ്കി ബിസിനസ്സിന്റെ നിര്‍മ്മാണ അരങ്ങേറ്റം കുറിക്കുന്നു.
