പ്രശസ്ത ഗായകൻ അഫ്സലിന്റെ ഒരു വേറിട്ട വീഡിയോയാണ് ഇപ്പോൾ സോഷ്യൽ മീഡിയയിൽ വലിയ രീതിയിൽ ശ്രദ്ധിക്കപ്പെടുന്നത്. യാതൊരുവിധ ഉപകരണങ്ങളോ ആയുധങ്ങളോ ഇല്ലാതെ വെറും കൈകൾ മാത്രം ഉപയോഗിച്ച് അഫ്സൽ തേങ്ങ പൊളിക്കുന്നതാണ് ഈ വീഡിയോയിലുള്ളത്. ഗായകനായ സന്നിധാനന്ദനാണ് തന്റെ ഫേസ്ബുക്ക് അക്കൗണ്ടിലൂടെ ഈ ദൃശ്യങ്ങൾ പുറത്തുവിട്ടത്.
അഫ്സൽ വളരെ പെട്ടെന്ന് കൈകൊണ്ട് തേങ്ങ പൊളിക്കുന്നത് മറ്റ് ഗായകർ അത്ഭുതത്തോടെയും കൗതുകത്തോടെയും നോക്കിനിൽക്കുന്നത് വീഡിയോയിൽ കാണാം. പിന്നണി ഗായകരുടെ സംഘടനയായ ‘സമം’ സംഘടിപ്പിച്ച ഒരു പരിപാടിക്കിടെ ഗായകർ ഒത്തുചേർന്നപ്പോഴാണ് അഫ്സൽ തന്റെ ഈ അപൂർവ്വ കഴിവ് സുഹൃത്തുക്കൾക്ക് മുന്നിൽ കാണിച്ചുകൊടുത്തത്. കൈകൊണ്ട് തേങ്ങ പൊളിക്കുന്നതിനിടയിൽ, ‘ഇന്ന് നഖം വെട്ടാതിരുന്നത് ഭാഗ്യമായി’ എന്ന് അഫ്സൽ തമാശ രൂപേണ പറഞ്ഞത് അവിടെയുണ്ടായിരുന്നവരെയെല്ലാം ചിരിപ്പിച്ചു. ചുറ്റും നിന്നവർ കൈയടിച്ചാണ് അഫ്സലിനെ പ്രോത്സാഹിപ്പിച്ചത്.
വളരെ രസകരമായ ഒരു അടിക്കുറിപ്പോടെയാണ് (Caption) സന്നിധാനന്ദൻ ഈ വീഡിയോ പങ്കുവെച്ചത്. ‘കൈവിരലുകൾ കൊണ്ട് തേങ്ങ പൊളിക്കുന്ന ഈ പിന്നണി ഗായകനെ കണ്ടാൽ നിങ്ങൾ ഞെട്ടും പത്തുവട്ടം’ എന്നാണ് സന്നിധാനന്ദൻ ഫേസ്ബുക്കിൽ കുറിച്ചത്. വീഡിയോ പുറത്തുവന്നതോടെ നിരവധി ആളുകളാണ് രസകരമായ കമന്റുകളുമായി രംഗത്തെത്തിയത്. ‘പ്രോഗ്രാം ഒന്നും ഇല്ലെങ്കിലും ജീവിക്കാൻ അറിയാം, ഇക്ക പൊളിച്ചു’ എന്നാണ് ഒരാൾ വീഡിയോയ്ക്ക് താഴെ കുറിച്ചത്. താൻ ചെറുപ്പത്തിൽ ഇതുപോലെ ചെയ്തിട്ടുണ്ടെന്നും എന്നാൽ ഇപ്പോൾ നിങ്ങളുടെ മുന്നിൽ ഇത് ചെയ്യാൻ പറ്റുമോ എന്ന് ചെറിയ പേടിയുണ്ടായിരുന്നുവെന്നും അഫ്സൽ വീഡിയോയിൽ പറയുന്നുണ്ട്.
