ഓഫീസ് ജോലികൾക്കിടയിൽ തന്റെ കുഞ്ഞിനെ പരിപാലിക്കുന്ന ഒരു യുവ ഏകപിതാവിന്റെ ഹൃദയസ്പർശിയായ വീഡിയോ സോഷ്യൽ മീഡിയയിൽ വൈറലാവുകയാണ്. ലൂയിസഞ്ചൽ വെനഗസ് എന്ന 27-കാരനാണ് തന്റെ കുഞ്ഞുമകനൊപ്പമുള്ള പ്രവൃത്തിദിവസം ഇൻസ്റ്റഗ്രാമിലൂടെ പങ്കുവെച്ചത്. പ്രൊഫഷണൽ ഉത്തരവാദിത്തങ്ങളും പിതൃത്വവും എങ്ങനെ ഒരുമിച്ച് കൊണ്ടുപോകുന്നു എന്ന് കാണിക്കുന്ന ഈ വീഡിയോയ്ക്ക് വലിയ രീതിയിലുള്ള അഭിനന്ദനങ്ങളാണ് ലഭിച്ചുകൊണ്ടിരിക്കുന്നത്.
രാവിലെ ഒൻപത് മണിക്ക് ജോലി തുടങ്ങുന്ന താരം, മീറ്റിംഗുകളിൽ പങ്കെടുക്കുന്നതിനൊപ്പം തന്നെ കരയുന്ന കുഞ്ഞിനെ ആശ്വസിപ്പിക്കുന്നത് വീഡിയോയിൽ കാണാം. വാഹനങ്ങളുമായി ബന്ധപ്പെട്ട സേവനങ്ങൾ നൽകുന്ന ഒരു സ്ഥാപനത്തിലാണ് ഇദ്ദേഹം ജോലി ചെയ്യുന്നത്. മിക്കവാറും ദിവസങ്ങളിൽ കുഞ്ഞ് കൂടെയുണ്ടാകുമെന്നും, തുടക്കത്തിൽ ഇത് പ്രയാസകരമായിരുന്നുവെങ്കിലും ഇപ്പോൾ ഈ രീതിയുമായി താൻ പൊരുത്തപ്പെട്ടുവെന്നും അദ്ദേഹം പറയുന്നു. കുട്ടിയുടെ ഉറക്കവും കളിയുമെല്ലാം ശ്രദ്ധിക്കുന്നതിനൊപ്പം തന്നെ അദ്ദേഹം തന്റെ ജോലി കൃത്യമായി പൂർത്തിയാക്കുന്നുമുണ്ട്.
“കുഞ്ഞിനെ ജോലിസ്ഥലത്ത് കൊണ്ടുപോകുന്നത് ആദ്യം വെല്ലുവിളിയായിരുന്നു, എന്നാൽ ഇപ്പോൾ അവന് എപ്പോഴാണ് ഉറക്കം വേണ്ടതെന്ന് എനിക്ക് മനസ്സിലാകുന്നുണ്ട്” എന്ന് അദ്ദേഹം വീഡിയോയ്ക്ക് താഴെ കുറിച്ചു. പത്ത് ലക്ഷത്തിലധികം കാഴ്ചക്കാരെ നേടിയ ഈ വീഡിയോയ്ക്ക് ഒരു ലക്ഷത്തിലധികം ലൈക്കുകളും ലഭിച്ചു. ഒരു കുഞ്ഞിനെ തനിച്ച് വളർത്താൻ കാണിക്കുന്ന ധൈര്യത്തെയും അർപ്പണബോധത്തെയും പ്രശംസിച്ചുകൊണ്ട് ആയിരക്കണക്കിന് ആളുകളാണ് കമന്റ് ബോക്സിൽ എത്തുന്നത്.
“അഭിമാനം തോന്നുന്നു”, “നിങ്ങൾ മികച്ച രീതിയിലാണ് കുഞ്ഞിനെ വളർത്തുന്നത്”, “ഇതൊട്ടും എളുപ്പമല്ലെങ്കിലും നിങ്ങൾ അത് സാധ്യമാക്കുന്നു” എന്നിങ്ങനെ പോകുന്നു ആളുകളുടെ കമന്റുകൾ. കുട്ടികൾക്കായി ഓഫീസിൽ ഒരു പ്ലേമാറ്റ് കരുതണമെന്നതുപോലുള്ള ഉപദേശങ്ങളും ചിലർ നൽകുന്നുണ്ട്. തിരക്കേറിയ ലോകത്ത് ഉത്തരവാദിത്തങ്ങളിൽ നിന്ന് ഒളിച്ചോടാതെ മകനെ ചേർത്തുപിടിക്കുന്ന ഈ പിതാവ് ഇപ്പോൾ ഇന്റർനെറ്റിലെ താരമാണ്.
