ലോകം മുഴുവന്‍ വന്‍ ഹിറ്റായി മാറിയ അവതാര്‍ ഫ്രാഞ്ചൈസിയുടെ അടുത്ത ഭാഗത്തിന് ഔദ്യോഗികമായ പ്രഖ്യാപനം. ‘അവതാര്‍ 3’ സിനിമ 2025 ക്രിസ്മസിന് റിലീസ് ചെയ്യും. 69 കാരനായ സംവിധായകന്‍ ജെയിംസ് കാമറൂണ്‍ ‘അവതാര്‍’ ഫ്രാഞ്ചൈസിയുടെ അടുത്ത ഭാഗത്തിനായി തിരക്കേറിയ പോസ്റ്റ് പ്രൊഡക്ഷന്‍ ഘട്ടത്തിനായി തയ്യാറെടുക്കുകയാണ്.
ലോകം മുഴുവനുമുള്ള ആരാധകര്‍ ആകാംഷയോടെ കാത്തിരിക്കുന്ന ‘അവതാര്‍ 3’ ന്റെ വിവരം ജെയിംസ് കാമറൂണ്‍ വെളിപ്പെടുത്തിയത് ന്യൂസിലന്‍ഡിലെ 1 ന്യൂസിന് നല്‍കിയ അഭിമുഖത്തിലായിരുന്നു.”ഞങ്ങള്‍ വളരെ തീവ്രമായ രണ്ട് വര്‍ഷത്തെ പോസ്റ്റ്-പ്രൊഡക്ഷനിലേക്ക് പോകുന്നു. സിനിമ 2025 ക്രിസ്മസിന് പുറത്തുവരും.” സിനിമയെക്കുറിച്ച് ജെയിംസ് കാമറൂണ്‍ പറഞ്ഞു. ആദ്യം 2024 ല്‍ റിലീസ് ചെയ്യാന്‍ തീരുമാനിച്ചിരുന്ന മൂന്നാമത്തെ ‘അവതാര്‍’ ചിത്രം ഹോളിവുഡ് പണിമുടക്ക് കാരണം കാലതാമസം നേരിടുകയായിരുന്നു. ഇതോടെയാണ് അതിന്റെ പ്രീമിയര്‍ 2025 ലേക്ക് മാറ്റിയത്.
സിനിമയോടുള്ള സമര്‍പ്പണത്തിന് പേരുകേട്ട കാമറൂണ്‍, മൂന്ന് സിനിമകള്‍ക്കായി ‘അവതാര്‍’ സീരീസില്‍ ജോലി ചെയ്യാന്‍ ശേഷിക്കുന്ന ദിവസങ്ങള്‍ ചെലവഴിക്കാന്‍ സന്നദ്ധത പ്രകടിപ്പിച്ചു.ന്യൂസിലന്‍ഡ് പൗരനാകാനുള്ള തന്റെ പദ്ധതികളും കാമറൂണ്‍ പങ്കുവച്ചു. ന്യൂസിലന്‍ഡിലേക്കുള്ള നീക്കം സംവിധായകന്റെ വ്യക്തിപരവും തൊഴില്‍പരവുമായ ജീവിതത്തിലെ ഒരു സുപ്രധാന ചുവടുവെപ്പാണ്, ഇത് രാജ്യവുമായുള്ള ആഴത്തിലുള്ള ബന്ധത്തെ പ്രതിഫലിപ്പിക്കുന്നു.
‘അവതാര്‍ 3’യുടെ ഔദ്യോഗിക പേര് ഇതുവരെ പ്രഖ്യാപിച്ചിട്ടില്ല. കഴിഞ്ഞ വര്‍ഷം പുറത്തിറങ്ങിയ ‘അവതാര്‍: ദി വേ ഓഫ് വാട്ടര്‍’ ലോകമെമ്പാടും ഏറ്റവും കൂടുതല്‍ കളക്ഷന്‍ നേടിയ മൂന്നാമത്തെ ചിത്രമായി മാറിയിരുന്നു. കാമറൂണ്‍ സമര്‍ത്ഥമായി സൃഷ്ടിച്ച തകര്‍പ്പന്‍ കഥയുടെ തുടര്‍ച്ചയ്ക്കായി ഫ്രാഞ്ചൈസി ആരാധകര്‍ ആകാംക്ഷയോടെ കാത്തിരിക്കുകയാണ്.
