പൊതുജനങ്ങൾക്ക് ഒരു നല്ല സന്ദേശം ഏറ്റവും മനോഹരമായ രീതിയിൽ പങ്കുവെക്കാൻ ഉത്തരാഖണ്ഡ് പോലീസ് അടുത്തിടെ സോഷ്യൽ മീഡിയയിൽ പങ്കുവെച്ച ഒരു കുരങ്ങന്റെ വീഡിയോ ഇപ്പോൾ നെറ്റിസൺസ് ഏറ്റെടുത്തിരിക്കുകയാണ്. ഒരു പൊതു ടാപ്പിൽ നിന്ന് രണ്ട് കുരങ്ങന്മാർ വെള്ളം കുടിക്കുന്നതാണ് ഈ വീഡിയോയിൽ ഉള്ളത്. അതിലൊന്ന് വളരെ എളുപ്പത്തിൽ ടാപ്പിന്റെ ലീവർ നിയന്ത്രിക്കുന്നുണ്ടായിരുന്നു. വെള്ളം കുടിച്ച് കഴിഞ്ഞ് അവ അവിടെനിന്ന് പോകാൻ നേരം, വെള്ളം തുറന്നുവിട്ട കുരങ്ങൻ ടാപ്പ് കൃത്യമായി അടച്ചു! ഇതാണ് വീഡിയോയെ ഏറെ പ്രത്യേകതയുള്ളതാക്കുന്നത്.
മിക്ക മനുഷ്യരേക്കാളും വിവേകത്തോടെ പെരുമാറുന്ന ഈ വന്യമൃഗങ്ങളിൽ നിന്ന് മനുഷ്യർ പാഠം ഉൾക്കൊള്ളണമെന്ന് വീഡിയോ പങ്കുവെച്ചുകൊണ്ട് ഉത്തരാഖണ്ഡ് പോലീസ് കുറിച്ചു. “ഈ ഉത്തരവാദിത്തബോധം ഓരോ മനുഷ്യനും വലിയൊരു പാഠമാണ്. ഈ വന്യമൃഗങ്ങൾക്ക് പോലും ജലത്തിന്റെ വില മനസ്സിലാക്കാൻ കഴിയുമെങ്കിൽ നമ്മളും ബോധവാന്മാരാകണം. വെള്ളം സംരക്ഷിക്കൂ, ഭാവി സുരക്ഷിതമാക്കൂ,” എന്ന് പോലീസ് എക്സിൽ (ട്വിറ്റർ) കുറിച്ചു. ‘uttarakhandcops’ എന്ന അക്കൗണ്ടിലൂടെ പങ്കുവെച്ച ഈ വീഡിയോ ഇതിനോടകം രണ്ട് ലക്ഷത്തിനടുത്ത് ആളുകൾ കണ്ടുകഴിഞ്ഞു.
വീഡിയോയ്ക്ക് താഴെ നിരവധി രസകരമായ പ്രതികരണങ്ങളാണ് വരുന്നത്. പലരും കുരങ്ങനെ ഒരു “ഉത്തരവാദിത്തമുള്ള പൗരൻ” എന്ന് വിളിച്ചപ്പോൾ, ചിലർ ഇത് അബദ്ധത്തിൽ സംഭവിച്ചതാകാം എന്നും അഭിപ്രായപ്പെട്ടു. എന്നിരുന്നാലും വീഡിയോ എല്ലാവരുടെയും ഹൃദയം കീഴടക്കി. മനുഷ്യർ കുരങ്ങനിൽ നിന്ന് പരിണമിച്ചതല്ല, മറിച്ച് കുരങ്ങന്മാർ മനുഷ്യനേക്കാൾ പരിണമിച്ചവരാണെന്ന് ഈ വീഡിയോ തെളിയിക്കുന്നു എന്ന് ഒരു ഉപയോക്താവ് കുറിച്ചു. മനുഷ്യരാണ് ഈ ഭൂമിയിലെ ഏറ്റവും മോശം ജീവികളെന്നും അവരേക്കാൾ എത്രയോ ഭേദമാണ് മൃഗങ്ങളെന്നും മറ്റൊരു വ്യക്തി പ്രതികരിച്ചു. മൃഗങ്ങൾക്ക് പൊതുബോധം (civic sense) ഉണ്ടെന്ന് പറയുന്നതിനേക്കാൾ, അവർക്ക് ആവശ്യമുള്ളത് മാത്രം പ്രകൃതിയിൽ നിന്ന് എടുക്കാനും പ്രകൃതിയെ ബഹുമാനിക്കാനും അറിയാമെന്നാണ് ഇതിലൂടെ വ്യക്തമാകുന്നതെന്നും, മനുഷ്യരാണ് ഇത് കണ്ട് പഠിക്കേണ്ടതെന്നും മറ്റൊരു ഉപയോക്താവ് ഓർമ്മിപ്പിച്ചു.
