വസ്ത്രധാരണത്തിനെതിരെ സോഷ്യൽ മീഡിയയിൽ കടുത്ത വിമർശനം ഉയർന്നതോടെ അതേ വസ്ത്രത്തിൽ തന്നെയുള്ള ഫോട്ടോഷൂട്ട് ചിത്രങ്ങൾ പങ്കുവെച്ച് നടി നസ്രിയ നസിം രംഗത്തെത്തി. ആളുകൾ കുറ്റപ്പെടുത്തിയ ഒലിവ് മസ്റ്റാർഡ് നിറത്തിലുള്ള ഓഫ് ഷോൾഡർ വസ്ത്രമണിഞ്ഞ ചിത്രങ്ങൾ ഇൻസ്റ്റഗ്രാമിൽ പോസ്റ്റ് ചെയ്താണ് താരം വിമർശകർക്ക് മറുപടി നൽകിയത്.
‘സീൻ’ എന്ന ചിത്രത്തിന്റെ പ്രമോഷനായി ദുബായിൽ നടന്ന പരിപാടിയിൽ നസ്രിയ പങ്കെടുത്ത വീഡിയോകൾ പ്രചരിച്ചതോടെയാണ് വിമർശനങ്ങൾ തുടങ്ങിയത്. പൊതുവേദിയിൽ ആദ്യമായി ഗ്ലാമറസ് ലുക്കിൽ പ്രത്യക്ഷപ്പെട്ട നടിയുടെ വസ്ത്രധാരണം അനുയോജ്യമല്ലെന്നും നസ്രിയയിൽ നിന്ന് ഇത് പ്രതീക്ഷിച്ചില്ലെന്നും പറഞ്ഞ് ആളുകൾ അധിക്ഷേപിക്കുകയും മുൻപത്തെ ‘നയ്യാണ്ടി’ സിനിമയിലെ വിവാദ നിലപാടുകൾ ഓർമ്മിപ്പിക്കുകയും ചെയ്തു.
എന്നാൽ ഈ വിമർശനങ്ങൾക്കെല്ലാം കൃത്യമായ മറുപടിയാണ് താരം നൽകിയത്. പ്രമോഷൻ ചടങ്ങിൽ ധരിച്ച അതേ വസ്ത്രത്തിലെ ചിത്രങ്ങൾ ‘സീൻ’ എന്ന ക്യാപ്ഷനോടെ ഇൻസ്റ്റഗ്രാമിൽ പങ്കുവെക്കുകയായിരുന്നു. നസ്ലിൻ, ജിത്തു മാധവൻ, ശ്രിന്ദ, അർച്ചന കവി, മീര നന്ദൻ, ആൻ അഗസ്റ്റിൻ, അനാർക്കലി നാസർ തുടങ്ങി ചലച്ചിത്ര രംഗത്തെ നിരവധി പ്രമുഖർ നസ്രിയയുടെ ഈ പുതിയ ലുക്കിനെ പ്രശംസിച്ച് രംഗത്തെത്തി.
ജിത്തു മാധവൻ സംവിധാനം ചെയ്യുന്ന ‘സീൻ’ എന്ന ചിത്രത്തിലൂടെ 12 വർഷങ്ങൾക്ക് ശേഷമാണ് നസ്രിയ തമിഴിലേക്ക് തിരിച്ചെത്തുന്നത്. ചിത്രത്തിൽ സൂര്യയും നസ്ലിനുമാണ് മറ്റു പ്രധാന വേഷങ്ങളിൽ എത്തുന്നത്. സിനിമകൾ കണ്ട് തുടങ്ങിയ കാലം മുതൽ താൻ സൂര്യയുടെ വലിയ ആരാധകയാണെന്നും കരിയർ ഗൗരവമായി കാണാൻ കാരണം അദ്ദേഹമാണെന്നും ദുബായിലെ പ്രമോഷൻ ചടങ്ങിൽ നസ്രിയ പറഞ്ഞത് വൈറലായിരുന്നു. ചിത്രം നവംബർ ആറിന് തിയറ്ററുകളിലെത്തും.
