രാജ്യമെമ്പാടും ബക്രീദ് ആഘോഷങ്ങളുടെ ഭാഗമായി മൃഗബലി നടത്തുമ്പോൾ, ആഗ്രയിലെ ഒരു മുസ്ലിം കുടുംബം ആചാരപരമായ ബലി ഒഴിവാക്കി ആടിന്റെ ചിത്രമുള്ള കേക്ക് മുറിച്ച് പെരുന്നാൾ ആഘോഷിച്ചു. സോഷ്യൽ മീഡിയയിൽ ഇതിനോടകം തന്നെ ഈ വേറിട്ട ആഘോഷത്തിന്റെ വീഡിയോ വൈറലായിക്കഴിഞ്ഞു.
ആഗ്രയിലെ ഷാഗഞ്ച് പ്രദേശത്താണ് ഈ സംഭവം നടന്നത്. ഷെർവാണി മാർഗിലെ ‘തിരംഗ മൻസിലിൽ’ താമസിക്കുന്ന അഡ്വക്കേറ്റ് ഗുൽ ചമൻ ഷെർവാണിയും കുടുംബവുമാണ് തങ്ങളുടെ വീട്ടിൽ ഇത്തരമൊരു പ്രത്യേക ചടങ്ങ് സംഘടിപ്പിച്ചത്.
ആടിന്റെ ചിത്രം വരച്ച കേക്ക് ഒരുമിച്ച് മുറിച്ച കുടുംബം, ഇതിലൂടെ വലിയൊരു സന്ദേശമാണ് സമൂഹത്തിന് നൽകാൻ ആഗ്രഹിക്കുന്നത്. ബാഹ്യമായ പ്രകടനങ്ങളേക്കാൾ ഒരാളുടെ നല്ല മനസ്സിനും ഉദ്ദേശ്യങ്ങൾക്കുമാണ് അല്ലാഹു വില കൽപ്പിക്കുന്നതെന്ന് അഡ്വക്കേറ്റ് ഗുൽ ചമൻ ഷെർവാണി പറഞ്ഞു. ഉള്ളിലെ ദാക്ഷിണ്യമില്ലായ്മ, കാപട്യം, അഹങ്കാരം എന്നിവ ഉപേക്ഷിക്കുന്നതിലാണ് യഥാർത്ഥ ത്യാഗമെന്നും അദ്ദേഹം കൂട്ടിച്ചേർത്തു.
ഇന്നത്തെക്കാലത്ത് പലരും ബലിനൽകലിന്റെ പേരിൽ തങ്ങളുടെ സമ്പത്ത് പ്രദർശിപ്പിക്കാനാണ് ശ്രമിക്കുന്നത്. എന്നാൽ ഒരു നേരത്തെ ഭക്ഷണത്തിന് വകയില്ലാത്ത ഒരാൾക്ക് പോലും നല്ല ഉദ്ദേശ്യത്തോടെയും ശുദ്ധമായ മനസ്സോടെയും അർത്ഥവത്തായ ത്യാഗം ചെയ്യാൻ സാധിക്കും. സമൂഹത്തിൽ സ്നേഹവും മാനവികതയും നിറഞ്ഞ ഒരു അന്തരീക്ഷം വളർത്തിയെടുക്കണമെന്നും ഈ കുടുംബം അഭ്യർത്ഥിച്ചു. ദൈവകൽപ്പനയനുസരിച്ച് തന്റെ മകനെപ്പോലും ബലിനൽകാൻ തയ്യാറായ ഇബ്രാഹിം നബിയുടെ ത്യാഗസ്മരണ പുതുക്കുന്നതാണ് ബക്രീദ് അഥവാ ഈദുൽ അദ്ഹ. മക്കയിലെ വാർഷിക ഹജ്ജ് തീർത്ഥാടനത്തിന്റെ സമാപനത്തോടനുബന്ധിച്ചാണ് ഈ ഉത്സവം ആഘോഷിക്കുന്നത്.
