കേരളത്തിൽ ഏറെ ശ്രദ്ധിക്കപ്പെട്ട പ്രണയിതാക്കളാണ് ആദിലയും നൂറയും. ഒരുപാട് പ്രതിസന്ധികളും എതിർപ്പുകളും അതിജീവിച്ച് കോടതിയുടെ ഉത്തരവിലൂടെയാണ് ഇരുവരും ഒരുമിച്ച് ജീവിക്കാൻ തുടങ്ങിയത്. ഇപ്പോൾ ഇവർ ഒരുമിച്ചുള്ള ജീവിതത്തിന് നാല് വർഷം തികയുകയാണ്. തങ്ങളുടെ നാലാം വാർഷിക വേളയിൽ നൂറയ്ക്ക് ഹൃദ്യമായ ആശംസകൾ നേർന്നുകൊണ്ട് ഒരു കുറിപ്പ് പങ്കുവെച്ചിരിക്കുകയാണ് ആദില.
നൂറയ്ക്കൊപ്പമുള്ള ഈ ജീവിതം അത്ഭുതങ്ങൾ നിറഞ്ഞ ഒരു റോളർ കോസ്റ്റർ യാത്ര പോലെയായിരുന്നു എന്ന് ആദില കുറിച്ചു. നമ്മൾ ഏറ്റവും സന്തോഷമുള്ള നിമിഷങ്ങൾ പരസ്പരം പങ്കിട്ടു, പ്രതിസന്ധികളെ ഒരുമിച്ച് നേരിട്ടു, വിജയങ്ങൾ ആഘോഷിച്ചു, പ്രയാസമേറിയ ദിനങ്ങളെ അതിജീവിച്ചു. എന്നാൽ ഇതിനിടയിലെല്ലാം ഒരൊറ്റ കാര്യം മാത്രം ഒട്ടും മാറിയിട്ടില്ല, നീ എപ്പോഴും എന്റെ അരികിൽ തന്നെ ഉണ്ടായിരുന്നുവെന്ന് ആദില പറയുന്നു.
നിന്നെപ്പോലൊരു പങ്കാളിയെ ജീവിതത്തിൽ കിട്ടിയത് വലിയൊരു ഭാഗ്യമായി ഞാൻ കരുതുന്നു. നീ എനിക്ക് വെറുമൊരു പ്രണയിനി മാത്രമല്ല, എന്റെ ഏറ്റവും വലിയ കരുത്തും സുരക്ഷിതത്വവും എന്റെ വീടുമാണ്. ജീവിതത്തിൽ ഏറ്റവും വലിയ പ്രതിസന്ധികൾ നേരിട്ട സമയങ്ങളിലാണ് ഞാൻ ഇത് കൂടുതൽ മനസ്സിലാക്കിയത്. മുന്നോട്ടുള്ള വഴി എത്ര പ്രയാസമേറിയതാണെങ്കിലും നീ ഒപ്പമുണ്ടെന്ന ചിന്ത എനിക്ക് വീണ്ടും എഴുന്നേൽക്കാനും, മുന്നോട്ട് കുതിക്കാനും, കൂടുതൽ ഉയരങ്ങളിലേക്ക് പറക്കാനുമുള്ള വലിയ ഊർജ്ജം നൽകുന്നുണ്ട്.
നമ്മുടെ ഭാവി മനോഹരമായ കാര്യങ്ങൾ നിറഞ്ഞതായിരിക്കുമെന്ന് ഞാൻ ആത്മാർത്ഥമായി വിശ്വസിക്കുന്നു. ഇനി ആര് വന്നാലും പോയാലും, നമ്മുടെ ജീവിതത്തിൽ എന്ത് സംഭവിച്ചാലും ഒരുകാര്യം ഉറപ്പാണ്; ഇന്നും നാളെയും എെന്നന്നേക്കും ഞാൻ നിന്റെ കൂടെത്തന്നെയുണ്ടാകും.
ചിലപ്പോഴൊക്കെ ഞാൻ നിന്നെ എത്രമാത്രം സ്നേഹിക്കുന്നുണ്ടെന്ന് എനിക്ക് പോലും പൂർണ്ണമായി മനസ്സിലാക്കാൻ കഴിയാറില്ല. നിന്റെ സാന്നിധ്യം എന്റെ ജീവിതത്തിലെ ഇരുട്ടിനെ വെളിച്ചമാക്കുന്നത് കൊണ്ട് തന്നെ കഠിനമായ ദിവസങ്ങൾക്ക് പോലും വലിയ ഭാരമുള്ളതായി തോന്നാറില്ല. എല്ലാം ശരിയാക്കിയെടുക്കാനുള്ള ഒരു മാന്ത്രികവിദ്യ നിന്റെ കൈകളിലുണ്ട്. നമ്മുടെ വിവാഹം ഉടൻ തന്നെ നടക്കുമെന്ന് ഞാൻ പ്രതീക്ഷിക്കുന്നു. നമ്മുടെ ജീവിതകാലത്ത് എന്നെങ്കിലും എല്ലാ പ്രണയങ്ങളെയും ഒരേപോലെ അംഗീകരിക്കുകയും ആഘോഷിക്കുകയും ചെയ്യുന്ന ഒരു നല്ല ദിവസം വരുമെന്ന് ഞാൻ പ്രത്യാശിക്കുന്നുവെന്ന് ആദില കുറിച്ചു.
