ഇന്ത്യക്കാർക്കിടയിൽ ഫാറ്റി ലിവർ രോഗം ഇന്ന് സർവ്വസാധാരണമായി മാറിയിരിക്കുന്നു. ഉയർന്ന കലോറിയും പഞ്ചസാരയും അടങ്ങിയ ഭക്ഷണം, ഉദാസീനമായ ജീവിതശൈലി, വർദ്ധിച്ചുവരുന്ന അമിതവണ്ണം എന്നിവയാണ് ഇതിന് പ്രധാന കാരണം. ഇത് കൃത്യസമയത്ത് നിയന്ത്രിച്ചില്ലെങ്കിൽ കരളിന് ഗുരുതരമായ തകരാറുകൾ സംഭവിക്കാം. “മറ്റ് വംശജരെ അപേക്ഷിച്ച് ഇന്ത്യക്കാർക്ക് ഫാറ്റി ലിവർ വരാനുള്ള സാധ്യത മൂന്ന് മടങ്ങ് കൂടുതലാണ്,” ഡോ. അലോക് ചോപ്ര ഒരു ഇൻസ്റ്റാഗ്രാം പോസ്റ്റിൽ പറയുന്നു.
എന്തുകൊണ്ടാണ് ഇന്ത്യക്കാരിൽ ?
“ഇത് ആധുനിക ജീവിതശൈലി കാരണം മാത്രമല്ല. ഇതിന് പിന്നിൽ ആഴത്തിലുള്ള ഒരു പരിണാമപരമായ കാരണമുണ്ട്. ഇന്ത്യൻ ഉപഭൂഖണ്ഡത്തിലുള്ളവർക്ക് ഒരു ജനിതക പ്രത്യേകതയുണ്ട്. തലമുറകളോളം ക്ഷാമത്തിലൂടെ കടന്നുപോയതിനാൽ, അതിജീവനത്തിന്റെ ഭാഗമായി നമ്മുടെ ശരീരം കൊഴുപ്പ് പെട്ടെന്ന് കരളിൽ ശേഖരിക്കാൻ ശീലിച്ചു. കാലക്രമേണ ക്ഷാമം ഇല്ലാതായെങ്കിലും ഈ ജനിതക മാറ്റം മാറിയില്ല. അതുകൊണ്ടാണ് ഇന്ന് മൂന്നിൽ ഒരാൾക്ക് ഫാറ്റി ലിവർ ഉണ്ടെന്ന് കണക്കാക്കപ്പെടുന്നത്. യഥാർത്ഥ കണക്ക് ജനസംഖ്യയുടെ പകുതിയോളം വരാം,” ഡോ. ചോപ്ര വിശദീകരിക്കുന്നു.
ഫാറ്റി ലിവർ എങ്ങനെ തടയാം?
കരൾ സ്വയം സുഖപ്പെടാനും പുനരുജ്ജീവിപ്പിക്കാനും കഴിവുള്ള അവയവമായതിനാൽ ഈ അവസ്ഥ മാറ്റിയെടുക്കാൻ എളുപ്പമാണെന്ന് ഡോ. ചോപ്ര പറയുന്നു. അദ്ദേഹം നിർദ്ദേശിക്കുന്ന വഴികൾ താഴെ പറയുന്നവയാണ്:
- അത്താഴം നേരത്തെ കഴിക്കുക, രാത്രിയിലെ ലഘുഭക്ഷണം ഒഴിവാക്കുക: രാത്രി വൈകി ഭക്ഷണം കഴിക്കുന്നത് ദഹനത്തെ തടസ്സപ്പെടുത്തുകയും അമിതമായി കൊഴുപ്പ് അടിഞ്ഞുകൂടാൻ കാരണമാവുകയും ചെയ്യുന്നു.
- ഇന്റർമിറ്റന്റ് ഫാസ്റ്റിംഗ് (Intermittent Fasting): കൃത്യമായ ഇടവേളകളിൽ ഉപവാസം അനുഷ്ഠിക്കുന്നത് കരളിന് വിശ്രമം നൽകാനും വിഷാംശങ്ങൾ നീക്കം ചെയ്യാനും സഹായിക്കുന്നു. ഇത് ഇൻസുലിൻ പ്രതിരോധം കുറയ്ക്കുകയും കൊഴുപ്പ് കുറയ്ക്കാൻ സഹായിക്കുകയും ചെയ്യും.
- ശുദ്ധീകരിച്ച എണ്ണകൾക്ക് പകരം നെയ്യ് ഉപയോഗിക്കുക: ശുദ്ധീകരിച്ച സീഡ് ഓയിലുകളിൽ (Refined seed oils) അടങ്ങിയിരിക്കുന്ന ട്രാൻസ് ഫാറ്റുകൾ കരളിന് ദോഷകരമാണ്. എന്നാൽ നെയ്യ് ദഹനത്തിനും വീക്കം കുറയ്ക്കാനും സഹായിക്കുന്നു.
- സംസ്കരിച്ച ഭക്ഷണങ്ങൾ ഒഴിവാക്കുക: പഞ്ചസാരയും അനാരോഗ്യകരമായ കൊഴുപ്പും പ്രിസർവേറ്റീവുകളും അടങ്ങിയ ഭക്ഷണങ്ങൾ കരളിന്റെ ആരോഗ്യത്തെ നശിപ്പിക്കും.
- ആന്റിഓക്സിഡന്റുകൾ ഉൾപ്പെടുത്തുക: ഗ്ലൂട്ടത്തയോൺ (Glutathione) പോലുള്ള ആന്റിഓക്സിഡന്റുകൾ കരളിനെ സംരക്ഷിക്കുന്നു. ബ്ലൂബെറി, സ്ട്രോബെറി, ചീര, കാരറ്റ്, തക്കാളി തുടങ്ങിയ ആന്റിഓക്സിഡന്റ് സമ്പുഷ്ടമായ ഭക്ഷണങ്ങൾ ശീലമാക്കുക.
- ബ്ലാക്ക് കോഫി കുടിക്കുക: ബ്ലാക്ക് കോഫി കുടിക്കുന്നത് ഫാറ്റി ലിവർ സാധ്യത കുറയ്ക്കുമെന്ന് പഠനങ്ങൾ സൂചിപ്പിക്കുന്നു. ഇത് കരളിന്റെ പ്രവർത്തനം മെച്ചപ്പെടുത്താൻ സഹായിക്കും. എന്നാൽ മിതമായ അളവിൽ മാത്രമേ ഉപയോഗിക്കാവൂ.
ഈ ലളിതമായ ജീവിതശൈലീ മാറ്റങ്ങളിലൂടെ കരളിന്റെ ആരോഗ്യം വീണ്ടെടുക്കാൻ സാധിക്കും.
കുറിപ്പ്: ഈ വിവരങ്ങൾ പൊതുവായ അറിവിനായി മാത്രമുള്ളതാണ്. കൂടുതൽ വിവരങ്ങൾക്കും ചികിത്സയ്ക്കുമായി ഒരു ഡോക്ടറെ സമീപിക്കേണ്ടതാണ്.
