ബെംഗളൂരുവിലെ വിചിത്രമായ വാർത്തകൾ മാത്രം കേട്ട് മടുത്തവർക്കായി ഇതാ ഗുരുഗ്രാമിൽ നിന്നും അത്തരമൊരു വേറിട്ട വാർത്ത. തിരക്കേറിയ ഗുരുഗ്രാം തെരുവിൽ പൂർണ്ണമായും എയർ കണ്ടീഷൻ ചെയ്ത (എ.സി) ഒരു ഓട്ടോറിക്ഷ ഓടുന്നതിന്റെ വീഡിയോയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
“ഓട്ടോയ്ക്ക് എപ്പോഴാണ് ഇത്രയും വലിയൊരു മാറ്റം വന്നത്!” എന്ന കുറിപ്പോടെയാണ് വീഡിയോ പ്രചരിക്കുന്നത്. ഗുരുഗ്രാം പുതിയൊരു ലോകത്താണ് ജീവിക്കുന്നതെന്നും എ.സി ഘടിപ്പിച്ച ഓട്ടോയാണിതെന്നും വീഡിയോയിൽ പറയുന്നുണ്ട്.
പൂർണ്ണമായും ഗ്ലാസ് ജനലുകളാൽ അടച്ച നീല നിറത്തിലുള്ള ഒരു ഓട്ടോറിക്ഷയാണ് ദൃശ്യങ്ങളിലുള്ളത്. റോഡിലൂടെ പോയ മറ്റ് യാത്രക്കാരാണ് കൗതുകമുണർത്തുന്ന ഈ വണ്ടിയുടെ ദൃശ്യങ്ങൾ പകർത്തിയത്. ഈ വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുകയും നിരവധി ആളുകൾ ഇതിനോട് പ്രതികരിക്കുകയും ചെയ്യുന്നുണ്ട്. കടുത്ത ഉഷ്ണതരംഗം അനുഭവപ്പെടുന്ന ഈ സമയത്ത് ഇത്തരം വണ്ടികൾ അത്യാവശ്യമാണെന്നാണ് ഭൂരിഭാഗം ആളുകളുടെയും അഭിപ്രായം.
ഡൽഹി ഉൾപ്പെടെയുള്ള സമീപപ്രദേശങ്ങളിലും ഇത്തരം എ.സി ഓട്ടോകൾ ലഭ്യമാക്കണമെന്ന് ചിലർ ആവശ്യപ്പെടുന്നു. എന്നാൽ, സ്ത്രീകൾക്ക് യാത്ര ചെയ്യാൻ ഇത് എത്രത്തോളം സുരക്ഷിതമായിരിക്കും എന്ന ആശങ്കയും ചിലർ പങ്കുവെക്കുന്നുണ്ട്. അതേസമയം, ഇൻസ്റ്റാഗ്രാമിൽ പ്രചരിക്കുന്ന ഈ വീഡിയോയുടെ കൂടുതൽ വിവരങ്ങൾ സ്ഥിരീകരിക്കാൻ സാധിച്ചിട്ടില്ല.
