ഇതിനകം തെന്നിന്ത്യയിലെ ഒട്ടുമിക്ക മുന്‍ നിര താരങ്ങള്‍ക്കും നായികയായ നിത്യാമേനോന്‍ ജയം രവിയുടെ നായികയാകുന്നു. റെഡ് ജയന്റ് മൂവീസിന്റെ ബാനറില്‍ കിരുത്തിഗ ഉദയനിധി സംവിധാനം ചെയ്യുന്ന കാതലിക്ക നേരമില്ലൈ എന്ന സിനിമയിലാണ് നിത്യാമേനോന്‍ ജയം രവിയുടെ നായികയാകുന്നത്.
അഭിനേതാക്കളെ അവതരിപ്പിക്കുന്ന സിനിമയുടെ ഫസ്റ്റ് ലുക്ക് പോസ്റ്റര്‍ അണിയറക്കാര്‍ പുറത്തുവിട്ടിരിക്കുകയാണ്. നിത്യാമേനോനും ജയം രവിയും ആലിംഗനം ചെയ്ത് നില്‍ക്കുന്ന നിലയിലുള്ള പോസ്റ്ററാണ് സാമൂഹ്യമാധ്യമ പേജില്‍ പ്രത്യക്ഷപ്പെട്ടിരിക്കുന്നത്. വിജയ് യും ധനുഷും അടക്കമുള്ള തമിഴ് താരങ്ങളുടെ നായികയായി എത്തിയിട്ടുണ്ടെങ്കിലും ജയംരവിയുടെ നായികയായി നിത്യാമേനോന്‍ എത്തുന്നത് ഇതാദ്യമാണ്.
എ.ആര്‍. റഹ്മാനാണ് സിനിമയ്ക്ക് സംഗീതം നല്‍കുന്നത്. ഛായാഗ്രഹണം നിര്‍വ്വഹിക്കുന്നത് ഗിവ്മിക് ആര്യയാണ്. ഇവരെ കൂടാതെ യോഗി ബാബു, വിനയ് റായ്, ലാല്‍, ജോണ്‍ കൊക്കന്‍, ടി ജെ ഭാനു, ലക്ഷ്മി രാമകൃഷ്ണന്‍, വിനോദിനി വൈദ്യനാഥന്‍, മനോ എന്നിവരും ചിത്രത്തില്‍ അഭിനയിക്കുന്നുണ്ട്. ലോറന്‍സ് കിഷോര്‍ എഡിറ്റിംഗ് നിര്‍വഹിക്കും. ചിത്രത്തിന്റെ റിലീസ് തീയതി ഇതുവരെ പ്രഖ്യാപിച്ചിട്ടില്ല.
