മുംബൈയിലെ ഒരു ഓട്ടോ യാത്രയ്ക്കിടയിൽ കണ്ട ഹൃദയസ്പർശിയായ ഒരു സന്ദേശം സോഷ്യൽ മീഡിയയിൽ വലിയ രീതിയിൽ ശ്രദ്ധിക്കപ്പെടുകയാണ്. മുംബൈ സ്വദേശിയായ ഉന്നതി ദേവാലിയ എന്ന ഇൻസ്റ്റാഗ്രാം ഇൻഫ്ലുവൻസറാണ് തന്റെ ഓട്ടോ യാത്രയ്ക്കിടയിൽ ഡ്രൈവർ സീറ്റിന് പിന്നിലായി എഴുതിവെച്ചിരുന്ന ഈ സന്ദേശം ക്യാമറയിൽ പകർത്തിയത്.
“ഞാനും ആരുടെയൊക്കെയോ അച്ഛനും സഹോദരനുമാണ്. നിങ്ങളുടെ സുരക്ഷ എനിക്ക് പ്രധാനമാണ്. യാതൊരു പേടിയും കൂടാതെ നിങ്ങൾക്ക് ഈ വണ്ടിയിൽ ഇരിക്കാം” എന്നായിരുന്നു ആ സന്ദേശം. തനിച്ച് യാത്ര ചെയ്യുന്ന സ്ത്രീകൾക്കും വൈകിയ വേളകളിൽ യാത്ര ചെയ്യുന്നവർക്കും ഒരുപോലെ ആശ്വാസവും സുരക്ഷിതബോധവും നൽകുന്നതായിരുന്നു ഡ്രൈവറുടെ ഈ വാക്കുകൾ.
“എല്ലാ പുരുഷന്മാരും ഭീഷണിയല്ല, ചിലർ സുരക്ഷിതമായ ഒരിടം കൂടിയാണെന്ന് നിങ്ങൾ തിരിച്ചറിയുന്ന നിമിഷം” എന്ന കുറിപ്പോടെയാണ് ഉന്നതി ഈ വീഡിയോ പങ്കുവെച്ചത്. പൊതുഗതാഗതത്തെ ആശ്രയിക്കുന്ന വലിയ നഗരങ്ങളിൽ സ്ത്രീകൾ നേരിടുന്ന പേടിയെയും ആശങ്കയെയും മാറ്റാൻ ഇത്തരം ചെറിയ കരുതലുകൾക്ക് വലിയ പങ്കുണ്ടെന്ന് വീഡിയോ കണ്ടവർ അഭിപ്രായപ്പെട്ടു.
സോഷ്യൽ മീഡിയയിൽ വൈറലായ ഈ വീഡിയോയ്ക്ക് താഴെ ഡ്രൈവറെ പ്രശംസിച്ചുകൊണ്ട് നിരവധി പേരാണ് രംഗത്തെത്തിയത്. ഇത്തരം പ്രവർത്തികൾ സാധാരണക്കാരായ മനുഷ്യരിലുള്ള വിശ്വാസം വീണ്ടെടുക്കാൻ സഹായിക്കുമെന്ന് പലരും കുറിച്ചു. ഭയത്തിന് പകരം പരസ്പര വിശ്വാസം വളർത്താൻ ഇത്തരം ചെറിയ മാറ്റങ്ങൾ സഹായിക്കുമെന്നും മുംബൈയിലെ ഈ ഓട്ടോ ഡ്രൈവർ എല്ലാവർക്കും ഒരു മാതൃകയാണെന്നും ഇന്റർനെറ്റ് ലോകം ഒന്നടങ്കം പുകഴ്ത്തുന്നു.
