ഹൈദരാബാദിൽ നിന്നുള്ള ഒരു വൈറൽ വീഡിയോ ഇപ്പോൾ സോഷ്യൽ മീഡിയയിൽ വലിയ ആശങ്കയ്ക്ക് കാരണമായിരിക്കുകയാണ്. നഗരത്തിലെ തിരക്കേറിയ ഐടി ഇടനാഴിയിലൂടെ ബൈക്കിന്റെ പെട്രോൾ ടാങ്കിന് മുകളിൽ ലാപ്ടോപ്പ് തുറന്നുവെച്ച് യാത്ര ചെയ്യുന്ന ഒരു യുവാവിന്റെ ദൃശ്യങ്ങളാണ് വീഡിയോയിലുള്ളത്. മാധാപൂരിലെ ഹൈടെക് കമാൻ എന്ന സ്ഥലത്തിന് സമീപം വെച്ച്, അരികിലൂടെ പോയ ഒരു കാറിലെ യാത്രക്കാരൻ പകർത്തിയതാണ് ഈ ദൃശ്യങ്ങൾ എന്ന് പറയപ്പെടുന്നു. ലാപ്ടോപ്പ് സ്ക്രീൻ ഓൺ ചെയ്ത നിലയിലായിരുന്നു ഇയാൾ വണ്ടിയോടിച്ചിരുന്നത്. ഈ വീഡിയോ സോഷ്യൽ മീഡിയയിൽ അതിവേഗം പ്രചരിക്കുകയും, റോഡ് സുരക്ഷയെക്കുറിച്ചും ഇന്നത്തെ തൊഴിൽ സംസ്കാരത്തെക്കുറിച്ചുമുള്ള വലിയ ചർച്ചകൾക്ക് വഴിവെക്കുകയും ചെയ്തു.
സോഷ്യൽ മീഡിയ ഉപയോക്താക്കൾ വളരെ പെട്ടെന്നാണ് ഈ വീഡിയോയോട് പ്രതികരിച്ചത്. പലരും ഇതിനെ തമാശരൂപേണ “വർക്ക് ഫ്രം ബൈക്ക്” എന്നും “വീലുകളിലെ ജോലി” എന്നും വിശേഷിപ്പിച്ചപ്പോൾ, മറ്റ് ചിലർ ആധുനിക കോർപ്പറേറ്റ് ജീവിതത്തിന്റെ സമ്മർദ്ദങ്ങളെയാണ് ചൂണ്ടിക്കാണിച്ചത്. “റോഡിൽ സ്വന്തം ജീവൻ വെച്ച് പന്താടുന്നു… അത്ര വലിയ ജോലി അത്യാവശ്യമൊന്നും ഇവിടെയില്ല… ഇതൊരു സ്റ്റണ്ട് മാത്രമായിട്ടേ തോന്നുന്നുള്ളൂ,” എന്ന് ഒരാൾ കുറിച്ചു. “ഇതെല്ലാം മൈക്രോമാനേജ്മെന്റിന്റെ (അമിതമായ നിരീക്ഷണം) പ്രശ്നമാണ്. ടാങ്കിന് മുകളിൽ ലാപ്ടോപ്പ് വെക്കുന്നത് നല്ലൊരു ആശയമല്ല, അയാൾ സുരക്ഷിതമായി വണ്ടിയോടിക്കുന്നതിലാണ് ശ്രദ്ധിക്കേണ്ടത്,” എന്ന് രണ്ടാമതൊരാൾ അഭിപ്രായപ്പെട്ടു. “തീർച്ചയായും ഇത് സമയത്തിന്റെ പ്രശ്നമാണ്. നിങ്ങൾ എത്ര സെക്കൻഡ് ലോഗിൻ ചെയ്തിരിക്കുന്നു എന്ന് വരെ അവർ നിരീക്ഷിക്കുന്നുണ്ടാകും. മൈക്രോമാനേജ്മെന്റിന്റെ പരമാവധി രൂപമാണിത്,” എന്ന് മൂന്നാമതൊരാളും പ്രതികരിച്ചു.
വാഹനം ഓടിക്കുന്നതിനിടയിൽ ശ്രദ്ധ തിരിയുന്നതിനെക്കുറിച്ചുള്ള വലിയ ആശങ്കകളാണ് ഈ വീഡിയോ ഉയർത്തുന്നത്. വണ്ടിയോടിക്കുമ്പോൾ ലാപ്ടോപ്പിലേക്ക് ശ്രദ്ധ കേന്ദ്രീകരിക്കുന്നത് അപകടസാധ്യത വർദ്ധിപ്പിക്കുമെന്ന് പലരും മുന്നറിയിപ്പ് നൽകി. തിരക്കേറിയ നഗര റോഡുകളിൽ ഇത്തരം പെരുമാറ്റങ്ങൾ ഉണ്ടാക്കുന്ന അപകടങ്ങളെക്കുറിച്ച് കൂടുതൽ അവബോധം സൃഷ്ടിക്കണമെന്നും ട്രാഫിക് നിയമങ്ങൾ കർശനമാക്കണമെന്നും പലരും ആവശ്യപ്പെട്ടു. ഒപ്പം, ഈ യാത്രക്കാരൻ ഹെൽമെറ്റ് ധരിച്ചിരുന്നില്ല എന്ന കാര്യവും പലരും ചൂണ്ടിക്കാണിച്ചു. പൊതുജന സുരക്ഷയെ ബാധിക്കുന്ന ഇത്തരം അപകടകരമായ പെരുമാറ്റങ്ങൾക്ക് കർശനമായ പിഴയും ശിക്ഷയും നൽകണമെന്ന് ആളുകൾ കമന്റ് ചെയ്തു.
ഇരുചക്ര വാഹനത്തിൽ ഇരുന്ന് ലാപ്ടോപ്പ് ഉപയോഗിക്കുന്ന ഒരു വീഡിയോ വൈറലാകുന്നത് ഇതാദ്യമല്ല. ഈ വർഷം ആദ്യം മറ്റൊരു ബൈക്ക് യാത്രക്കാരൻ വണ്ടിയോടിക്കുന്നതിനിടയിൽ ലാപ്ടോപ്പിൽ ജോലി ചെയ്യുന്ന ദൃശ്യങ്ങൾ പുറത്തുവന്നിരുന്നു. മറ്റൊരു സംഭവത്തിൽ, ബൈക്കിന് പിന്നിലിരുന്ന് യാത്ര ചെയ്ത ഒരു യുവതി ലാപ്ടോപ്പ് ഉപയോഗിക്കുന്നതിന്റെ വീഡിയോയും പ്രചരിച്ചിരുന്നു. ഹൈദരാബാദിൽ നിന്നുള്ള ഈ പുതിയ വീഡിയോ, ജോലി-ജീവിത സന്തുലനത്തെക്കുറിച്ചും (work-life balance) ഇന്ത്യയിലെ ടെക്നോളജി മേഖലകളിൽ ജോലി ചെയ്യുന്നവർ നേരിടുന്ന വർദ്ധിച്ചുവരുന്ന തൊഴിൽ സമ്മർദ്ദങ്ങളെക്കുറിച്ചുമുള്ള ചർച്ചകൾക്ക് വീണ്ടും തുടക്കമിട്ടിരിക്കുകയാണ്.
