മുൻ ബിഗ് ബോസ് താരം സജ്ന നൂർ ഗർഭിണിയാണെന്ന വാർത്ത സോഷ്യൽ മീഡിയയിൽ ഇപ്പോൾ വലിയ ചർച്ചയായിരിക്കുകയാണ്. താൻ 9 ആഴ്ച ഗർഭിണിയാണെന്ന കാര്യം ഒരു ചിത്രം പങ്കുവെച്ചുകൊണ്ടാണ് സജ്ന തന്റെ ഇൻസ്റ്റാഗ്രാം പേജിലൂടെ ആരാധകരെ അറിയിച്ചത്. സജ്നയുടെ സുഹൃത്തും പ്രശസ്ത സിനിമാപ്രവർത്തകനുമായ റസൂൽ പൂക്കുട്ടിയും ഈ ചിത്രത്തിലുണ്ട്. താൻ അമ്മയാകാൻ പോകുന്നു എന്ന സൂചനകൾ താരം മുൻപും നൽകിയിരുന്നെങ്കിലും, കൃത്യമായ വിവരം പുറത്തുവിടുന്നത് ഇതാദ്യമായാണ്. പോസ്റ്റിന് താഴെ നിരവധി ആരാധകരും സുഹൃത്തുക്കളുമാണ് താരത്തിന് ആശംസകൾ നേർന്ന് രംഗത്തെത്തുന്നത്.
അതേസമയം, ‘ഇരുവരുടെയും വിവാഹം കഴിഞ്ഞോ?’ എന്ന തരത്തിലുള്ള ചോദ്യങ്ങളും ഈ പോസ്റ്റിന് താഴെ കമന്റുകളായി വരുന്നുണ്ട്. എന്നാൽ ഇത്തരം ചോദ്യങ്ങളോടൊന്നും പ്രതികരിക്കാൻ സജ്ന ഇതുവരെ തയ്യാറായിട്ടില്ല. റസൂൽ പൂക്കുട്ടി തന്റെ നല്ലൊരു സുഹൃത്ത് മാത്രമാണെന്നാണ് സജ്ന മുൻപ് പലപ്പോഴും വ്യക്തമാക്കിയിട്ടുള്ളത്.
ബിഗ് ബോസ് മലയാളം റിയാലിറ്റി ഷോയിലൂടെയാണ് സജ്നയും മുൻ ഭർത്താവ് ഫിറോസ് ഖാനും പ്രേക്ഷകർക്ക് മുന്നിൽ ശ്രദ്ധേയരാകുന്നത്. ഇരുവരുടേതും രണ്ടാം വിവാഹമായിരുന്നുവെങ്കിലും, ഷോ കഴിഞ്ഞ് ഏതാനും മാസങ്ങൾക്കുള്ളിൽ തന്നെ ഇവർ വേർപിരിഞ്ഞു. ഏറെ നാളത്തെ പ്രണയത്തിനൊടുവിൽ ഒന്നായ ഇവരുടെ വേർപിരിയൽ അന്ന് വലിയ വാർത്തയായിരുന്നു. ഫിറോസുമായുള്ള ബന്ധത്തിൽ സജ്നയ്ക്ക് ഒരു കുട്ടിയുണ്ട്. കൂടാതെ ആദ്യ വിവാഹത്തിൽ സജ്നയ്ക്ക് 17 വയസ്സുള്ള മറ്റൊരു മകനുമുണ്ട്.
തന്റെ മുൻ ദാമ്പത്യജീവിതം ഏറെ സങ്കീർണ്ണവും സങ്കടകരവുമായിരുന്നു എന്ന് സജ്ന മുൻപ് വെളിപ്പെടുത്തിയിട്ടുണ്ട്. ശാരീരികമായും സാമ്പത്തികമായും താൻ പീഡിപ്പിക്കപ്പെട്ടതായും, സ്വത്ത് തർക്കങ്ങളാണ് വേർപിരിയലിലേക്ക് നയിച്ചതെന്നും സജ്ന ആരോപിച്ചിരുന്നു. എന്നാൽ സജ്നയ്ക്ക് മറ്റൊരാളുമായി ബന്ധമുണ്ടെന്നായിരുന്നു ഫിറോസിന്റെ ആക്ഷേപം. ഈ ആരോപണങ്ങളെല്ലാം അന്ന് സജ്ന നിഷേധിച്ചിരുന്നു. ഫിറോസുമായുള്ള വേർപിരിയലിന് ശേഷമാണ് താൻ റസൂൽ പൂക്കുട്ടിയെ പരിചയപ്പെട്ടതെന്നാണ് സജ്ന പറഞ്ഞിരുന്നത്.
സിനിമയിലെ ഒരു പ്രമുഖനുമായുള്ള ബന്ധമാണ് വിവാഹമോചനത്തിന് കാരണം എന്ന ഫിറോസ് ഖാന്റെ ആരോപണങ്ങളെ സജ്ന അന്ന് ശക്തമായി തള്ളിക്കളഞ്ഞിരുന്നു. റസൂൽ പൂക്കുട്ടി തനിക്ക് നല്ലൊരു സുഹൃത്തും വലിയൊരു പിന്തുണയുമാണെന്നും, ഒരു തെറ്റും ചെയ്യാത്ത അദ്ദേഹത്തെ അപമാനിക്കാനാണ് ഫിറോസ് ശ്രമിക്കുന്നതെന്നും സജ്ന തുറന്നടിച്ചിരുന്നു. ‘ഒറ്റ’ എന്ന സിനിമയുടെ ജോലികൾ നടക്കുന്നതിനിടയിലാണ് അദ്ദേഹത്തെ കണ്ടുമുട്ടിയതെന്നും, ആ സിനിമയിൽ ഒരു ചെറിയ വേഷം ചെയ്ത പരിചയമാണ് പിന്നീട് നല്ലൊരു സുഹൃദ്ബന്ധമായി മാറിയതെന്നും സജ്ന വ്യക്തമാക്കിയിരുന്നു.
