ഏറെ പ്രതീക്ഷയോടെ കാത്തിരിക്കുന്ന ഹോളിവുഡ് ചിത്രം ‘സ്പൈഡർമാൻ: ബ്രാൻഡ് ന്യൂ ഡേ’ തിയേറ്ററുകളിലെത്താൻ ദിവസങ്ങൾ മാത്രം ബാക്കിനിൽക്കെ, ചിത്രത്തിന് സെൻസർ ബോർഡ് ‘യു/എ 13+’ സർട്ടിഫിക്കറ്റ് നൽകി. പ്രധാനപ്പെട്ട മൂന്ന് മാറ്റങ്ങൾ വരുത്താൻ നിർദേശിച്ചുകൊണ്ടാണ് ചിത്രത്തിന് പ്രദർശനാനുമതി ലഭിച്ചിരിക്കുന്നത്.
സിനിമയിലെ രണ്ട് ചുംബനരംഗങ്ങൾ പൂര്ണ്ണമായി നീക്കം ചെയ്യാനും ഇംഗ്ലീഷ് സംഭാഷണങ്ങളിലും സബ്ടൈറ്റിലുകളിലുമുള്ള ചില വാക്കുകൾ മ്യൂട്ട് ചെയ്യാനോ ഒഴുവാക്കാനോ ബോർഡ് ആവശ്യപ്പെട്ടിട്ടുണ്ട്. ഇതിനുപുറമേ, മദ്യപിക്കുന്ന രംഗങ്ങളിൽ നിയമപ്രകാരമുള്ള മുന്നറിയിപ്പ് സന്ദേശം നൽകാനും നിർദേശമുണ്ട്. എന്നാൽ സിനിമയുടെ പ്രധാന കഥാഗതിയിലോ ആക്ഷൻ രംഗങ്ങളിലോ മറ്റ് തടസ്സങ്ങളൊന്നും സെൻസർ ബോർഡ് മുന്നോട്ടുവെച്ചിട്ടില്ല.
ജൂലൈ 30-നാണ് ചിത്രം ലോകമെമ്പാടുമുള്ള തിയേറ്ററുകളിൽ എത്തുന്നത്. ടോം ഹോളണ്ടും സെൻഡേയയും വീണ്ടും പീറ്റർ പാർക്കറായും എം.ജെയായും ഒന്നിക്കുന്നു എന്നതാണ് ആരാധകരെ ആവേശത്തിലാക്കുന്ന പ്രധാന കാര്യം. ക്രിസ് മക്കെന്ന, എറിക് സമ്മേഴ്സ് എന്നിവരുടെ തിരക്കഥയിൽ ഡെസ്റ്റിൻ ഡാനിയേൽ ക്രെട്ടൺ സംവിധാനം ചെയ്ത ഈ ചിത്രത്തിന് രണ്ട് മണിക്കൂറും 25 മിനിറ്റുമാണ് ദൈർഘ്യമുള്ളത്.
